ବ୍ରହ୍ମପୁର,୦୧/୦୩: ଭାବ ବିନିମୟ ପାଇଁ କହିବାଶୁଣିବା ଅପରିହାର୍ଯ୍ୟ ନୁହେଁ । ନିରବତାରେ ହୋଇପାରେ ଭାବର ବିନିମୟ, ମନ ଓ ହୃଦୟର ଆଦାନପ୍ରଦାନ । ମା’ କାଳୁଆଙ୍କୁ ସାକ୍ଷୀ ରଖି ଏମିତି ଏକ ସମ୍ପର୍କକୁ ଆଗେଇ ନେଇଛନ୍ତି ଓ ନୂଆ ଜୀବନ ଆରମ୍ଭ କରିଛନ୍ତି ନବଦମ୍ପତି । ମନ୍ଦିରରେ କୋଳାହଳ ଲାଗିଥିଲା । ଜମିଥିଲା ବନ୍ଧୁବାନ୍ଧବଙ୍କ ଭିଡ଼ । ବେଦୀରେ ନବଦମ୍ପତିଙ୍କ ଉପସ୍ଥିତିରେ ପୁରୋହିତ କରୁଥିଲେ ମନ୍ତ୍ରୋଚାରଣ । ସବୁ ଦେଖୁଥିଲେ ଉଭୟ । ହେଲେ, କିଛି ଶୁଣି ପାରୁନଥିଲେ କି କହିପାରୁନଥିଲେ । ପରସ୍ପରର ଭାବକୁ ବୁଝି, ମନର ଭାଷାକୁ ପଢ଼ି ସଂସାର ଗଢ଼ିବାକୁ ସଜେଇ ହୋଇ ବେଦୀରେ ବସିଥିଲେ ବର-କନ୍ୟା ।
ବ୍ରହ୍ମପୁର ସହର ଗୋସାଇଁନୂଆଗାଁ ମା’ କାଳୁଆଙ୍କ ମନ୍ଦିରରେ ଗୁରୁବାର ଏମିତି ଏକ ନିଆରା ବିବାହ ଅନୁଷ୍ଠିତ ହୋଇଯାଇଛି । ଯେଉଁଠି ଦିବ୍ୟାଙ୍ଗ ଲକ୍ଷ୍ମୀକାନ୍ତ ଓ ମମତାଙ୍କ ଦୁଇମନ ଏକ ହୋଇଛି । ସମାଜ ପାଇଁ ଏହା ଆଦର୍ଶ ବିବାହର ଉଦାହରଣ ସୃଷ୍ଟି କରିଛି । ବ୍ରହ୍ମପୁର ବିଜିପୁର ଅଞ୍ଚଳର ସତ୍ୟନାରାୟଣ ଓ ସାଧନା ପଣ୍ଡାଙ୍କ ପୁଅ ଲକ୍ଷ୍ମୀକାନ୍ତ । ପିଲାବେଳୁ ଲକ୍ଷ୍ମୀକାନ୍ତ ବାକ୍ ଓ ଶ୍ରବଣ ଶକ୍ତି ହରାଇଛନ୍ତି । ସ୍ନାତକ ଶିକ୍ଷା ହାସଲ କରି ଏକ ମଲ୍ରେ କାର୍ଯ୍ୟ କରୁଛନ୍ତି । ଲକ୍ଷ୍ମୀକାନ୍ତ ଝାରସୁଗୁଡ଼ା ଦୀପୁପଡ଼ାର ମହେନ୍ଦ୍ର ଓ ଗୌରୀ ଗୋରେଖ୍ଗୌଡ଼ଙ୍କ ଝିଅ ମମତାଙ୍କୁ ବିବାହ କରିଛନ୍ତି । ହେଲେ ଉଭୟଙ୍କ ସମ୍ପର୍କ ୫ ବର୍ଷ ପୁରୁଣା । ପ୍ରେମର ଭିତ୍ତି ପଡ଼ିଥିଲା ପାଞ୍ଚ ବର୍ଷ ପୂର୍ବରୁ ।
ଭୁବନେଶ୍ୱର ଉପକଣ୍ଠ ଏକ ଘରୋଇ ଶିକ୍ଷାନୁଷ୍ଠାନରେ ଲକ୍ଷ୍ମୀକାନ୍ତ ପାଠ ପଢ଼ୁଥିଲେ । ସେହି ସମୟରେ ମମତା ଧନ୍ଦାମୂଳକ ଶିକ୍ଷା ତାଲିମ୍ ପାଇଁ ସେହି ଶିକ୍ଷାନୁଷ୍ଠାନରେ ପହଞ୍ଚିଥିଲେ । ସେଠାରେ ଦେଖା, ସାକ୍ଷାତ ଓ ଭାବ ବିନିମୟରେ ଉଭୟଙ୍କ ଭିତରେ ସୃଷ୍ଟି ହୋଇଥିଲା ପ୍ରେମ ସମ୍ପର୍କ । ଠାର ଠାରରେ ହୋଇଥିଲା ମନ ଦିଆନିଆ । ସେହି ପବିତ୍ର ସମ୍ପର୍କକୁ ଆଜୀବନ ଆଗେଇ ନେବାକୁ ପଣ କରିଥିଲେ ଉଭୟ । ଗୁରୁବାର ଲକ୍ଷ୍ମୀକାନ୍ତ-ମମତାଙ୍କ ପ୍ରେମ ସଫଳ ହୋଇଛି ଏବଂ ଉଭୟେ ସାଜିଛନ୍ତି ଦମ୍ପତି । ବର ବେଶରେ ସଜେଇ ହୋଇ ଝାରସୁଗୁଡ଼ାରୁ ଆସି ପହଞ୍ଚିଥିଲେ ଲକ୍ଷ୍ମୀକାନ୍ତ । ମନର ମଣିଷକୁ ବ୍ରହ୍ମପୁରରେ ଅପେକ୍ଷା କରିଥିଲେ ମମତା । ଦୁହେଁ ଦୁହିଁଙ୍କ ମନକୁ ପଢ଼ି ସଂସାର ଗଢ଼ିବେ ବୋଲି ଆଶା ରଖିଛନ୍ତି ପରିବାର ଲୋକ ।
