ଭୋପାଳ: ମଧ୍ୟପ୍ରଦେଶରେ କଂଗ୍ରେସର ପରାଜୟ ପରେ ସଭାପତି ପଦରୁ ଇସ୍ତଫା ଦେଇଛନ୍ତି ବରିଷ୍ଠ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ କମଲନାଥ । ମଙ୍ଗଳବାର ଦିନ କଂଗ୍ରେସର ରାଷ୍ଟ୍ରୀୟ ସଭାପତି ମଲ୍ଲିକାର୍ଜୁନ ଖଡ଼ଗେଙ୍ଗୁ ଦିଲ୍ଲୀରେ ସାକ୍ଷାତ କରିବା ପରେ ଆଜି କମଲନାଥ ପିସିସି ସଭାପତି ପଦରୁ ଇସ୍ତଫା ଦେଇଛନ୍ତି । ଏହା ପରେ ଦଳର ଶୀର୍ଷ ନେତୃତ୍ବ ମଧ୍ୟପ୍ରଦେଶ ଲାଗି କଂଗ୍ରେସ ସଭାପତି ନିଯୁକ୍ତ କରିବେ । ବିଜେପି ପାଖରୁ କଂଗ୍ରେସର ପରାଜୟ ପରେ କମଲନାଥ ସଭାପତି ପଦ ଛାଡ଼ିଛନ୍ତି । 

ସେପଟେ ନ୍ୟୁଜ ଏଜେନ୍ସି ଏଏନଆଇ ଅନୁସାରେ, ରାଜ୍ୟରେ ନୂଆ କଂଗ୍ରେସ ସଭାପତି ନିଯୁକ୍ତି ପାଇଁ କମଲନାଥଙ୍କୁ ଦିଲ୍ଲୀରୁ ନିର୍ଦ୍ଦେଶ ମିଳିଛି । ଏହା ବ୍ୟତୀତ ବିରୋଧୀ ମେଣ୍ଟ ‘ଇଣ୍ଡିଆ’ର ବହୁ ନେତାଙ୍କ ବିରୋଧରେ କମଲନାଥଙ୍କ ମନ୍ତବ୍ୟକୁ ନେଇ କଂଗ୍ରେସର ଶୀର୍ଷ ନେତୃତ୍ବ ଅସନ୍ତୁଷ୍ଟ ଥିବା ନେଇ କୁହାଯାଉଛି । ଆସନ ଭାଗବଣ୍ଟାକୁ କେନ୍ଦ୍ର କରି ଏସପି ମୁଖ୍ୟ ଅଖିଳେଶ ଯାଦବ ଏବଂ ଜେଡିୟୁ ସୁପ୍ରିମୋ ନୀତିଶ କୁମାରଙ୍କ ସମେତ ଅନ୍ୟ ନେତାଙ୍କ ବିରୋଧରେ ମନ୍ତବ୍ୟ ଦେଇ ଚର୍ଚ୍ଚାକୁ ଆସିଥିଲେ କମଲନାଥ । 

ତେବେ ଡିସେମ୍ବର ୩ରେ ନିର୍ବାଚନ ଫଳାଫଳ ଘୋଷଣା ହେବା ପରେ କଂଗ୍ରେସ ଶିବିରରେ ନିରବତା ଖେଳିଯାଇଛି । ୨୩୦ ବିଧାନସଭା ଆସନରୁ ବିଜେପି ଖାତାକୁ ୧୬୩ ସିଟ୍‌ ଯାଇଥିବା ବେଳେ କଂଗ୍ରେସ ମାତ୍ର ୬୬ ଆସନରେ ସନ୍ତୁଷ୍ଟ ହୋଇଛି । ନିର୍ବାଚନରେ ପରାଜୟ ପରେ ଦଳୀୟ ନେତାଙ୍କୁ ମନ ଦୁଃଖ ନକରିବାକୁ ପରାମର୍ଶ ଦେଇଥିଲେ କମଲନାଥ । ଏହା ବ୍ୟତୀତ ଆଗାମୀ ଲୋକସଭା ନିର୍ବାଚନ ଲାଗି ପ୍ରସ୍ତୁତ ହେବାକୁ ସେ ଆହ୍ବାନ ଦେଇଥିଲେ । ଏହା ସହ ୧୯୭୭ ମସିହା ଲୋକସଭା ନିର୍ବାଚନରେ କିଭଳି କଂଗ୍ରେସକୁ ପରାଜୟର ସାମ୍ନା କରିବାକୁ ପଡ଼ିଥିଲା ଏବଂ ପରବର୍ତ୍ତୀ ସମୟରେ କିଭଳି କଂଗ୍ରେସ ପୁଣି ଥରେ କମବ୍ୟାକ୍‌ କରିଥିଲା ସେ ସଂପର୍କରେ ଦଳୀୟ କର୍ମକର୍ତ୍ତାଙ୍କୁ ବୁଝାଇଥିଲେ କମଲନାଥ ।