ପୁରୀ,୨୯/୦୧: ଝଗଡ଼ାରେ ହସ୍ତକ୍ଷେପ କରି ମଧ୍ୟସ୍ଥି ସାଜିବା ପଡ଼ିଲା ମହଙ୍ଗା । ଶନିବାର ଏକ ମାରପିଟ୍ରେ ୨ ଜଣ ଯୁବକ ମଧ୍ୟସ୍ଥତା କରିବାରୁ ସେମାନଙ୍କୁ ଭଙ୍ଗା କାଚ ଭୁସି ହତ୍ୟା ଉଦ୍ୟମ କରାଯାଇଛି । ଆକ୍ରମଣର ଶିକାର ୨ ଯୁବକ ହେଲେ ବାସେଳିସାହି ଥାନା ଅଧୀନ ତ୍ରିଦେବ ନଗର ବଡ଼ପୋଖରୀଆ ଜାଗା ନିକଟର ସୋମନାଥ ଦାସ(୨୩) ଓ ତାଙ୍କ ସାଙ୍ଗ ସନ୍ତୋଷ ବେହେରା(୨୦) । ଉଭୟଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ପ୍ରାଥମିକ ଚିକିତ୍ସା କରାଯିବା ପରେ ସନ୍ତୋଷଙ୍କୁ ସଙ୍କଟାପନ୍ନ ଅବସ୍ଥାରେ କଟକସ୍ଥିତ ଏସ୍ସିବି ମେଡିକାଲ୍କୁ ସ୍ଥାନାନ୍ତର କରାଯାଇଛି । ଏନେଇ ହତ୍ୟା ଉଦ୍ୟମ ମାମଲା ରୁଜୁ କରି ବାସେଳିସାହି ଥାନା ପୁଲିସ ଅଭିଯୁକ୍ତ ତ୍ରିଦେବନଗରର ରାଜେଶ ସାହୁ ଓରଫ ରାଜେନ୍ଦ୍ର ଓରଫ ରାଜା(୨୮)କୁ ଗିରଫ କରିଛି ।
ଅଭିଯୋଗ ଅନୁସାରେ, ଅପରାହ୍ନ ୩ଟା ୪୫ରେ ସୋମନାଥ ଓ ସନ୍ତୋଷ ବାଲିସ୍କୁଲ୍ସ୍ଥିତ ଝାଟି ଜାଗା ନିକଟ ଦେଇ ଅତିକ୍ରମ କରୁଥିଲେ । ସେଠାରେ ରାଜା ଓ ଅନ୍ୟ ଜଣେ ଯୁବକ ମାର୍ପିଟ୍ ହେଉଥିଲେ । ୨ ସାଙ୍ଗ ସେଠାରେ ପହଞ୍ଚି ଉଭୟଙ୍କୁ ବୁଝାଶୁଝା କରିଥିଲେ । ଝଗଡ଼ା ନକରି ଯେ ଯାହା ବାଟରେ ଚାଲିଯିବାକୁ କହିଥିଲେ । ଏହାପରେ ଉଭୟ ଟାର୍ଗେଟ୍କୁ ଆସିଥିଲେ । ରାଜା ଏକ ଭଙ୍ଗା କାଚରେ ୨ ଜଣଙ୍କୁ ଅତର୍କିତ ଭାବେ ଆକ୍ରମଣ କରିଥିଲା । ସୋମନାଥଙ୍କ ବେକମୁଣ୍ଡ ଓ ପେଟ ଏବଂ ସନ୍ତୋଷଙ୍କ ପେଟପାଶ୍ୱର୍କୁ ଭଙ୍ଗା କାଚରେ ସେ ଭୁସି ଦେଇଥିଲା ।
ଏଥିରେ ଉଭୟ ରକ୍ତାକ୍ତ ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ । ସେଠାରେ ସୋମନାଥ ଚିକିତ୍ସା ହେଉଥିବା ବେଳେ ସନ୍ତୋଷଙ୍କୁ କଟକ ସ୍ଥାନାନ୍ତର କରାଯାଇଛି । ଏନେଇ ସୋମନାଥଙ୍କ ମା’ ଜ୍ୟୋତ୍ସ୍ନା ଦାସ ବାସେଳିସାହି ଥାନାରେ ଏତଲା ଦେଇଥିଲେ । ପୁଲିସ ଏହି ଏତଲାକୁ ଭିତ୍ତି କରି ହତ୍ୟା ଉଦ୍ୟମ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ରାଜାକୁ ଗିରଫ କରିବା ପରେ ରବିବାର ତାକୁ କୋର୍ଟ ଚାଲାଣ କରାଯାଇଛି । ଜାମିନ୍ ନାମଞ୍ଜୁର ହେବା ପରେ ତାକୁ ଜେଲ୍ ପଠାଇ ଦିଆଯାଇଥିବା ପୁଲିସ କହିଛି ।
