ଭୁବନେଶ୍ଵର, ୦୯/୦୫ : କମ୍ପାନୀରୁ ୨ କୋଟିରୁ ଉର୍ଦ୍ଧ୍ଵ ଟଙ୍କାର ଠକେଇ ଅଭିଯୋଗରେ ବନ୍ଧା ହେଲେ ଠକ ଆକାଉଣ୍ଟାଣ୍ଟ। ସିଲ୍‌କୋଟ ଷ୍ଟ୍ରକଚରାଲ ପ୍ରାଇଭେଟ ଲିମିଟେଡ କମ୍ପାନୀର ଆକାଉଣ୍ଟାଣ୍ଟ ସରୋଜ କୁମାର ମହାନ୍ତିଙ୍କୁ ଇଓଡବ୍ଲ୍ୟୁ ଗିରଫ କରିଛି। ତାଙ୍କ ନାମରେ ୨ କୋଟି ୬୩ ଲକ୍ଷ ଟଙ୍କାର ଠକେଇ ଅଭିଯୋଗ ରହିଛି। ସରୋଜଙ୍କୁ ଆଜି କୋର୍ଟରେ ହାଜର କରାଯାଇଛି। 

ସୂଚନାନୁଯାୟୀ, ଜଗତସିଂହପୁର ଜିଲ୍ଲା କାଳିଆବୋରା ଗ୍ରାମର ସରୋଜ କୁମାର ମହାନ୍ତି ସିଲ୍‌କୋଟ ଷ୍ଟ୍ରକଚରାଲ ପ୍ରାଇଭେଟ ଲିମିଟେଡ କମ୍ପାନୀର ତତ୍କାଳୀନ ଆକାଉଣ୍ଟାଣ୍ଟ ଥିଲେ। ସେହି ସମୟରେ ସେ କମ୍ପାନୀର ବ୍ୟାଙ୍କଗୁଡିକ ସହିତ ଆର୍ଥିକ କାରବାର ପରିଚାଳନା ଏବଂ ନିୟନ୍ତ୍ରଣ କରୁଥିଲେ। ସମସ୍ତ ବ୍ୟାଙ୍କ ସମ୍ବନ୍ଧୀୟ କାରବାର, ଟିକସ, ବାଲାନ୍ସ ସିଟ୍ ଏବଂ ଲାଭ ଏବଂ କ୍ଷତି ଆକାଉଣ୍ଟ ଦେଖୁଥିଲେ। ଏହାର ସୁଯୋଗ ନେଇ ସେ ଜାଲ୍ ଦସ୍ତାବିଜ୍ ବ୍ୟବହାର କରି କମ୍ପାନୀରୁ ୨ କୋଟି ୬୩ ଲକ୍ଷ ଟଙ୍କାର ଠକେଇ କରିଥିଲେ। ଏନେଇ କମ୍ପାନୀର ନିର୍ଦ୍ଦେଶକ ବିଶ୍ଵଜିତ ଭୂୟାଁ ଥାନାର ଦ୍ଵାରସ୍ଥ ହୋଇଥିଲେ। ଏହାପରେ ଇଓଡବ୍ଲ୍ୟୁ ତଦନ୍ତ ଆରମ୍ଭ କରିଥିଲା। ଆକାଉଣ୍ଟାଣ୍ଟ ସରୋଜ ମହାନ୍ତି ୨୦୧୫-୧୬ ଏବଂ ୨୦୧୭-୧୮ରେ କମ୍ପାନୀ ଠାରୁ ଏହି ଠକେଇ କରିଥିବା ତଦନ୍ତରୁ ଜଣାପଡ଼ିଥିଲା।