ନୂଆଦିଲ୍ଲୀ: ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡରେ ବିଜେପିର ବିଜୟ ପରେ ମୁଖ୍ୟମନ୍ତ୍ରୀ ପଦକୁ ନେଇ ମନ୍ଥନ ଜାରି ରହିଛି । ଆଉ ଏହି ସମୟରେ ବିଜେପି ନୂଆ ଚେହେରାରେ ମୁଖ୍ୟମନ୍ତ୍ରୀ ସୃଷ୍ଟି କରିପାରେ ବୋଲି ସୂତ୍ରରୁ ଜଣାପଡିଛି । ସମସ୍ତ ତିନୋଟି ରାଜ୍ୟରେ ଜଣେ ବିଧାୟକ ମଧ୍ୟ ମୁଖ୍ୟମନ୍ତ୍ରୀ ହୋଇପାରିବେ ବୋଲି ସୂତ୍ରରୁ ଜଣାପଡିଛି ।

ବିଧାନସଭା ନିର୍ବାଚନରେ ବିଜେପି ମୁଖ୍ୟମନ୍ତ୍ରୀ ଚେହେରା ଘୋଷଣା କରି ନାହିଁ । ଦଳ ରାଜସ୍ଥାନ ଏବଂ ଛତିଶଗଡରେ ଜିତି କଂଗ୍ରେସ ହାତରୁ କ୍ଷମତା ଛଡ଼ାଇ ନେଇଛି, ଯେତେବେଳେ କି ମଧ୍ୟପ୍ରଦେଶରେ ଶିବରାଜ ସିଂ ଚୌହାନଙ୍କ ନେତୃତ୍ୱରେ ଏକ ସରକାର ଅଛି । ଦଳ ଏଠାରେ ମଧ୍ୟ ଏକ ବଡ଼ ବିଜୟ ହାସଲ କରିଛି ।

ମୁଖ୍ୟମନ୍ତ୍ରୀ ଚେହେରାକୁ ନେଇ ଶିବରାଜ ସିଂ ଚୌହାନ କହିଛନ୍ତି ଯେ, ଦଳ ଆମକୁ ଯେଉଁ ଦାୟିତ୍ବ ଦେଇଥାଏ, ଆମେ ତାହା ପୂରଣ କରିଥାଉ । ନିକଟରେ, ଏକ ଜାତୀୟ ଗଣମାଧ୍ୟମ ସହିତ କଥାବାର୍ତ୍ତା ବେଳେ ସେ କହିଥିଲେ, ମୁଁ ବିଶ୍ୱାସ କରେ ଯେ, ଯିଏ ନିଜ ବିଷୟରେ ଚିନ୍ତା କରେ ସେ ଜଣେ ଭଲ କର୍ମୀ ନୁହେଁ । ଜଣେ କର୍ମୀ ଭାବରେ, ଆମକୁ ଯାହା କିଛି କାମ ଦିଆଯାଏ ... ଦରି ବିଛେଇବା ଠାରୁ ଆରମ୍ଭ କରି, ସଫେଇ କରିବା ଠାରୁ ସରକାର ଚଳାଇବା ପର୍ଯ୍ୟନ୍ତ କୌଣସି ବି କାମ ଆମେ ଏହା କରିଥାଉ ଏବଂ କରିବୁ । 

ସେହିଭଳି ରାଜସ୍ଥାନରେ ମୁଖ୍ୟମନ୍ତ୍ରୀ ନାମକୁ ନେଇ ଝାଲରପାଟନ ଆସନରୁ ବିଧାନସଭା ନିର୍ବାଚନରେ ଜିତିଥିବା ବସୁନ୍ଧରା ରାଜେ, କେନ୍ଦ୍ର ମନ୍ତ୍ରୀ ଗଜେନ୍ଦ୍ର ସିଂ ଶେଖାୱାତ, ଅର୍ଜୁନ ମେଘୱାଲ, ବାବା ବାଲକନାଥ ଏବଂ ଦିୟା କୁମାରୀଙ୍କ ନାମକୁ ନେଇ କଳ୍ପନାଜଳ୍ପନା ଜାରି ରହିଛି । ବସୁନ୍ଧରା ରାଜେ ମଧ୍ୟ ପୂର୍ବରୁ ରାଜ୍ୟର ମୁଖ୍ୟମନ୍ତ୍ରୀ ରହିଛନ୍ତି ।

ଡିସେମ୍ବର ୪ରେ ରାଜସ୍ଥାନର ନୂତନ ମୁଖ୍ୟମନ୍ତ୍ରୀଙ୍କୁ ନେଇ କଳ୍ପନାଜଳ୍ପନା ଭିତରେ ପ୍ରାୟ ୨୫ ଜଣ ବିଜେପି ବିଧାୟକ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେଙ୍କୁ ଭେଟିଥିଲେ। ବିଧାୟକଙ୍କ ସହ ବସୁନ୍ଧରା ରାଜେଙ୍କ ବୈଠକ ଏକ ଶକ୍ତି ପ୍ରଦର୍ଶନ ଭାବରେ ଦେଖାଯାଉଛି ।

ସେପଟେ ଛତିଶଗଡରେ ମଧ୍ୟ ମୁଖ୍ୟମନ୍ତ୍ରୀ ପଦବୀକୁ ନେଇ ଅନେକ କଳ୍ପନାଜଳ୍ପନା କରାଯାଉଛି । ଏହାକୁ ଦୃଷ୍ଟିରେ ରଖି ନିକଟରେ ରାଜ୍ୟ ସଭାପତି ତଥା ସାଂସଦ ଅରୁଣ ସାଓ, ଦଳର ରାଷ୍ଟ୍ରୀୟ ଉପାଧ୍ୟକ୍ଷ ତଥା ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂ ଏବଂ ରାଜ୍ୟ ପାଇଁ ସହ ପ୍ରଭାରୀ ଥିବା ନିତିନ ନବିନ ଏକ ବୈଠକ କରିଥିଲେ ।