କଣ୍ଟାବାଞ୍ଜି, ୬।୮: ପିଲାଙ୍କ କଳିକୁ ନେଇ ଜଣେ ମହିଳାଙ୍କୁ ପିଟି ପିଟି ହତ୍ୟା କରାଯାଇଛି।  କଣ୍ଟାବାଞ୍ଜିର  ନୂଆପଡାରେ ଏଭଳି ଅଭାନୀୟ ଘଟଣା ଘଟିଛି। ମୃତ ମହିଳା ଜଣକ ହେଲେ କଣ୍ଟାବାଞ୍ଜି ବ୍ଲକ ଶାନ୍ତିପଡାର ପୁଷ୍ପା ମେହେର।  

କଣ୍ଟାବାଞ୍ଜି ବ୍ଲକ ଅଧୀନ ଶାନ୍ତିପଡାର ପୁଷ୍ପା ମେହରଙ୍କ ସାନ ପୁଅ ଏବଂ କଣ୍ଟାବାଞ୍ଜି ୬ ନମ୍ବର ୱାର୍ଡ ନୂଆପଡାର ସୁଦାମ ବେହେରାଙ୍କ ପୁଅ ନୂଆପଡା ପ୍ରାଥମିକ ବିଦ୍ୟାଳୟରେ ପାଠ ପଢୁଛନ୍ତି। ଗତ କାଲି ସ୍କୁଲରେ ଦୁଇ ଛାତ୍ରଙ୍କ ମଧ୍ୟରେ  ଝଗଡା ହୋଇଥିଲା। ଆଜି ଦୁଇ ଛାତ୍ରଙ୍କ ଅଭିଭାବକଙ୍କୁ ନେଇ ସ୍କୁଲରେ ଆଲୋଚନା ହେବାକୁ ଥିଲା।  ତେବେ ପୁଷ୍ପା ଆଜି ସୁଦାମଙ୍କ ଘରକୁ ଯାଇ କାହିଁକି ସ୍କୁଲରେ ପିଲାଙ୍କ ମଧ୍ୟରେ ଝଗଡା ହେଲା ବୋଲି ପଚାରିବା ସହ ଏମିତି କାହିଁକି କରୁଛ ବୋଲି କହିଥିଲେ। ଏହି ସମୟରେ  ସୁଦାମ ଏକ ଲୁହା ରଡ଼ରେ ପୁଷ୍ପାଙ୍କୁ ଆକ୍ରମଣ କରିଥିଲା। ରକ୍ତାକ୍ତ ଅବସ୍ଥାରେ ପୁଷ୍ପାଙ୍କୁ କଣ୍ଟାବାଞ୍ଜି ଡାକ୍ତରଖାନା ନିଆଯାଇଥିଲା। ସେଠାରେ ପୁଷ୍ପାଙ୍କୁ ଡାକ୍ତର ମୃତ ଘୋଷଣା କରିଥିଲେ। ଏହି ଘଟଣା ପରେ  ସୁଦାମ ଥାନାରେ ଆତ୍ମସମର୍ପନ କରିଛି। ପୋଲିସ ଘଟଣାର ତଦନ୍ତ କରୁଛି।