ନୂଆଦିଲ୍ଲୀ: ଛତିଶଗଡର ଦାନ୍ତେୱାଡା ଜିଲ୍ଲାର ବାଲାଡିଲା ଠାରେ ଏକ ବଡ଼ ଦୁର୍ଘଟଣା ଘଟିଛି । ଏଠାରେ ଥିବା ଏକ ଲୁହାପଥର ଖଣିରେ ଖନନ ସମୟରେ ପଥର ଭୁଶୁଡି ପଡିବାରୁ ଅନେକ ଶ୍ରମିକ ପଥର ତଳେ ପୋତି ହୋଇ ରହିଛନ୍ତି । ଏହି ଘଟଣାରେ ୪ ଜଣ ଶ୍ରମିକଙ୍କର ମୃତ୍ୟୁ ହୋଇଥିବା ସୂଚନା ରହିଛି। ଏପର୍ଯ୍ୟନ୍ତ ଦୁଇଟି ମୃତଦେହ ଉଦ୍ଧାର କରାଯାଇଛି। ପଥର ଭୂସ୍ଖଳନ ହେତୁ ଏକ ପୋକଲେନ୍ ମେସିନ୍ ମଧ୍ୟ ପୋତି ହୋଇ ରହିଛି । 

ପାହାଡ ଖନନ କାର୍ଯ୍ୟ ଏଲ୍ ଆଣ୍ଡ ଟି କମ୍ପାନୀ ଦ୍ୱାରା କରାଯାଉଥିଲା। ଦୁର୍ଘଟଣା ପରେ ଏହି ଅଞ୍ଚଳରେ ଉତ୍ତେଜନା ଦେଖାଦେଇଛି, ଅନ୍ୟ ଶ୍ରମିକଙ୍କ ମଧ୍ୟରେ ଆତଙ୍କ ଖେଳିଯାଇଛି । ବର୍ତ୍ତମାନ ବରିଷ୍ଠ ଅଧିକାରୀ ଏବଂ SDRF ଟିମ୍ ଘଟଣାସ୍ଥଳରେ ଉପସ୍ଥିତ ରହି ଘଟଣାସ୍ଥଳରେ ରିଲିଫ୍ କାର୍ଯ୍ୟ ଆରମ୍ଭ କରିଛନ୍ତି।

ଏହି ପୁରା ଘଟଣା କିରାଣ୍ଡୁଲ ପୋଲିସ ଷ୍ଟେସନ ଅଂଚଳରୁ ହୋଇଥିବା ଜଣାଯାଇଛି । ଏହି ଘଟଣାକୁ ଏସପି ଗୌରବ ରାୟ ନିଶ୍ଚିତ କରିଛନ୍ତି । ଏଥିସହ ଅବଶିଷ୍ଟ ଫସି ରହିଥିବା ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ବଡ ମେସିନ୍ ଲଗାଯାଇଛି । ଭୁଶୁଡି ପଡିଥିବା ଆବର୍ଜନା ଗୁଡ଼ିକୁ ବାହାର କରି ଶ୍ରମିକଙ୍କୁ ବାହାରକୁ ଆଣିବା ପାଇଁ ପ୍ରୟାସ କରାଯାଉଛି । ଘଟଣା ସ୍ଥଳର ଅନେକ ଫଟୋଗ୍ରାଫ୍ ମଧ୍ୟ ସାମ୍ନାକୁ ଆସିଛି ଯେଉଁଥିରେ ରିଲିଫ୍ କାର୍ଯ୍ୟ ଶୀଘ୍ର ଚାଲିଥିବାର ଦେଖିବାକୁ ମିଳୁଛି ।