କଟକ,୨୧/୧୧: ମାହାଙ୍ଗା  ଡବଲ୍‌ ମର୍ଡର ମାମଲାର ପରବର୍ତ୍ତୀ ଶୁଣାଣି ଡିସେମ୍ବର ୨୬ ତାରିଖରେ ହେବ ବୋଲି ସାଲେପୁର ଜେଏମ୍‌ଏଫସିଙ୍କ ଅଦାଲତ ଧାର୍ଯ୍ୟ  କରିଛନ୍ତି । ଏହି ମାମଲାରେ ମହଲତ ଲୋଡି ବିଧାୟକ ପ୍ରତାପ ଜେନା ଦାଏର କରିଥିବା ଟାଇମ୍‌ ପିଟିସନ୍‌ ଉପରେ ସେହିଦିନ ଶୁଣାଣି ହେବ ବୋଲି ଅଦାଲତ ନିର୍ଦ୍ଦେଶ ଦେଇଛନ୍ତି ।  

ବିଧାୟକ ଶ୍ରୀ ଜେନାଙ୍କୁ ଗତ  ଅକ୍ଟୋବର ୩୧ରେ ଅଦାଲତରେ  ହାଜର ହେବାକୁ ସାଲେପୁର  ଜେଏମ୍‌ଏଫସିଙ୍କ ଅଦାଲତ  ନିର୍ଦ୍ଦେଶ ଦେଇଥିଲେ । ସ୍ୱାସ୍ଥ୍ୟଗତ  ସମସ୍ୟା କାରଣରୁ ସେ ବ୍ୟକ୍ତିଗତ  ହାଜିରାରୁ ଛାଡ଼୍‌ ପାଇଁ ଅଦାଲତରେ  ଏକ ପିଟିସନ୍‌ ରୁଜୁ କରିଥିଲେ ।  ଏଥିସହ ସିଆରପିସିର ଧାରା ୨୦୫  (ଆଇନଜୀବୀଙ୍କ ଜରିଆରେ ହାଜର  ପାଇଁ ପ୍ରାର୍ଥନା)ରେ ଶୁଣାଣି ପାଇଁ ସେ  ପ୍ରାର୍ଥନା କରିଥିଲେ । 

ଅପରପକ୍ଷରେ  ଆବେଦନକାରୀ ରଞ୍ଜିତ ବରାଳ ଏହାକୁ  ବିରୋଧ କରି ଆଉ ଏକ ପିଟିସନ୍‌ ରୁଜୁ  କରିଥିଲେ । ଶ୍ରୀ ଜେନା ଏକ ଟାଇମ୍‌ ପିଟିସନ୍‌ ମଧ୍ୟ ରୁଜୁ କରିଥିଲେ ।  ଏହି ମାମଲାରେ ରାୟ ପ୍ରକାଶ କରି  ଅଦାଲତ କହିଛନ୍ତି, ଅଭିଯୁକ୍ତ ଶ୍ରୀ  ଜେନାଙ୍କ ପକ୍ଷରୁ ହାଇକୋର୍ଟର ଆଦେଶ  ସଂକ୍ରାନ୍ତ କପିକୁ ଦାଖଲ କରାଯାଇଥିଲା ।  ତେଣୁ ଏହି ମାମଲାରେ ତାଙ୍କ ପକ୍ଷ  ରଖିବା ଲାଗି ସମୟ ଦେବାକୁ ପ୍ରାର୍ଥନା କରିଥିଲେ। ଏହି ଆବେଦନ ଉପରେ  ଡିସେମ୍ବର ୧୯ ତାରିଖ ପରେ ଜବାବ  ରଖିବା ଲାଗି ଅନୁମତି ଦେବାକୁ  କୁହାଯାଇଥିଲା । ଏହାକୁ ଗ୍ରହଣ କରି  ଅଦାଲତ ଟାଇମ୍‌ ପିଟିସନ୍‌ ଉପରେ  ଶୁଣାଣି ପାଇଁ ଅନୁମତି ଦେଇଛନ୍ତି ।