ଭୁବନେଶ୍ୱର,୦୧/୦୨: ସହର ସାରା ଅ, ଆ, ଈ, ଇ । ପ୍ରଥମ ବିଶ୍ୱ ଓଡ଼ିଆ ଭାଷା ସମ୍ମିଳନୀ ଯେତେ ପାଖଉଛି, ରାଜଧାନୀ ସେତେ ଚମକୁଛି । ଏହି ମହାକୁମ୍ଭ ପୂର୍ବରୁ ଭୁବନେଶ୍ୱର ଆଲୋକମାଳାରେ ଝଲସିଲାଣି । ଗଳି ଗଳିରେ ଝୋଟି ପକାଇ ସ୍ୱାଗତ କରିବେ ୱାର୍ଡବାସୀ ।
ବିଶ୍ୱ ଭାଷା ସମ୍ମିଳନୀ ଜନତା ମଇଦାନରେ ଅନୁଷ୍ଠିତ ହେବ । ତା ପୂର୍ବରୁ ସବୁଠି ଶୋଭା ପାଉଛି ଓଡ଼ିଆ ବର୍ଣ୍ଣବୋଧ ମାଳା । ଅକ୍ଷର ଥିମ୍ରେ ଅଧିକାଂଶ ସ୍ଥାନ ସଜେଇ ହୋଇଛି । ନିମନ୍ତ୍ରଣପତ୍ରରୁ ଆରମ୍ଭ କରି ଝୋଟି ପର୍ଯନ୍ତ ସବୁଠି ଓଡିଆ ଭାଷାର ଝଲକ । ଜନତା ମଇଦାନ, ପ୍ରଦର୍ଶନୀ ପଡିଆ ରାସ୍ତାକୁ ସଜା ହୋଇଛି । ଗଛରେ ସୁନ୍ଦର ସୁନ୍ଦର ଅଳଙ୍କାର ଆଲୋକ ମାଳାରେ ସଜେଇ ହୋଇଛି । ଏକାମ୍ର ହାଟ ଭିତରେ ନାଇଟ୍ ମାର୍କେଟ ପାଇଁ ସ୍ୱତନ୍ତ୍ର ଷ୍ଟଲ ପଡିବ । ଏହି ସହ ଯେଉଁଠାରେ ଆମ ବ୍ୟଞ୍ଜନ କାର୍ଯ୍ୟକ୍ରମ ହେବ ସେଠାରେ ସ୍ୱତନ୍ତ୍ର ଭାବେ ସଜା ହୋଇଛି । ଲୋକେ ଖାଇବା ସାଙ୍ଗକୁ ନାଚଗୀତର ମଜା ନେବେ । ବିଭିନ୍ନ ସ୍ଥାନରେ ସେଲ୍ଫି ପଏଣ୍ଟ ଖୋଲିବ । ଭାଷା ସମ୍ମିଳନୀ ପାଇଁ ରାଜ୍ୟ ବାହାରୁ ଅତିଥି ଆସିବେ । ତେଣୁ ଏୟାରପୋର୍ଟ ରାସ୍ତାରୁ ଏଜି ଛକ, ମେଫେୟାର ରାସ୍ତା,ପଟିଆ, ଜୟଦେବ ଭବନ ରାସ୍ତାକୁ ଲାଇଟ୍ରେ ସଜାହୋଇଛି ।
ସେହିପରି ସବୁ ଟ୍ରାଫିକ୍ ପୋଷ୍ଟରେ ଓଡ଼ିଆ ଲେଖା ହୋଇଛି । ବିଏମ୍ସି ୬୭ ୱାର୍ଡରେ ଅସ୍ମିତା ରଥ ବୁଲିବ । ଝୋଟି ପଡ଼ିବ । ଦିନ ୧୧ଟା ବେଳେ ଉଦ୍ଘାଟନର ସିଧା ପ୍ରସାରଣ କରାଯିବ । ବନ୍ଦେ ଉତ୍କଳ ଜନନୀ ଗୀତ ବୋଲିବେ ୱାର୍ଡବାସୀ । ବିଏମସି ଅଞ୍ଚଳରେ ଥିବା ସ୍କୁଲରେ ଓଡ଼ିଆ ଭାଷା ଶୀର୍ଷକକୁ ନେଇ ବିଭିନ୍ନ ପ୍ରତିଯୋଗିତା କରାଯିବ । ଛାତ୍ରଛାତ୍ରୀ ମାନଙ୍କୁ ପୁରସ୍କୃତ କରାଯିବ । ସେହିପରି ସହର ପରିମଳକୁ କିପରି ସର୍ବୋଚ୍ଚ ସ୍ଥାନ ଦିଆଯିବ ତାହାକୁ ଗୁରୁତ୍ୱ ଦିଆଯାଇଛି । ରାତିରେ ସଫେଇ ହେବ । ପୂରା ଅଞ୍ଚଳ ଚକାଚକ କରିବାକୁ ବିଏମ୍ସି ପକ୍ଷରୁ ନିର୍ଦ୍ଦେଶ ଦିଆଯାଇଛି ।