ଜୟପୁର, ୧୮/୦୯ : ଜୟପୁର ଉପକଣ୍ଠରେ ପୁଣି ଭାଲୁ ଆତଙ୍କ । ସହର ଠାରୁ ମାତ୍ର ୫ କିଲୋମିଟର ଦୂରରେ ଥିବା ଏକମ୍ବା ଗାଁ ଭିତରେ ପଶିଛି ଭାଲୁ । ଫଳରେ ଲୋକେ ଆତଙ୍କିତ ଅବସ୍ଥାରେ ଅଛନ୍ତି। ଖବର ପାଇ ଭାଲୁକୁ କାବୁ କରିବାକୁ ବନ ବିଭାଗର ଏକ ଟିମ୍ ଗାଁରେ ରାତି ସାରା ପଇଁତରା ମାରିଥିଲେ। ହେଲେ ଭାଲୁକୁ କାବୁ କରାଯାଇ ନାହିଁ। 

ସୂଚନାନୁଯାୟୀ, ଏକମ୍ବା ଗାଁ ଭିତରେ ଗଣେଶ ପୂଜା ପାଇଁ ପ୍ରସ୍ତୁତି ଚାଲିଥିବା ବେଳେ ଗାଁ ଭିତରକୁ ଭାଲୁ ପଶିଥିବା ଲୋକମାନେ ଦେଖି ବନ ବିଭାଗକୁ ଖବର ଦେଇଥିଲେ। ତେବେ ଭୟଭୀତ ନହେବା ପାଇଁ ବନ ବିଭାଗ ଗାଁ ଲୋକଙ୍କୁ ପରାମର୍ଶ ଦେଇଛି। ଗତ ୪ ମାସ ତଳେ ବି ଭାଲୁ ଜୟପୁର ଏୟାରପୋର୍ଟ ଓ ରେଳ ଷ୍ଟେସନରେ ବୁଲୁଥିବା ଦେଖିବାକୁ ମିଳିଥିଲା। ବନ ବିଭାଗ ସେହି ସମୟରେ ଭାଲୁକୁ କାବୁ କରିବାକୁ ଉଦ୍ୟମ କରିଥିଲେ ବି ଭାଲୁ ସହର ଛାଡି ଜଙ୍ଗଲକୁ ଚାଲି ଯାଇଥିଲା।