ପୁରୀ,୧୭/୦୩: ହାତ ପାଆନ୍ତାରେ ଏବେ ଉପଲବ୍ଧ ସାରା ଦୁନିଆର ତଥ୍ୟ । ଜ୍ଞାନର ଗନ୍ତାଘର ସାଜିଛି ୱିକିପିଡିଆ । ଇଣ୍ଟରନେଟ୍ରେ କିଛି ଖୋଜିବା ମାତ୍ରେ ସର୍ବପ୍ରଥମେ ୱିକିପିଡିଆର ତଥ୍ୟ ହିଁ ନଜର ଆସିଥାଏ । ଖ୍ୟାତନାମା ବ୍ୟକ୍ତିତ୍ୱଙ୍କ ନାମ, ଗାଁ, ଠିକଣାଠାରୁ ଆରମ୍ଭ କରି ପୃଥିବୀର କୋଣ ଅନୁକୋଣର ସମସ୍ତ ବିଷୟବସ୍ତୁ ୱିକିପିଡିଆରେ ରହିଛି । ଏହି ୱିକିପିଡିଆ ପୁରୀର ଅଲିଭା ସାହୁ ଓ ଚିନ୍ମୟୀ ମିଶ୍ରଙ୍କ ପରିଚୟ ପାଲଟିଛି । ଉଭୟ ଜାତୀୟ ଓ ଅନ୍ତର୍ଜାତୀୟ ମାନ୍ୟତା ହାସଲ କରିପାରିଛନ୍ତି ।
ୱିକିପିଡିଆରେ ଲେଖିବା ପାଇଁ ସେମାନଙ୍କୁ କୌଣସି ଆର୍ଥିକ ଦେୟ ମିଳିନଥାଏ । ସ୍ୱେଚ୍ଛାକୃତ ଭାବେ ଲୋକଙ୍କୁ ଶିକ୍ଷିତ ଓ ସମୃଦ୍ଧ କରିବା ଲକ୍ଷ୍ୟରେ ଉଭୟ ୮ ବର୍ଷରୁ ଅଧିକ ହେବ ଜ୍ଞାନ ବାଣ୍ଟି ଚାଲିଛନ୍ତି । ଉଚ୍ଚ ଶିକ୍ଷିତଠାରୁ ଆରମ୍ଭ କରି ଅଳ୍ପଶିକ୍ଷିତ ସମସ୍ତଙ୍କ ଜାଣିବାର ଅଧିକାରକୁ ହୃଦୟଙ୍ଗମ କରି ସେମାନେ ଓଡ଼ିଆ ୱିକିପିଡିଆରେ ତଥ୍ୟ ପ୍ରଦାନ କରୁଛନ୍ତି ।
ଅଲିଭା ସାହୁ(୩୨)ଙ୍କ ଜନ୍ମ ପୁରୀ ଜିଲ୍ଲାର କାକଟପୁରରେ । ସେ ୭୫୦ରୁ ଊଦ୍ଧ୍ୱର୍ ୱିକି ଲେଖିସାରିଲେଣି । ଗଣ-ସଂପାଦନାରେ ସର୍ବାଧିକ ପ୍ରସଙ୍ଗ ଲେଖି ସେ ପୁରସ୍କୃତ ହୋଇଛନ୍ତି । ୨୦୧୬ରେ ଚଣ୍ଡିଗଡ଼ରେ ଓ ୨୦୨୩ରେ ହାଇଦ୍ରାବାଦରେ ଅନୁଷ୍ଠିତ ଉଇକି କନ୍ଫରେନ୍ସ ଇଣ୍ଡିଆ, ୨୦୧୮ରେ ମହୀଶୂରରେ ଅନୁଷ୍ଠିତ ଟ୍ରେନ୍ ଦି ଟ୍ରେନର୍, ୨୦୨୩ରେ ଦିଲ୍ଲୀରେ ଅନୁଷ୍ଠିତ ଅନ୍ତର୍ଜାତୀୟ କାର୍ଯ୍ୟକ୍ରମ ଉଇକି ଓମେନ୍ କ୍ୟାମ୍ପ୍ରେ ସେ ଯୋଗ ଦେଇଛନ୍ତି । ନିଜ ଉଦ୍ୟମରେ ଅନେକ ଗଣ-ସମ୍ପାଦନାର ଆୟୋଜନ କରାଇବା ସହିତ ହିନ୍ଦୀ ୱିକିପିଡ଼ିଆ କ୍ଷେତ୍ରରେ ମଧ୍ୟ ତାଙ୍କର ଅବଦାନ ରହିଛି । ତାଙ୍କର ୱିକି ପ୍ରସଙ୍ଗଗୁଡ଼ିକ ମୁଖତଃ ମହିଳାମାନଙ୍କ ଉପରେ ଆଧାରିତ । ଏଚ୍ଆଇଭି ଏଡ୍ସ ବିରୋଧରେ ଲଢ଼େଇ ଜାରି ରଖିଥିବା ଏକ ଏନ୍ଜିଓର ପ୍ରୋଗ୍ରାମ ଅଫିସର୍ ଭାବରେ କାମ କରୁଥିଲେ ମଧ୍ୟ ୱିକି ଲେଖିବା ଅଲିଭାଙ୍କ ନିଶା ପାଲଟିଛି ।
ସେହିପରି ପୁରୀ ଜିଲ୍ଲା ପିପିଲି କୋଠସାହିରେ ଚିନ୍ମୟୀ ମିଶ୍ର (୨୮)ଙ୍କ ଜନ୍ମ । ସେ ପେଶାରେ ଜଣେ ସଫ୍ଟୱେୟାର ଇଞ୍ଜିନିୟର । ହେଲେ ତାଙ୍କର ମୁଖ୍ୟ ପରିଚୟ ପାଲଟିଛି ୱିକିପିଡିଆ । ୨୦୨୩ରେ ସିଙ୍ଗାପୁରଠାରେ ଅନୁଷ୍ଠିତ ଅନ୍ତର୍ଜାତୀୟ କାର୍ଯ୍ୟକ୍ରମ ‘ୱିକିମାନିଆ’ରେ ଚିନ୍ମୟୀ ସାମିଲ ହୋଇଥିଲେ । ୨୦୧୭ରେ ସ୍ୱିଡେନ୍ରେ ଅନୁଷ୍ଠିତ ୱିକିମିଡ଼ିଆ ଡାଇଭର୍ସିଟି କନ୍ଫରେନ୍ସରେ ମଧ୍ୟ ଚିନ୍ମୟୀ ନିଜର ଦକ୍ଷତା ପ୍ରଦର୍ଶନ କରିଛନ୍ତି । ଆସନ୍ତା ଏପ୍ରିଲ ମାସରେ ଜର୍ମାନର ରାଜଧାନୀ ବର୍ଲିନଠାରେ ହେବାକୁ ଥିବା ୱିକିମିଡିଆ ସମ୍ମିଳନୀରେ ଯୋଗଦେବାକୁ ଚିନ୍ମୟୀଙ୍କୁ ଡାକରା ଆସିଛି । ୨୦୧୬ରେ ବେଙ୍ଗାଲୁରୁରେ ଟ୍ରେନ୍ ଦି ଟ୍ରେନର୍, ୨୦୧୯ରେ ଆଡ୍ଭାନ୍ସଡ୍ ୱିକିସୋସ୍ର୍ ଟ୍ରେନିଂ ଭଳି କର୍ମଶାଳାରେ ଯୋଗଦେବା ସହ ୨୦୨୩ରେ ହାଇଦ୍ରାବାଦରେ ଅନୁଷ୍ଠିତ ୱିକି କନ୍ଫରେନ୍ସ ଇଣ୍ଡିଆ, ୨୦୧୮ରେ ଗୋଆରେ ଅନୁଷ୍ଠିତ କମ୍ୟୁନିଟି ହେଲ୍ଥ କନ୍ଫରେନ୍ସ ଭଳି ଜାତୀୟସ୍ତରର କାର୍ଯ୍ୟକ୍ରମରେ ଯୋଗ ଦେଇଛନ୍ତି । ୨୦୧୯ରେ କର୍ଣ୍ଣାଟକରେ ଅନୁଷ୍ଠିତ ସାର୍କ କନ୍ଫରେନ୍ସ ଓ ତାଙ୍କ ଉଲ୍ଲେଖନୀୟ କାମ ହେଉଛି ୱିକି ଓମେନ୍ କ୍ୟାମ୍ପକୁ ଭାରତରେ ଅନୁଷ୍ଠିତ କରାଇବା । ତାଙ୍କ ଦ୍ୱାରା ଅପ୍ଲୋଡ଼ କରାଯାଇଥିବା ଫଟୋ ଓ ଭିଡିଓଗୁଡ଼ିକ ଅନେକ ଦରକାରୀ କାର୍ଯ୍ୟରେ ଲାଗିପାରିଛି ।
