ନୂଆଦିଲ୍ଲୀ,୨୪/୦୩: ବିଶ୍ୱ ଅର୍ଥନୈତିକ ଅଭିବୃଦ୍ଧି ମନ୍ଥର ଥିବା ସତ୍ତେ୍ୱ ଭାରତୀୟ ଅର୍ଥବ୍ୟବସ୍ଥା ଦମ୍ଦାର ପ୍ରଦର୍ଶନ କରୁଛି । ଆଗାମୀ ମାସଗୁଡ଼ିକରେ ଦେଶରେ ଦରଦାମ କମିବା ଆଶା ରହିଛି । ଘରୋଇ ନିବେଶ ବଢୁଛି । ବଜାରରେ ଚାହିଦା ମଜଭୁତ ରହିଛି ଏବଂ ବେକାରି ହାର କମୁଛି । ଭାରତୀୟ ଅର୍ଥବ୍ୟବସ୍ଥା ପାଇଁ ୨୦୨୪-୨୫ ଆର୍ଥିକବର୍ଷ ସାନ୍ଦାର ରହିବ ବୋଲି ଅନୁମାନ କରିଛି ଅର୍ଥ ମନ୍ତ୍ରାଳୟ ।
ତେବେ ଆସନ୍ତା ଆର୍ଥିକବର୍ଷରେ ଚଳନ୍ତି ଖାତା ନିଅଣ୍ଟ(ସିଏଡି) ଉପରେ ନଜର ରଖିବାକୁ ହେବ ବୋଲି ମନ୍ତ୍ରାଳୟ କହିଛି । ଶୁକ୍ରବାର ଜାରି ହୋଇଥିବା ଫେବ୍ରୁଆରୀ ମାସର ମାସିକ ଅର୍ଥନୈତିକ ସମୀକ୍ଷାରେ ମନ୍ତ୍ରାଳୟ ପ୍ରକାଶ କରିଛି ଯେ, ଗତ ଦୁଇଟି ତ୍ରୟମାସରେ ଦ୍ରୁତ ବୃଦ୍ଧି ପରେ ଭାରତର ଅର୍ଥନୈତିକ ଅଭିବୃଦ୍ଧି ୨୦୨୩-୨୪ ଆର୍ଥିକବର୍ଷର ତୃତୀୟ ତ୍ରୟମାସରେ ୬ଟି ତ୍ରୟମାସର ସର୍ବୋଚ୍ଚ ସ୍ତରରେ ପହଞ୍ଚିଛି । ଲଗାତର ତୃତୀୟ ଥର ଏହା ୮%ରୁ ଅଧିକ ରହିଛି । ମଜଭୁତ ଚାହିଦା ଯୋଗୁ ବିନିର୍ମାଣ ଏବଂ ନିର୍ମାଣ ଗତିବିଧି ବଢ଼ିଛି । ଫଳରେ ତୃତୀୟ ତ୍ରୟମାସରେ ଜିଡିପି ଅଭିବୃଦ୍ଧିକୁ ବଳ ମିଳିଛି ।
ମାସିକ ସମୀକ୍ଷାରେ କୁହାଯାଇଛି ଯେ, ମୁଦ୍ରାସ୍ଫୀତି ଲଗାତର ଷଷ୍ଠ ମାସରେ ଆର୍ବିଆଇର କମ୍ଫର୍ଟ ଜୋନ୍ରେ ରହିଛି । ସାଧାରଣ ମୁଦ୍ରାସ୍ଫୀତି କମୁଛି । ଫଳରେ ଦର୍ଦାମ୍ ଖସିଥିବା ଜଣାପଡୁଛି । ଖାଉଟି ମୂଲ୍ୟସୂଚୀ ଆଧାରିତ ଖୁଚୁରା ମୁଦ୍ରାସ୍ଫୀତି ଫେବ୍ରୁଆରୀରେ ୫.୦୯% ସହିତ୪ ମାସର ନିମ୍ନ ସ୍ତରକୁ ଖସିଆସିଛି । ତେବେ ଖାଦ୍ୟ ମୁଦ୍ରାସ୍ଫୀତି ବର୍ଷେ ପୂର୍ବେ ୫.୯% ଥିବାବେଳେ ଏବେ ୮.୬୬% ରହିଛି । ଫେବ୍ରୁଆରୀରେ ଶସ୍ୟ କ୍ଷେତ୍ରରେ ଦରବୃଦ୍ଧି ହାର ୭.୬% ରହିଛି । ସେହିଭଳି ଡାଲି ଦର ୧୮.୯% ଉପରେ ରହିଛି । ମୁଦ୍ରାସ୍ଫୀତିକୁ ୨ରୁ ୬% ମଧ୍ୟରେ ରଖିବା ପାଇଁ ସରକାର ଆର୍ବିଆଇକୁ ଦାୟିତ୍ୱ ଦେଇଛନ୍ତି ।
