କଟକ ୧୧/୦୨: ଟିମ୍ ଇଣ୍ଡିଆର ପୂର୍ବତନ କୋଚ୍ ରବି ଶାସ୍ତ୍ରୀ କଟକରେ ଏକ କ୍ରିକେଟ ଏକାଡେମୀ ଖୋଲିବାକୁ ଯୋଜନା କରୁଛନ୍ତି । ଆଠଗଡ଼ କପୁରସିଂହ ଠାରେ ପ୍ରତିଷ୍ଠା ହୋଇଥିବା ଏମ୍ଜିଏମ୍ ସ୍କୁଲ୍ ଅଫ୍ ସ୍ପୋର୍ଟ୍ସ ତଥା କ୍ରିକେଟ ଉତ୍କର୍ଷ କେନ୍ଦ୍ର ଠାରେ ଏହି ଏକାଡେମୀ ପରିଚାଳିତ ହେବ । ଆସନ୍ତା ମାର୍ଚ୍ଚରେ ଏମ୍ଜିଏମ୍ ସହ ଶାସ୍ତ୍ରୀଙ୍କ କ୍ରିକେଟ୍ ଏକାଡେମୀ ଏଜେନ୍ସି ‘କୋଚିଂ ବିୟଣ୍ଡ୍’ ଚୁକ୍ତିପତ୍ର ସ୍ୱାକ୍ଷରିତ କରିବ। ଏଠାରେ ଆବାସିକ ସୁବିଧା ପାଇଁ ଖେଳାଳିମାନେ କ୍ରିକେଟରେ ଭବିଷ୍ୟତ ଗଢିବାକୁ ସୁଯୋଗ ପାଇବେ । ପୂର୍ବ ଭାରତର ଏହା ହେବ ସର୍ବବୃହତ୍ କ୍ରିକେଟ ଏକାଡେମୀ ।
ପ୍ରାୟ ୩୦ଏକର ପରିମିତ ଜମିରେ ସ୍ଥାପନ କରାଯାଉଥିବା ଏମ୍ଜିଏମ୍ ସ୍କୁଲ୍ ଅଫ୍ ସ୍ପୋର୍ଟ୍ସ କେନ୍ଦ୍ର ଗତବର୍ଷ ଫେବ୍ରୁଆରୀ ୧୫ ତାରିଖରେ ଲୋକାର୍ପଣ ହୋଇଥିଲା । ଅନ୍ତର୍ଜାତୀୟ କ୍ରିକେଟର ସୁରେଶ ରାଇନା ଓ ପ୍ରଜ୍ଞାନ ଓଝା ଯୋଗଦେଇ ଏହାର ଉଦ୍ଘାଟନ କରିଥିଲେ । ଯଦିଓ କ୍ରିକେଟ ଫିଲ୍ଡ ପ୍ରସ୍ତୁତ ହୋଇସାରିଥିଲା କିନ୍ତୁ ଏହାର ପାରିପାଶ୍ୱିର୍କ କାମ ଶେଷ ହୋଇନଥିଲା । ବର୍ଷକ ମଧ୍ୟରେ ଏମ୍ଜିଏମ୍ ପକ୍ଷରୁ କେନ୍ଦ୍ରର ବହୁ କାର୍ଯ୍ୟ ଶେଷ ହୋଇଛି । ଇତିମଧ୍ୟରେ ଶାସ୍ତ୍ରୀଙ୍କ କ୍ରିକେଟ୍ ଏକାଡ଼େମୀ ‘କୋଚିଂ ବିୟଣ୍ଡ୍’ ଖୋଲିବାକୁ ପ୍ରକ୍ରିୟା ଆରମ୍ଭ ହୋଇଛି । ଆସନ୍ତା ମାର୍ଚ୍ଚ ୨୦ରେ ଶାସ୍ତ୍ରୀଙ୍କ ସହ ଚୁକ୍ତିପତ୍ର ସ୍ୱାକ୍ଷରିତ କରିବାକୁ ଲକ୍ଷ୍ୟ ରଖାଯାଇଛି ବୋଲି ଏମ୍ଜିଏମ୍ ମୁଖ୍ୟ ପଙ୍କଜଲୋଚନ ମହାନ୍ତି ସୂଚନା ଦେଇଛନ୍ତି ।
ଏହି ଏକାଡେମୀରେ ୧୬ ରୁ ୨୦ବର୍ଷ ବୟସର ପ୍ରତିଭାଙ୍କୁ ରଖି କ୍ରିକେଟ ପ୍ରଶିକ୍ଷଣ ଦିଆଯିବ । ଏଠାରେ ୨୦ଟି ଅଭ୍ୟାସ ପିଚ୍ ରହିଛି । ଚୟନ ପ୍ରକ୍ରିୟା ଜରିଆରେ ଶ୍ରେଷ୍ଠ ପ୍ରତିଭାଙ୍କୁ ଚୟନ କରାଯିବ ଏବଂ ସେମାନଙ୍କୁ ଏକାଡେମୀରେ ରଖି କ୍ରିକେଟ ଦକ୍ଷତା ବୃଦ୍ଧି କରାଯିବ । ଓଡ଼ିଆ ଖେଳାଳିଙ୍କ ସମେତ ରାଜ୍ୟ ବାହାରୁ କିଛି ଖେଳାଳି ମଧ୍ୟ ପ୍ରଶିକ୍ଷଣ ନେବେ । ଆର୍. ଶ୍ରୀଧର, ଡ.କିଞ୍ଚନ ସୁରତୱାଲାଙ୍କ ଭଳି ଭାରତୀୟ ଦଳର କୋଚିଂ ଷ୍ଟାଫ୍ ଏଥିରେ ଅନ୍ତର୍ଭୁକ୍ତ ରହିବେ । ଶାସ୍ତ୍ରୀ ନିଜେ କଟକ ଆସି ପରିଚାଳନା ତଦାରଖ କରିବେ ବୋଲି ଜଣାପଡିଛି ।
ଶ୍ରୀ ମହାନ୍ତି କହିଛନ୍ତି, ଓଡ଼ିଶା କ୍ରିକେଟ ଆସୋସିଏସନ୍ର ପୂର୍ବତନ ସମ୍ପାଦକ ଆଶୀର୍ବାଦ ବେହେରା ଓ ବର୍ତ୍ତମାନର ସମ୍ପାଦକ ସଞ୍ଜୟ ବେହେରାଙ୍କ ମାର୍ଗଦର୍ଶନରେ ଏମ୍ଜିଏମ୍ କ୍ରିକେଟ୍ ପ୍ରତିଭା ବିକାଶ ଦିଗରେ ଗୁରୁତ୍ୱ ଦେଇଛି । ଏହି ଏକାଡେମୀ କାର୍ଯ୍ୟକାରୀ ହେଲେ ପୂର୍ବଭାରତର ସର୍ବବୃହତ୍ ଏକାଡ଼େମୀ ଭାବେ ପ୍ରତିଷ୍ଠା ହେବ । ରାଜ୍ୟ ସରକାରଙ୍କ ସହ ଆଲୋଚନା କରାଯାଉଛି । ଖୁବ୍ ଶୀଘ୍ର ଚୁକ୍ତିପତ୍ର ସ୍ୱାକ୍ଷରିତ କରିବୁ ବୋଲି ସେ ପ୍ରକାଶ କରିଛନ୍ତି ।
