ସୁବର୍ଣ୍ଣପୁର, ୧୪/୧୧ : ବୋରୱେଲ ଗାତ ଭିତରୁ ବୃଦ୍ଧା ଉଦ୍ଧାର। ସୁବର୍ଣ୍ଣପୁର କଇଁଫୁଲ ଗାଁରେ ୨୦ ଫୁଟ ବୋରୱେଲ ଗାତ ଭିତରକୁ ଖସିପଡ଼ିଥିବା ବୃଦ୍ଧାଙ୍କୁ ଉଦ୍ଧାର କରାଯାଇଛି। ଅଗ୍ନିଶମ ବାହିନୀ ବୃଦ୍ଧାଙ୍କୁ ଉଦ୍ଧାର କରିଛି। ସମାନ୍ତରାଳ ଭାବେ ଆଉ ଏକ ଗାତ ଖୋଳି ବୃଦ୍ଧାଙ୍କୁ ବୋରୱେଲ ଭିତରୁ ଉଦ୍ଧାର କରାଯାଇଛି। ବୃଦ୍ଧାଙ୍କୁ ଏବେ ହସ୍ପିଟାଲ ନିଆଯାଉଛି। ସେ ଗୁରୁତର ଥିବା ଜଣାପଡ଼ିଛି। 

ସୂଚନାନୁଯାୟୀ, ସୋମବାର ସକାଳେ ସୁବର୍ଣ୍ଣପୁର କଇଁଫୁଲ ଗାଁରେ ଜଣେ ବୃଦ୍ଧା ଅସାବଧାନତାବଶତଃ ବୋରୱେଲରେ ଖସିପଡ଼ିଥିଲେ। ଅଗ୍ନିଶମ ବାହିନୀ ଓ ଓଡ୍ରାଫ ଟିମ୍ ଘଟଣାସ୍ଥଳରେ ପହଞ୍ଚି ବୃଦ୍ଧାଙ୍କୁ ଉଦ୍ଧାର କରିଛନ୍ତି। ବୃଦ୍ଧାଙ୍କୁ ଅକ୍ଷତ ଅବସ୍ଥାରେ ଉଦ୍ଧାର କରାଯାଇଥିବା ଜଣାପଡ଼ିଛି। ତେବେ ରେସକ୍ୟୁ ଅପରେସନ ଚ୍ୟାଲେଞ୍ଜିଂ ଥିଲା। ବୃଦ୍ଧାଙ୍କ ନିକଟରେ ଏକ ଗାତ ଭିତରେ ଏକ ଚିତି ସାପ ରହିଥିଲା। ହେଲେ ସାପଟି ବୃଦ୍ଧାଙ୍କର କିଛି କ୍ଷତି କରି ନଥିବା ଅଗ୍ନିଶମ ବାହିନୀ ସୂଚନା ଦେଇଛନ୍ତି। 

ଅପର ପକ୍ଷରେ ବୋରୱେଲ କିଏ ଖୋଳି ଖୋଲା ଛାଡ଼ିଥିଲା ତାହାର ତଦନ୍ତ ହେବ। ଦୋଷୀଙ୍କ ବିରୋଧରେ ଆଇନ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସୁବର୍ଣ୍ଣପୁର ଏସପି ଅମରେଶ ପଣ୍ଡା କହିଛନ୍ତି।