ପାଲ୍ଲିକଲ,୦୪/୦୯: ଏସିଆ କପ୍ ୨୦୨୩ର ଗ୍ରୁପ୍ ଏ ୫ମ ମ୍ୟାଚ୍ ନେପାଳ ସହିତ ଶ୍ରୀଲଙ୍କାର ପାଲେକେଲ୍ ଷ୍ଟାଡିୟମରେ ସୋମବାର ଖେଳାଯାଇଛି। ପ୍ରଥମେ ଟସ୍ ଜିତି ଭାରତ ବୋଲିଂ ନିଷ୍ପତ୍ତି ନେଇଥିଲା। ନେପାଳ ୪୮.୨ ଓଭରରେ ସମସ୍ତ ଓ୍ବିକେଟ ହରାଇଥିଲା। ପରେ ମଇଦାନକୁ ଓହ୍ଲାଇଥିଲା ଟିମ୍ ଇଣ୍ଡିଆ। ବର୍ଷାଯୋଗୁ ବାଧାପ୍ରାପ୍ତ ହୋଇଥିଲା ମ୍ୟାଚ୍। ତେବେ ପରେ ଓପନର ରୋହିତ ଶର୍ମା ଓ ଶୁଭମନ ଗିଲ୍ଙ୍କ ଦମଦାର ଅର୍ଦ୍ଧଶତକ ବଳରେ ଭାରତ ଗ୍ରୁପ ଏର ବର୍ଷା ବାଧାପ୍ରାପ୍ତ ଶେଷ ଲିଗ୍ ମ୍ୟାଚ୍ରେ ନେପାଳକୁ ଡକ ଓ୍ଵର୍ଥ ଲୁଇସ୍ ନିୟମ ଅନୁସାରେ ୧୦ ଓ୍ଵିକେଟ୍ରେ ପରାସ୍ତ କରିଛି।
ଡିଏଲଏସ ଅନୁସାରେ ଧାର୍ଯ୍ୟ ୧୪୫ ରନର ବିଜୟ ଲକ୍ଷ୍ୟକୁ ଭାରତ ୨୦.୧ ଓଭରରେ ବିନା ଓ୍ଵିକେଟ୍ ହରାଇ ହାସଲ କରି ନେଇଛି। ଅଧିନାୟକ ରୋହିତ ଶର୍ମା ୭୪ ରନ ଓ ଶୁଭମନ ଗିଲ୍ ୬୭ ରନର ଅପରାଜିତ ଇନିଂସ ଖେଳି ଦଳକୁ ସହଜ ବିଜୟ ଦେଇଛନ୍ତି। ମ୍ୟାଚ୍ ଜିତିବା ସହ ଗ୍ରୁପ ଏରୁ ପାକିସ୍ତାନ ପରେ ଭାରତ ସୁପର-୪ରେ ପ୍ରବେଶ କରିଛି। ନେପାଳ ପ୍ରଥମ ଦଳ ଭାବେ ଟୁର୍ଣ୍ଣାମେଣ୍ଟରୁ ବିଦାୟ ନେଇଛି। ପ୍ରଥମେ ବ୍ୟାଟିଂ କରି ନେପାଳ ୪୮.୨ ଓଭରରେ ୨୩୦ ରନରେ ଅଲଆଉଟ୍ ହୋଇଥିଲା। ଦଳ ପକ୍ଷରୁ ଆସିଫ ଶେଖ ସର୍ବାଧିକ ୫୮ ରନର ଇନିଂସ ଖେଳିଥିବା ବେଳେ ସୋମପାଲ୍ କମି ୪୮ ରନ କରିଥିଲେ।
