ନୂଆଦିଲ୍ଲୀ: ଜାପାନର ‘ସ୍ମାର୍ଟ ଲ୍ୟାଣ୍ଡର ଫର ଇନଭେଷ୍ଟିଗେସନ୍ ମୁନ୍’ (ଏସଏଲ୍ଆଇଏମ୍)ର ଲ୍ୟାଣ୍ଡର ଚନ୍ଦ୍ରପୃଷ୍ଠରେ ଜାନୁଆରୀ ୨୦ରେ ଲ୍ୟାଣ୍ଡ ହୋଇଛି । ଏନେଇ ଜାପାନର ସ୍ପେଶ୍ ଏଜେନ୍ସି ‘ଜାପାନ ଏରୋସ୍ପେଶ ଏକ୍ସପ୍ଲୋରେସନ୍ ଏଜେନ୍ସି’ (JAXA) ସୂଚନା ଦେଇଛି । ଲ୍ୟାଣ୍ଡର ପାଇଁ ଯେଉଁ ସ୍ଥାନ ନିରୂପଣ ହୋଇଥିଲା ଏହାର ୫୫ ମିଟର ପୂର୍ବରେ ଲ୍ୟାଣ୍ଡର ଲ୍ୟାଣ୍ଡ କରିଛି । ତେବେ ଜାପାନର ଏହି ମୁନ ମିଶନରେ ଭାରତର ଯୋଗଦାନ ରହିଛି ।
ଭାରତ ଏକ ଚନ୍ଦ୍ର ମିଶନ ମାଧ୍ୟମରେ ଜାପାନର ଲ୍ୟାଣ୍ଡର ଚନ୍ଦ୍ରପୃଷ୍ଠରେ ଲ୍ୟାଣ୍ଡ କରିପାରିଛି । ଏସଏଲ୍ଆଇଏମ୍ ଲ୍ୟାଣ୍ଡରକୁ ଚନ୍ଦ୍ରପୃଷ୍ଠ ପଠାଇବାରେ ଭାରତର ଦ୍ବିତୀୟ ମୁନ୍ ମିଶନ୍ ବା ଚନ୍ଦ୍ରଯାନ-୨ ସହାୟତା କରିଛି । ହେଲେ ଏହି ମିଶନ ପ୍ରାୟତଃ ବିଫଳ ହୋଇଥିଲା ବୋଲି କୁହାଯାଏ । ତଥାପି ଚନ୍ଦ୍ରଯାନ-୨ର ଅର୍ବିଟର ଭାରତ ଏବଂ ଅନ୍ୟ ଦେଶର ଲ୍ୟାଣ୍ଡରକୁ ସହାୟତା କରୁଛି । ଜାକ୍ସା ପକ୍ଷରୁ ଜାରି ଏକ ବିଜ୍ଞପ୍ତିରେ କୁହାଯାଇଛି ଯେ, ଭାରତର ଚନ୍ଦ୍ରଯାନ-୨ ଚନ୍ଦ୍ରର ଟପୋଗ୍ରାଫିକୁ ରେକର୍ଟ କରିଛି । ଏହା ସହ ସ୍ଲିମ୍ ଲ୍ୟାଣ୍ଡରର ନେଭିଗେସନ କ୍ୟାମେରା ସାହାଯ୍ୟରେ ଫଟୋ ଉତ୍ତୋଳନ କରିଛି ।
ଏହି ଫଟୋ ସାହଯ୍ୟରେ ଅବତରଣ ସମ୍ଭବ ହୋଇପାରିଲା ବୋଲି ଜାକ୍ସା ପକ୍ଷରୁ କୁହାଯାଇଛି । ସେପଟେ ଭାରତର ସ୍ପେଶ ଏଜେନ୍ସି ଇସ୍ରୋ ଅନୁସାରେ, ଜନ୍ଦ୍ରଯାନ-୨ ଯଦିଓ ନିଜର ମୂଳ ଲକ୍ଷ୍ୟ ହାସଲ କରିପାରି ନାହିଁ । ହେଲେ ଏହାର ଅର୍ବିଟର ଏବେ ବି ଚନ୍ଦ୍ର ସଂପର୍କରେ ବହୁ ଗୁରୁତ୍ବପୂର୍ଣ୍ଣ ତଥ୍ୟ ପ୍ରଦାନ କରୁଛି । ଏପରିକି ଚନ୍ଦ୍ରଯାନ-୩ ମିଶନ୍ର ସଫଳତା ଲାଗି ଚନ୍ଦ୍ରଯାନ-୨ର ଅର୍ବିଟର ଅନେକ ସହାୟତା କରିଥିଲା । ଚନ୍ଦ୍ରଯାନ-୩ର ସଫଳ ଲ୍ୟାଣ୍ଡିଂ ଯୋଜନା ପ୍ରସ୍ତୁତ କଲା ବେଳେ ଚନ୍ଦ୍ରଯାନ-୨ ଅର୍ବିଟର ପଠାଇଥିବା ଫଟୋର ବିଶ୍ଳେଷଣ କରାଯାଇଥିଲା ବୋଲି ଇସ୍ରୋ ମୁଖ୍ୟ ଏସ୍ ସୋମନାଥ କହିଥିଲେ ।