ଚେନ୍ନାଇ,୨୮/୦୪: ରବିବାର ରାତ୍ରିରେ ଘରୋଇ ଚେନ୍ନାଇ ସୁପରକିଙ୍ଗ୍ସ ଓ ସନରାଇଜର୍ସ ହାଇଦ୍ରାବାଦ ପରସ୍ପରକୁ ଭେଟିବେ । ଉପଲ୍ ଭଳି ଚିପକ ଷ୍ଟାଡ଼ିୟମ୍ରେ ମଧ୍ୟ ଛକା, ଚୌକା ବର୍ଷା ହେବା ନିଶ୍ଚିତ । ୧୦ ପଏଣ୍ଟ ହାସଲ କରିସାରିଥିବା ସନରାଇଜର୍ସ ଶେଷ ମ୍ୟାଚ୍ରେ ରୟାଲ୍ ଚ୍ୟାଲେଞ୍ଜର୍ସ ଠାରୁ ପରାଜିତ ହୋଇଥିଲା । ସେହିପରି ଡିଫେଣ୍ଡିଂ ଚାମ୍ପିଅନ୍ ସୁପରକିଙ୍ଗ୍ସ ଲଗାତର ୨ଟି ମ୍ୟାଚ୍ରେ ଲକ୍ଷ୍ନୌ ସୁପରଜାଏଣ୍ଟ୍ସ ଠାରୁ ପରାଜିତ ହୋଇଛି । ୮ଟି ମ୍ୟାଚ୍ ଖେଳିଥିବା ସୁପରକିଙ୍ଗ୍ସ ମୋଟ୍ ୮ପଏଣ୍ଟ ସହ ପଏଣ୍ଟ ତାଲିକାର ଷଷ୍ଠ ସ୍ଥାନରେ ରହିଛି ।
ଉଭୟ ଦଳ ଗତ ୫ ତାରିଖରେ ପରସ୍ପରକୁ ଭେଟିଥିଲେ । ସନରାଇଜର୍ସ ଉକ୍ତ ମ୍ୟାଚ୍କୁ ୬ୱିକେଟ୍ରେ ଜିତିଥିଲା । ଏଥର ସୁପରକିଙ୍ଗ୍ସ ପୂର୍ବ ପରାଜୟର ପ୍ରତିଶୋଧ ନେବ । ବର୍ତ୍ତମାନ ପ୍ରଦର୍ଶନକୁ ନେଇ ଉଭୟ ଦଳର ତ୍ରୁଟି ବାହାର କରିବା ସମ୍ଭବ ନୁହେଁ । ଉଭୟ ଦଳ ଚମତ୍କାର ଖେଳ ପ୍ରଦର୍ଶନ କରୁଛନ୍ତି ।
ବିସ୍ଫୋରକ ବ୍ୟାଟିଂ କରି ଆତଙ୍କ ଖେଳାଇଥିବା ସନରାଇଜର୍ସକୁ ଅଟକାଇବା ପାଇଁ ସୁପରକିଙ୍ଗ୍ସ ରବିବାର ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବା ଆଶା କରାଯାଉଛି । ବିଶେଷ କରି ପାୱାର ପ୍ଲେରେ ସ୍ପିନରଙ୍କୁ ବୋଲିଂ କରାଇ ଟ୍ରେଭିସ୍ ହେଡ୍ ଓ ଅଭିଷେକ ଶର୍ମାଙ୍କୁ ସହଳ ଆଉଟ୍ କରିବାକୁ ସୁପରକିଙ୍ଗ୍ସ ଯୋଜନା କରିବ । ସନରାଇଜର୍ସ ବୋଲିଂ ବିଭାଗରେ ବିଭିନ୍ନତା ରହିଥିବାରୁ ସୁପରକିଙ୍ଗ୍ସ ବ୍ୟାଟରଙ୍କୁ ଏଥିପ୍ରତି ସତର୍କ ରହିବାକୁ ହେବ ।
ରବିବାର ଉଭୟ ଦଳ ଏକାଦଶ ଅପରିବର୍ତ୍ତିତ ରଖିବା ଆଶା କରାଯାଉଛି । ପିଚ୍ ବ୍ୟାଟିଂ ପାଇଁ ଅନୁକୂଳ ରହିବ । ମାତ୍ର ସ୍ପିନରମାନେ ପିଚ୍ର ଫାଇଦା ଉଠାଇ ପାରିବେ। ଟସ ନିର୍ଣ୍ଣାୟକ ଭୂମିକା ଗ୍ରହଣ କରିପାରେ । ରାତିରେ କାକର ଯୋଗୁଁ ବ୍ୟାଟିଂ ସହଜ ହେବ। ଫଳରେ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ।
ସମ୍ଭାବ୍ୟ ଏକାଦଶ
ସୁପରକିଙ୍ଗ୍ସ: ଋତୁରାଜ ଗାଏକୱାଡ୍(ଅଧିନାୟକ), ଅଜିଙ୍କ୍ୟ ରାହାଣେ, ଡାରିଲ ମିଚେଲ, ରବିନ୍ଦ୍ର ଜାଡେଜା, ଶିବମ ଦୁବେ, ମୋଇନ ଅଲି, ମହେନ୍ଦ୍ର ସିଂହ ଧୋନି, ଦୀପକ ଚହର, ତୁଷାର ଦେଶପାଣ୍ଡେ, ମୁସ୍ତାଫିଜୁର ରେହମାନ, ମଥିଶା ପତିରଣା । (ଇମ୍ପାକ୍ଟ ପ୍ଲୟାର: ସର୍ଦୁଲ ଠାକୁର) ।
ସନରାଇଜର୍ସ : ଅଭିଷେକ ଶର୍ମା, ଟ୍ରେଭିସ୍ ହେଡ୍, ଆଡେନ ମାରକ୍ରମ, ହେନରିକ କ୍ଲାସେନ, ଅବଦୁଲ ସମଦ, ନିତିଶ କୁମାର ରେଡ୍ଡୀ, ସାହବାଜ ଅହମ୍ମଦ, ପ୍ୟାଟ୍ କମିନ୍ସ(ଅଧିନାୟକ), ଭୁବନେଶ୍ୱର କୁମାର, ଜୟଦେବ ଉନାକାତ, ମୟଙ୍କ ମାର୍କଣ୍ଡେ । (ଇମ୍ପାକ୍ଟ ପ୍ଲେୟାର: ଟି ନଟରାଜନ) ।