ନୂଆଦିଲ୍ଲୀ,୨୫।୩: ଭାରତୀୟ ରିଜର୍ଭ ବ୍ୟାଙ୍କ(ଆରବିଆଇ) କ୍ରେଡିଟ୍ କାର୍ଡ ସମ୍ପର୍କିତ ନିୟମରେ ପରିବର୍ତ୍ତନ କରି ଗ୍ରାହକଙ୍କୁ ବଡ଼ ଧରଣର ଆଶ୍ବସ୍ତି ଦେଇଛି। କ୍ରେଡିଟ୍ କାର୍ଡଧାରୀ ଏବେ ନିଜର ସୁବିଧା ଅନୁସାରେ, ନିଜ କାର୍ଡର ବିଲିଂ ସାଇକେଲ ଏକରୁ ଅଧିକ ଥର ପରିବର୍ତ୍ତନ କରିପାରିବେ। ପୂର୍ବରୁ ବ୍ୟାଙ୍କ ଓ ଆର୍ଥିକ ସଂସ୍ଥା କେବଳ ଗୋଟିଏ ଥର ଏଭଳି କରିବାର ସୁଯୋଗ ଦେଉଥିଲା, କିନ୍ତୁ ଆରବିଆଇ ଏହି ସୀମାକୁ ହଟାଇବାରକୁ କହିଛି। କେନ୍ଦ୍ରୀୟ ବ୍ୟାଙ୍କ ନିକଟରେଏହି ନିୟମ ଲାଗୁ କରିଛି।
ଏଭଳି କରନ୍ତୁ ପରିବର୍ତ୍ତନ
ଏଥିପାଇଁ ସବୁଠାରୁ ପ୍ରଥମେ ପୂର୍ବର ବକେୟା ଟଙ୍କା ଦେବାକୁ ହେବ। ଏହାପରେ କ୍ରେଡିଟ୍ କାର୍ଡ କମ୍ପାନୀକୁ ଫୋନ୍ କିମ୍ବା ଇମେଲ ଜରିଆରେ ବିଲିଂ ସାଇକେଲରେ ପରିବର୍ତ୍ତନ କରିବାକୁ କହିବାକୁ ହେବ। କିଛି ବ୍ୟାଙ୍କରେ ଆପଣ ମୋବାଇଲ ଆପ୍ ମାଧ୍ୟମରେ ମଧ୍ୟ ଏହି ପରିବର୍ତ୍ତନ କରିପାରନ୍ତି।
ହେବ ଏହି ଲାଭ
ଗ୍ରାହକ ନିଜର ସୁବିଧା ଅନୁସାରେ ବିଲ୍ ଦେବାର ତାରିଖ ଧାର୍ଯ୍ୟ କରିପାରିବେ। କ୍ରେଡିଟ୍ କାର୍ଡରେ ସୁଧମୁକ୍ତ ସମୟସୀମାକୁ ଅଧିକ କରିପାରନ୍ତି। ଅଲଗା ଅଲଗା କ୍ରେଡିଟ୍ କାର୍ଡକୁ ଗୋଟିଏ ତାରିଖରେ ଦେଇପାରିବେ।
ବିଲିଂ ସାଇକେଲ କ’ଣ ?
କୌଣସି ଗ୍ରାହକର କ୍ରେଡିଟ୍ କାର୍ଡ ମୋଟ୍ ବିଲ୍ (ଷ୍ଟେଟମେଣ୍ଟ) ପ୍ରତିମାସ ୬ ତାରିଖକୁ ଆସି ଯାଇଥାଏ। ଏଭଳି ସ୍ଥିତିରେ ତା’ର ବିଲିଂ ସାଇକେଲ ସେହି ମାସ ୭ ତାରିଖରୁ ଆରମ୍ଭ ହୁଏ ଓ ତା’ର ଆସନ୍ତା ମାସ ୬ ତାରିଖରେ ଶେଷ ହୋଇଯିବ। ଏଭଳି ୩୦ ଦିନ ସମୟ ସୀମା ମଧ୍ୟରେ କ୍ରେଡିଟ୍ କାର୍ଡରୁ କରାଯାଇଥିବା ସବୁ ଲେଣ-ଦେଣ କ୍ରେଡିଟ୍ କାର୍ଡ ଷ୍ଟେଟମେଣ୍ଟରେ ଦେଖିବାକୁ ମିଳିବ। ଏଥିରେ କାର୍ଡରୁ କରାଯାଇଥିବା ସବୁ ଟଙ୍କା ଦିଆନିଆ, ନଗଦ ବାହାର କରିବା, କ୍ରେଡିଟ୍ କାର୍ଡ ବିଲ୍ ଦିଆଯିବା ନେଇ ସୂଚନା ରହିଥାଏ। ବିଲ୍ର ଏହି ସମୟସୀମା କାର୍ଡର ପ୍ରକାର ଓ କ୍ରେଡିଟ୍ କାର୍ଡ ପ୍ରଦାନକାରୀଙ୍କ ଅନୁସାରେ, ୨୭ ଦିନରୁ ନେଇ ୩୧ ଦିନ ପର୍ଯ୍ୟନ୍ତ ହୋଇପାରେ।