ମନ୍ତ୍ରାଳୟ ପ୍ରକାଶ କରିଛି ଯେ, ବିମାନ ଯାତ୍ରୀ ପରିବହନ ବୃଦ୍ଧି, ଯାତ୍ରୀବାହୀ ଯାନ ବିକ୍ରି ବଢ଼ିବା, ଡିଜିଟାଲ ପେମେଣ୍ଟ ସଂଖ୍ୟା ବୃଦ୍ଧି ଏବଂ ଖାଉଟିଙ୍କ ଆସ୍ଥାରୁ ଜଣାପଡୁଛି ଯେ, ଘରୋଇ ଚାହିଦା ମଜଭୁତ ହେଉଛି । ଛୋଟ ସହରରେ ଘର ଚାହିଦା ବଢୁଛି । ଫଳରେ ନିର୍ମାଣ ଗତିବିଧି ବଢ଼ିବ । ମନ୍ତ୍ରାଳୟ ପ୍ରକାଶ କରିଛି ଯେ, ଭୁ-ରାଜନୈତିକ ସମସ୍ୟା, ସାମଗ୍ରୀ ଦରରେ ଉତ୍ଥାନ ପତନ ଏବଂ ବିଶ୍ୱବ୍ୟାପୀ ସୁଧ ହାର ବୃଦ୍ଧି ଭଳି ପରିସ୍ଥିତି ସତ୍ତେ୍ୱ ଭାରତୀୟ ପୁଞ୍ଜି ବଜାର ଉଲ୍ଲେଖନୀୟ ଅଭିବୃଦ୍ଧି ହାସଲ କରିଛି । ଭାରତୀୟ ଅର୍ଥନୀତିର ମୂଳଦୁଆ ଉପରେ ବିଦେଶୀ ନିବେଶକଙ୍କ ଭରସା ବଢୁଛି ।
ସମୀକ୍ଷାରେ ଆହୁରି କୁହାଯାଇଛି ଯେ, ମୁଦ୍ରାସ୍ଫୀତି ସ୍ଥିର ଅଛି । ନିବେଶ ସ୍ଥିତି ଭଲ ରହିଛି । ନିଯୁକ୍ତି ବଜାରରେ ସୁଧାର ଘଟୁଛି । ଏଭଳି ସ୍ଥିତିରେ ବିଶ୍ୱ ସ୍ତରରେ ଆହ୍ୱାନଗୁଡ଼ିକ ସତ୍ତେ୍ୱ ୨୦୨୪-୨୫ ଭାରତ ପାଇଁ ଭଲ ରହିବ ବୋଲି ଅନୁମାନ । ମନ୍ତ୍ରାଳୟ ପ୍ରକାଶ କରିଛି ଯେ, ଅନ୍ତର୍ଜାତୀୟ ବଜାରରେ କମୋଡିଟି ଦର କମିବା ଫଳରେ ଚଳିତ ଆର୍ଥିକ ବର୍ଷ ବାଣିଜ୍ୟିକ ନିଅଣ୍ଟ ଖସିବା ଆଶା ରହିଛି । ନେଟ୍ ସେବା ରିସିପ୍ଟ ବଢ଼ିବା ଦ୍ୱାରା ଚଳନ୍ତି ଆକାଉଣ୍ଟ ବାଲାନ୍ସରେ ସୁଧାର ଆସିପାରେ । ତେବେ ୨୦୨୪-୨୫ରେ ଚଳନ୍ତି ଖାତା ନିଅଣ୍ଟ ଉପରେ ନଜର ରଖିବାକୁ ପଡ଼ିବ ବୋଲି ମନ୍ତ୍ରାଳୟ କହିଛି ।
