ନୂଆଦିଲ୍ଲୀ: ବିଶାଖାପାଟନମ୍ ଟେଷ୍ଟରେ ଇଂଲଣ୍ଡକୁ ୧୦୬ ରନ୍ରେ ପରାସ୍ତ କରିଛି ଭାରତୀୟ ଟିମ୍ । ଭାରତର ଏହି ବିଶାଳ ବିଜୟ ସହ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍କୁ ୧-୧ରେ ବରାବର କରିଛି । ରୋହିତ ଶର୍ମାଙ୍କ ଅଧିନାୟିକତ୍ବରେ ଖେଳାଯାଇଥିବା ୧୩ଟି ଟେଷ୍ଟରୁ ଏହା ସପ୍ତମ ବିଜୟ । ସେପଟେ ଇଂଲଣ୍ଡ ବିପକ୍ଷରେ ଏହି ବିଜୟ ସହ ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନୀଙ୍କୁ ପଛରେ ପକାଇ ଦେଇଛନ୍ତି ରୋହିତ ଶର୍ମା । ଭାରତୀୟ ଟିମ୍ ବିଜୟୀ ହୋଇଥିବା ୨୯୫ ମ୍ୟାଚ୍ରେ ଧୋନୀ ସାମିଲ ଥିଲେ । ଇଂଲଣ୍ଡ ବିପକ୍ଷରେ ମ୍ୟାଚ୍ ବିଜୟୀ ସହ ୨୯୬ଟି ବିଜୟୀ ମ୍ୟାଚ୍ରେ ଭାଗିଦାରୀ ହୋଇଛନ୍ତି ରୋହିତ ଶର୍ମା ।
ସେପଟେ ବିରାଟ କୋହଲି ସର୍ବାଧିକ ୩୧୩ ବିଜୟୀ ମ୍ୟାଚ୍ରେ ଟିମ୍ରେ ସାମିଲ ଅଛନ୍ତି । ଅଧିନାୟକ ଭାବେ ରୋହିତଙ୍କ ଟେଷ୍ଟ କ୍ୟାରିୟର ଦେଖିଲେ ୫୪ ପ୍ରତିଶତ ମ୍ୟାଚ୍ ଜିତିଛନ୍ତି । ଓ୍ବାର୍ଲଡ୍ ଟେଷ୍ଟ ଚାମ୍ପିୟନସିପରେ ତାଙ୍କର ବିଜୟ ହାର ୫୦ ପ୍ରତିଶତ ରହିଥିଲା । ଅଧିନାୟକ ଭାବରେ ରୋହିତ ଭଲ ପ୍ରଦର୍ଶନ କରୁଛନ୍ତି । ହେଲେ ବ୍ୟାଟର ହିସାବରେ ଗତ କେତୋଟି ମ୍ୟାଚ୍ରେ ରୋହିତଙ୍କ ଖରାପ ପଦର୍ଶନ ଟିମ୍ ଇଣ୍ଡିଆ ପାଇଁ ଚିନ୍ତାର କାରଣ ପାଲଟିଛି ।
ଗତ ୮ଟି ମ୍ୟାଚରେ ରୋହିତ ଶର୍ମା ଗୋଟିଏ ବି ଅର୍ଦ୍ଧଶତକ କରିନାହାନ୍ତି । ବିଶାଖାପାଟନମ ଟେଷ୍ଟରେ ବିଜୟ ସହ ଭାରତ ସିରିଜ୍ ବରାବର କରିଛି । ହେଲେ ସିରିଜ ଜିତିବାକୁ ହେଲେ ରୋହିତ ଶର୍ମାଙ୍କୁ ଭଲ ବ୍ୟାଟିଂ ଉପରେ ଖେଳପ୍ରେମୀଙ୍କ ନଜର ରହିବ । ଏହା ପୂର୍ବରୁ ହାଇଦ୍ରାବାଦ ମ୍ୟାଚ୍ରେ ଭାରତକୁ ହରାଇଥିଲା ଇଂଲଣ୍ଡ । ଟେଷ୍ଟ ସିରିଜ୍ର ତୃତୀୟ ମ୍ୟାଚ୍ ରାଜକୋଟରେ ଖେଳାଯିବ ।
