ମାଲକାନଗିରି,୨୧/୬ : ଏକ ଗଭୀର ଖାଲରେ ପଡ଼ିଥିବା ଜଣେ ଯୁବକକୁ ମୁମୁର୍ଷ ଅବସ୍ଥାରେ ଗ୍ରାମବାସୀ ଓ ପୁଲିସ ଉଦ୍ଧାର କରି ଚିକିତ୍ସା ପାଇଁ ହସ୍ପିଟାଲକୁ ନେଇଥିଲେ । ମାତ୍ର ଯୁବକର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି।
ମାଲକାନଗିରି ଜିଲ୍ଲା ପଡିଆ ବ୍ଲକରେ ଥିବା ଏକ ସରକାରୀ ମଦ ଦୋକାନର କର୍ମଚାରୀ ସତନାମ ଯାଦବ (୪୬) ନାମକ ଯୁବକ ଗୁରୁବାର ରାତିରେ ଏକ ଭୋଜି ଖାଇ ନିଜ ବସା ଘରକୁ ଫେରୁଥିବାବେଳେ ସେ ଅତ୍ୟଧିକ ମଦ୍ୟ ପାନ କରିଥିବାରୁ ଏକ ଗଭୀର ଖାଲରେ ପଡିଯାଇଥିଲେ ।
ଆହତ ହୋଇଥିବାରୁ ସେ ବାହାରକୁ ଉଠିପାରି ନ ଥିଲେ, ଆଜି ସକାଳେ ସେହି ରାସ୍ତାରେ ଯାଉଥିବା କିଛି ଲୋକ ଦେଖିଥିଲେ ଜଣେ ବ୍ୟକ୍ତି ଖାଲରେ ପଡି ଛଟପଟ ହେଉଛି । ପରେ ସଙ୍ଗେ ସଙ୍ଗେ ପଡିଆ ଥାନାକୁ ଜଣାଇଥିଲେ । ପଡିଆ ଥାନା ପୁଲିସ ଘଟଣାସ୍ଥଳରେ ପହଁଚି ସ୍ଥାନୀୟ ଗ୍ରାମବାସୀଙ୍କ ସହାୟତାରେ ପ୍ରଥମେ ପଡିଆ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ । ସେଠାରେ ଅବସ୍ଥା ସଙ୍କଟାପନ୍ନ ହେବାରୁ ଡାକ୍ତର ମାଲକାନଗିରି ଜିଲ୍ଲା ହସ୍ପିଟାଲକୁ ସ୍ଥାନାନ୍ତର କରା ଯାଇଥିଲା। ହସ୍ପିଟାଲରେ ପହଁଚି ଚିକିତ୍ସା ହେଉଥିବାବେଳେ ସତନାମଙ୍କର ମୃତ୍ୟୁ ଘଟିଛି । ଆଜି ଅପରାହ୍ନରେ ପଡିଆ ଥାନା ପୁଲିସ ଘଟଣାସ୍ଥଳରେ ପହଁଚି ଶବ ବ୍ୟବଚ୍ଛେଦ ପାଇଁ ପଠାଇ ତଦନ୍ତ କରୁଛନ୍ତି ବୋଲି ପଡିଆ ଥାନା ପୁଲିସ ସୂଚନା ଦେଇଛି ।