ୱାଶିଂଟନ୍, ୨୭/୦୧: ଯୌନ ଉତ୍ପୀଡ଼ନ ଓ ମାନହାନିର ଗୋଟିଏ ମାମଲାରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିରୋଧରେ ରାୟ ଶୁଣାଇଛନ୍ତି କୋର୍ଟ । ଶୁକ୍ରବାର ମ୍ୟାନହଟନ ସଂଘୀୟ କୋର୍ଟ ଦେଇଥିବା ରାୟ ଟ୍ରମ୍ପଙ୍କ ବିପକ୍ଷରେ ଯାଇଛି । କୋର୍ଟଙ୍କ ନିର୍ଦ୍ଦେଶ ଅନୁସାରେ, ଲେଖିକା ଇ. ଜିନ୍ କ୍ୟାରୋଲଙ୍କୁ, ଟ୍ରମ୍ପ ମାନହାନି ମାମଲାରେ ଅନୁକମ୍ପା ରାଶି ଭାବେ ୮୩.୩ ମିଲିୟନ୍ ଡଲାର୍ (୬୯୨ କୋଟି) ଦେବେ ।

ଲେଖିକା ଜିନ୍ କ୍ୟାରୋଲଙ୍କ ପକ୍ଷରୁ ମାନହାନି ପାଇଁ ୧୦ ମିଲିୟନ୍ ଡଲାର ଦାବି କରାଯାଇଥିଲା । କିନ୍ତୁ କୋର୍ଟ ଦାବି ଠାରୁ ଅନେକ ଗୁଣ ୮୩.୩ ମିଲିୟନ୍ ଡଲାର କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି । କୋର୍ଟଙ୍କ ରାୟକୁ ହାସ୍ୟାସ୍ପଦ କହିଛନ୍ତି ଡୋନାଲ୍ଡ ଟ୍ରମ୍ପ । ରାୟକୁ ଚ୍ୟାଲେଞ୍ଜ କରି ଟ୍ରମ୍ପ ପୁଣି ଅପିଲ୍ କରିବେ ବୋଲି କହିଛନ୍ତି ।

ଦଣ୍ଡ ବିଧାନ ବାବଦକୁ ୬୫ ମିଲିୟନ୍ ଡଲାର୍, କ୍ଷତିପୂରଣ ବାବଦକୁ ୭.୩ ମିଲିୟନ୍ ଡଲାର୍, ସମ୍ମାନ କ୍ଷୂର୍ଣ୍ଣ ପାଇଁ ୧୧ ମିଲିୟନ୍ ଡଲାର୍ ଦେବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ । ତେବେ କୋର୍ଟ ରାୟ ଦେବା ସମୟରେ ଉପସ୍ଥିତ ନଥିଲେ ଡୋନାଲ୍ଡ ଟ୍ରମ୍ପ । ତେବେ ରାୟ ଆସିବା ପରେ ସୋସିଆଲ୍ ମିଡିଆରେ ଟ୍ରମ୍ପ କହିଛନ୍ତି, ସେ ଅପିଲ୍ କରିବେ । ଇ. ଜିନ୍ କ୍ୟାରୋଲ କହିଛନ୍ତି, ଏହା ସମସ୍ତ ମହିଳାଙ୍କ ବିଜୟ ।