ହାଇଦ୍ରାବାଦ, ୦୭/୧୨: ୪ ଦିନର ଟଣାଓଟରା ପରେ ଶେଷରେ ଗୁରୁବାର ତେଲଙ୍ଗାନା ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ରେବନ୍ତ ରେଡ୍ଡୀ । ହାଇଦ୍ରାବାଦର ଏଲଭି ଷ୍ଟାଡିୟମରେ ଆୟୋଜିତ ହୋଇଛି ଶପଥ ଗ୍ରହଣ ସମାରୋହ । ଲକ୍ଷ ଲକ୍ଷ ଲୋକଙ୍କ ଉପସ୍ଥିତିରେ ରାଜ୍ୟପାଳ ତମିଲିସାଈ ସୁନ୍ଦରରାଜନ ରେବନ୍ତ ରେଡ୍ଡୀଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି ।
ରେବନ୍ତ ରେଡ୍ଡୀଙ୍କ ସହ ମଲ୍ଲୁ ଭଟ୍ଟି ଭିକ୍ରମାର୍କ ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି । ରେବନ୍ତଙ୍କ ସହ ୧୦ ଜଣ ମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି । ନଲମଦା ଉତ୍ତମ କୁମାର ରେଡ୍ଡୀ, ସି. ଦାମୋଦର ରାଜନରସିହ୍ମା, କୋମାଟିରେଡ୍ଡୀ ଭେଙ୍କଟ, ଡୁଡିଲ୍ଲା ଶ୍ରୀଧର ବାବୁ, ପୋଙ୍ଗୁଲେବ ଶ୍ରୀନିବାସ ରେଡ୍ଡୀ, ପୋନ୍ନମ ପ୍ରଭାକର, ସୋଟ କୋଣ୍ଡା ସୁରେଖା, ଡି. ଅନସୂୟା ସୀତାକ୍କା, ତୁମ୍ମଲା ନାଗେଶ୍ୱର ରାଓ, କୃଷ୍ଣା ରାଓ ଓ ଗଦ୍ଦାମ ପ୍ରସାଦ କୁମାର କ୍ୟାବିନେଟ୍ ମନ୍ତ୍ରୀ ଭାବେ ଶପଥ ନେଇଛନ୍ତି ।
ଆୟୋଜିତ ଶପଥ ଗ୍ରହଣ ସମାରୋହରେ କଂଗ୍ରେସର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ, ସୋନିଆ ଗାନ୍ଧୀ, ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ସାମିଲ୍ ହୋଇଥିଲେ । ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ସୁଖବିନ୍ଦର ସିଂହ ସୁଖୁ, କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା ଓ ଉପମୁଖ୍ୟମନ୍ତ୍ରୀ ଡିକେ ଶିବ କୁମାର ଉପସ୍ଥିତ ଥିଲେ ।
ତେଲଙ୍ଗାନା ବିଧାନସଭାର କ୍ଷମତା ଅନୁସାରେ, ତେଲଙ୍ଗାନାରେ ମୁଖ୍ୟମନ୍ତ୍ରୀଙ୍କୁ ମିଶାଇ ୧୮ ଜଣ ମନ୍ତ୍ରୀ ହୋଇ ପାରିବେ । ଆନ୍ଧ୍ରରୁ ବିଚ୍ଛେଦ ହୋଇ ତେଲଙ୍ଗାନା ତେଲଙ୍ଗାନା ସ୍ୱତନ୍ତ୍ର ରାଜ୍ୟ ହେବା ପରେ କେସିଆରଙ୍କ ବିଆରଏସ୍ କ୍ଷମତାରେ ରହିଥିଲା । ଏବେ ବିଆରଏସକୁ କ୍ଷମତାଚ୍ୟୁତ୍ କରି କଂଗ୍ରେସ କ୍ଷମତା ହାତେଇଛି ।