ନୂଆଦିଲ୍ଲୀ,୩୦/୦୧: ଭାରତୀୟ ନୌସେନାର ବୀରତା ପୁଣି ଆରବ ସାଗରରେ ଦେଖିବାକୁ ମିଳିଛି। ଭାରତୀୟ ନୌସେନା ଗତ ୨୪ ଘଣ୍ଟା ଭିତରେ ଆରବ ସାଗରରେ ଡକାୟତମାନଙ୍କଠାରୁ ଦୁଇଟି ଜାହାଜକୁ ଉଦ୍ଧାର କରିଛନ୍ତି। କେବଳ ଏତିକି ନୁହେଁ, ନୌସେନା ଗୋଟିଏ ଜାହାଜରୁ ୧୯ ଜଣ ପାକିସ୍ତାନୀ କ୍ରୁ ସଦସ୍ୟ ଏବଂ ଅନ୍ୟ ଏକ ଇରାନୀୟ ଜାହାଜରୁ ୧୭ ଜଣ କ୍ରୁ ସଦସ୍ୟଙ୍କୁ ଉଦ୍ଧାର କରିଛି। ଭାରତୀୟ ନୌସେନା ୨୮ ଏବଂ ୨୯ ଜାନୁଆରୀରେ ଆରବ ସାଗରରେ ଦୁଇଟି ଜାହାଜକୁ ଅପହରଣରୁ ରକ୍ଷା କରିଥିଲେ।
ସୂଚନା ଅନୁସାରେ ରବିବାର ଦିନ ନୌସେନାର ଯୁଦ୍ଧ ଜାହାଜ ଆଇଏନ୍ଏସ୍ ସୁମିତ୍ରା ପ୍ରଥମେ ଇରାନର ଜାହାଜ ଏଫ୍ବି ଇରାନକୁ ଅପହରଣରୁ ରକ୍ଷା କରିଥିଲା। ଏହା ପରେ ନିଜେ ଆରବ ସାଗରରେ ଏକ ସ୍ୱତନ୍ତ୍ର ଅପରେସନ କରି ଅଲ ନାଇମି ନାମକ ଏକ ଜାହାଜକୁ ସୋମାଲିଆର ଡକାୟତମାନଙ୍କଠାରୁ ଉଦ୍ଧାର କରିଥିଲା। ଏହି ଅପରେସନରେ ଇଣ୍ଡିଆନ୍ ମେରାଇନ୍ କମାଣ୍ଡୋମାନେ ପ୍ରମୁଖ ଭୁମିକା ଗ୍ରହଣ କରିଥିଲେ।
ନ୍ୟୁଜ୍ ଏଜେନ୍ସି ପିଟିଆଇ ଅନୁଯାୟୀ, ଆଇଏନ୍ଏସ୍ ସୁମିତ୍ରା ଦ୍ବିତୀୟ ଡକାୟତି ବିରୋଧୀ ଅପରେସନ୍ କରିଥିଲା। ଏହି ଅପରେସନରେ ୧୯ ଜଣ କ୍ରୁ ମେମ୍ବର ଏବଂ ଜାହାଜକୁ ସଶସ୍ତ୍ର ସୋମାଲି ଡକାୟତମାନଙ୍କଠାରୁ ଉଦ୍ଧାର କରାଯାଇଥିଲା। ନୌସେନା ଅଧିକାରୀ କହିଛନ୍ତି ଯେ ଭାରତ ମହାସାଗରରେ ଡକାୟତି ବିରୋଧୀ କାର୍ଯ୍ୟରେ ନିୟୋଜିତ ହୋଇଥିବା ଜାହାଜଗୁଡ଼ିକ ସମସ୍ତ ସାମୁଦ୍ରିକ ସୁରକ୍ଷା ପ୍ରତି ପ୍ରତିବଦ୍ଧତାକୁ ପ୍ରତିଫଳିତ କରିଛି।
ଏହା ପ୍ରଥମ ଘଟଣା ନୁହେଁ ଯେ ଭାରତୀୟ ନୌସେନା ସୋମାଲି ଡକାୟତମାନଙ୍କୁ ଟାର୍ଗେଟ କରି ମତ୍ସ୍ୟଜୀବୀ ଜାହାଜକୁ ଉଦ୍ଧାର କରିଛି। ବରଂ ଏହାପୂର୍ବରୁ ୫ ଜାନୁଆରୀ ଆଇଏନ୍ଏସ୍ ଚେନ୍ନାଇ ସୋମାଲିଆ ଉପକୂଳରୁ ଏକ ଜାହାଜର ଚାଳକ ଦଳଙ୍କୁ ସଫଳତାର ସହ ଉଦ୍ଧାର କରି ଜାହାଜରେ ଥିବା ସମସ୍ତ ୧୫ ଜଣ ଭାରତୀୟ ନାଗରିକଙ୍କୁ ଉଦ୍ଧାର କରିଥିଲା। ୧୫ ଜଣ ଭାରତୀୟ କ୍ରୁ ସଦସ୍ୟ ଡକାୟତମାନଙ୍କଠାରୁ କାର୍ଗୋ ଜାହାଜ MV Leela Norfolk କୁ ଉଦ୍ଧାର କରିଥିଲେ। ଏହି ଅପରେସନ୍ ମେରାଇନ୍ କମାଣ୍ଡୋସ୍ (ମାର୍କୋସ୍)ଙ୍କ ଦ୍ୱାରା କରାଯାଇଥିଲା।
