ରାୟପୁର,୦୧/୧୨: ଭାରତ ଓ ଅଷ୍ଟ୍ରେଲିଆ ମଧ୍ୟରେ ଖେଳାଯାଉଥିବା ୫ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ର ଚତୁର୍ଥ ମ୍ୟାଚ୍ରେ ଭାରତ ବିଜୟୀ ହେବା ସହିତ ସିରିଜ୍କୁ କବ୍ଜା କରିଛି। ଭାରତ ୩-୧ରେ ଅଗ୍ରଣୀ ରହିଛି। ତେବେ ସିରିଜ୍ର ପଞ୍ଚମ ତଥା ଚୁଡ଼ାନ୍ତ ମୁକାବିଲା ଡିସେମ୍ବର-୩ ତାରିଖରେ ଖେଳାଯିବ। ଅଷ୍ଟ୍ରେଲିଆ ପକ୍ଷରୁ ଟ୍ରାଭିସ୍ ହେଡ୍ ସର୍ବାଧିକ ୩୧ ରନ୍ କରିଥିବା ବେଳେ ମାଥ୍ୟୁ ଶର୍ଟ ୨୨ ଓ କ୍ୟାପ୍ଟେନ୍ ୱେଡ ୩୬ ରନ୍ କରିଥିଲେ। ଆଜିର ମ୍ୟାଚ୍ରେ ଭାରତ ଟସ୍ ହାରିବା ପରେ ପ୍ରଥମେ ବ୍ୟାଟିଂ କରି ୯ ଓ୍ବିକେଟ ହରାଇ ୧୭୪ ରନ୍ କରିଥିଲା। ଲକ୍ଷ୍ୟ ହାସଲ କରିବାକୁ ପଡ଼ିଆକୁ ଓହ୍ଲାଇଥିବା ଅଷ୍ଟ୍ରେଲିଆ ନିର୍ଦ୍ଧାରିତ ଓଭରରେ ୭ ଓ୍ବିକେଟ ହରାଇ ୧୫୪ ରନ୍ କରିଛି।
ଆଜିର ମ୍ୟାଚ୍ରେ ଆରମ୍ଭରୁ ଅଷ୍ଟ୍ରେଲିଆର ବ୍ୟାଟିଂ ଭଲ ଥିଲା। ଟ୍ରାଭିସ୍ ହେଡ୍ ଜବରଦସ୍ତ ଶର୍ଟ ଖେଳି ଦଳର ସ୍କୋରକୁ ବଢ଼ାଇ ନେଉଥିଲେ। କିନ୍ତୁ ୩.୧ ଓଭରରେ ଜସ୍ ଫିଲିପ୍ସ(୮ ବଲ୍ ୮ ରନ୍) ବେଳକୁ ଅଷ୍ଟ୍ରେଲିଆ ପ୍ରଥମ ୱିକେଟ୍ ହରାଇଥିଲା। ଏହାପରେ ୪.୪ ଓଭରେ ଟ୍ରାଭିସ୍ ହେଡ୍(୧୬ ବଲ୍ ୩୧ ରନ୍) ଆଉଟ୍ ହୋଇଥିଲେ। ପରେ ପରେ ଲଗାତର ଓ୍ବିକେଟ ହରାଇଥିଲା ଅଷ୍ଟ୍ରେଲିଅେ। ପରେ ଆରୋନ ହାର୍ଡି(୯ ବଲ୍ ୮ ରନ୍), ୧୧.୨ ଓଭରରେ ବ୍ୟାନ୍ ମାକ୍ଡରମୋଟ(୨୦ ବଲ ୧୯ ରନ୍), ଟିମ ଡାଭିଡ୍(୨୦ ବଲ୍ ୧୯ ରନ୍),ମାଥ୍ୟୁ ଶର୍ଟ(୧୯ ବଲ ୨୨ ରନ୍),ବେଲ ଦ୍ୱାରସୁଇସ(୨ ବଲ ୧ ରନ୍) କରି ଆଉଟ୍ ହୋଇଥିଲେ। ଶେଷ ପର୍ଯ୍ୟନ୍ତ କ୍ୟାପ୍ଟେନ୍ ୱେଡ୍ ଓ କ୍ରିସ୍ ଗ୍ରୀନ ବ୍ୟାଟିଂ ଜାରି ରଖିଥିଲେ। ହେଲେ ଦଳ ନିର୍ଦ୍ଧାରିତ ୨୦ ଓଭରରେ ୭ ୱିକେଟ୍ ହରାଇ କେବଳ ୧୫୪ ରନ୍ କରିବାରେ ସକ୍ଷମ ହୋଇଥିଲା।
ଭାରତର ବୋଲିଂ-
ଭାରତ ପକ୍ଷରୁ ବୋଲରଙ୍କର ମାପଚୁପ ବୋଲିଂ ଦଳକୁ ବିଜୟ ଦେଇଛି କହିଲେ ଅତ୍ୟୁକ୍ତି ହେବ ନାହିଁ। ଦଳ ପକ୍ଷରୁ ଅକ୍ଷର ପଟେଲ ସର୍ବାଧିକ ୩ଟି ଓ୍ବିକେଟ ନେଇଥିବା ବେଳେ ଦୀପକ ଚହର ଦୁଇଟି ଓ ଆଭେସ୍ ଖାନ୍ ଗୋଟିଏ ଓ୍ବିକେଟ ନେବାରେ ସଫଳ ହୋଇଥିଲେ। ତେବେ ଏହି ବିଜୟ ସହିତ ଭାରତ ସିରିଜ୍ କବ୍ଜା କରିଛି।