ବିନିକା, ୦୧।୦୨ : ବିନିକାରେ ଜଣେ ଯୁବକଙ୍କୁ ଧମକାଇ ୨୨ ହଜାର ଟଙ୍କା ଲୁଟ୍ ଘଟଣା। ଜଣେ ନାବାଳକ ସହ ୩ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ। ଅଭିଯୁକ୍ତଙ୍କ ନିକଟରୁ ୧୧ ହଜାର ୪୫୦ ଟଙ୍କା, ୨ଟି ମଟର ସାଇକେଲ୍ ଜବତ ହୋଇଛି । ବିନିକା ଥାନାରେ ସୋନପୁର ଜିଲ୍ଲା ଏସ୍ପି ୟଶ ପ୍ରତାପ ଶ୍ରୀମଲ ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି।
ସୂଚନାନୁଯାୟୀ, ଗତ ୨୨ ତାରିଖ ସନ୍ଧ୍ୟାରେ ମନିଗାଁ ଦେଶୀ ଭାଟିରୁ କାମ ସାରି କୁନ୍ଦନ କୁମା ୨୨ ହଜାର ଟଙ୍କା ଧରି ସାଇକେଲ୍ ଯୋଗେ ବିନିକା ଆଡକୁ ଆସୁଥିଲେ। ସିନ୍ଦୁରପୁରରୁ ଗଣେଷପୁର ରାସ୍ତାରେ କିଛି ଦୁର୍ବୃତ୍ତ ତାଙ୍କୁ ଅଟକାଇ ଧମକ ଚମକ ଦେବା ସହ ଟଙ୍କା ଲୁଟ୍ କରି ଫେରାର ମାରିଥିଲେ । ଏହାପରେ କୁନ୍ଦନ ଥାନାରେ ଅଭିଯୋଗ କରିବା ପରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଥାନା ଅଧିକାରୀ ସାରଙ୍ଗଧର ପାଣିଗ୍ରୀହୀଙ୍କ ନେତୃତ୍ୱରେ ବିଭିନ୍ନ ସ୍ଥାନରେ ଚଢାଉ କରି ମୁଖ୍ୟ ଅଭିଯୁକ୍ତ ବିନିକା ଥାନା ବିଶାଳପାଲି ଗାଁର ଗୋପାଳ କିଶୋର ଛତ୍ରଙ୍କୁ ଧରିଥିଲେ। ପରେ ଅନ୍ୟ ଅଭିଯୁକ୍ତ ଫୁଲ ମୁଠି ଗାଁର ସୁନିଲ ଛତ୍ରିଆ, ଡଭଲା ଗାଁର ଯୋଗେଶ ସୁନା ଏବଂ ଜଣେ ନାବାଳକଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି । ସେହିପରି ଫେରାର ଥିବା ଅନ୍ୟ ଦୁଇ ନାବାଳକଙ୍କୁ ଖୁବ୍ଶୀଘ୍ର ଧରାଯିବ ବୋଲି ଏସ୍ପି ସୂଚନା ଦେଇଛନ୍ତି । ଅଭିଯୁକ୍ତଙ୍କ ନିକଟରୁ ୧୧ ହଜାର ୪୫୦ ଟଙ୍କା, ୨ଟି ମଟର ସାଇକେଲ୍ ଜବତ ହୋଇଛି ।
