ନୂଆଦିଲ୍ଲା ୦୮/୦୮: ପ୍ୟାରିସ୍ ଖେଳ ମହାକୁମ୍ଭରେ ବିରଳ ଘଟଣା । ଜଣେ କ୍ରୀଡ଼ାବିତ୍ଙ୍କ ସୌନ୍ଦର୍ଯ୍ୟ ସାଥୀ ଖେଳାଳିଙ୍କ ଧ୍ୟାନ ଭଙ୍ଗ କଲା । ତେଣୁ ଅନିନ୍ଦ୍ୟ ସୁନ୍ଦରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଗଲା । ଅଲିମ୍ପିକ୍ସରୁ ତାଙ୍କୁ ଘରକୁ ପଠାଇ ଦିଆଗଲା । ସଦ୍ୟ ଘଟଣାକୁ ନେଇ ଏବେ ସାରା ବିଶ୍ୱରେ ଚର୍ଚ୍ଚା ।
ପାରାଗୁଏର ମହିଳା ସନ୍ତରଣକାରୀ ଲୌନା ଅଲୋନ୍ସୋ । ତାଙ୍କ ସୌନ୍ଦର୍ଯ୍ୟ କ୍ରୀଡ଼ା ଗ୍ରାମରେ ଚହଳ ପକାଇଲା । ନିଜ ଟିମ୍ର ଖେଳାଳି ତାଙ୍କ ସୌନ୍ଦର୍ଯ୍ୟରେ ଏତେ ଆକର୍ଷିତ ହେଲେ ଯେ ଖେଳରେ ଧ୍ୟାନ ଦେଇପାରିଲେ ନାହିଁ । ତେଣୁ ଆଉ କୌଣସି ଉପାୟ ନ ପାଇ ତାଙ୍କୁ ପ୍ୟାରିସ୍ରୁ ସ୍ୱଦେଶ ଫେରିଆସିବାକୁ ବାଧ୍ୟ କରାଗଲା । ଅଲୋନ୍ସୋ ନିଜର ସୌନ୍ଦର୍ଯ୍ୟ ପାଇଁ ଚଳିତ ପ୍ୟାରିସ୍ ଅଲିମ୍ପିକ୍ସରେ ଅଗଣିତଙ୍କ ହୃଦୟ ଜିତିଥିଲେ । କିନ୍ତୁ ତାଙ୍କ ଅଜାଣତରେ ଏହା ତାଙ୍କ ପାଇଁ ସବୁଠୁ ମହଙ୍ଗା ସାବ୍ୟସ୍ତ ହେଲା । ତାଙ୍କ ଟିମ୍ର ସାଥୀ ଖେଳାଳିଙ୍କୁ ତାଙ୍କ ସୌନ୍ଦର୍ଯ୍ୟ ବିମୋହିତ କଲା । ସେମାନେ ପ୍ରତିଯୋଗିତାରେ ଫୋକସ୍ କରିପାରିଲେ ନାହିଁ । ଅଲୋନ୍ସୋ ସନ୍ତରଣ ପ୍ରତିଯୋଗିତାରେ ଫାଇନାଲ୍କୁ ଯାଇ ନ ପାରିବାରୁ ତାଙ୍କର ଅଲିମ୍ପିକ୍ସ ଯାତ୍ରା ଶେଷ ହୋଇଥିଲା । କିନ୍ତୁ ପ୍ୟାରିସ୍ ଅଲିମ୍ପିକ୍ସ ଶେଷ ହେବା ପର୍ଯ୍ୟନ୍ତ ଆଥ୍ଲେଟ୍ଙ୍କୁ କ୍ରୀଡ଼ା ଗ୍ରାମରେ ରହିବାର ଅନୁମତି ରହିଛି । ସେହି ଦୃଷ୍ଟିରୁ ଅଲୋନ୍ସୋ ଆସନ୍ତା ୧୧ ତାରିଖରେ କ୍ରୀଡ଼ା ମହାକୁମ୍ଭ ଶେଷ ପର୍ଯ୍ୟନ୍ତ କ୍ରୀଡ଼ା ଗ୍ରାମରେ ରହିପାରିଥାନ୍ତେ ।
କିନ୍ତୁ ତା’ର ବହୁ ପୂର୍ବରୁ ଅଲୋନ୍ସୋଙ୍କୁ କ୍ରୀଡ଼ା ଗ୍ରାମ ଖାଲି କରିବାକୁ ପଡ଼ିଲା । ତାଙ୍କ ଜାତୀୟ ଟିମ୍ ପ୍ରବନ୍ଧକ ଦାବି କରିଛନ୍ତି, କ୍ରୀଡ଼ା ଗ୍ରାମରେ ଅଲୋନ୍ସୋଙ୍କ ଉପସ୍ଥିତି ପାରାଗୁଏର ସମସ୍ତ କ୍ରୀଡ଼ାବିତ୍ଙ୍କ ଉପରେ ଅନୁଚିତ୍ ପ୍ରଭାବ ପକାଉଥିଲା । ତେଣୁ ତାଙ୍କୁ ସ୍ୱଦେଶ ଫେରିଆସିବାକୁ କୁହାଗଲା ।
ସେପଟେ, ପ୍ୟାରିସ୍ ଅଲିମ୍ପିକ୍ସରୁ ବାହାରିବା ପରେ ପରେ ଅଲୋନ୍ସୋ ସନ୍ତରଣରୁ ଅବସର ଘୋଷଣା କଲେ । ନିଜ କ୍ରୀଡ଼ା କ୍ୟାରିଅର୍ରେ ପାଇଥିବା ସମର୍ଥନ ଓ ଭଲପାଇବା ପାଇଁ ସେ ସମର୍ଥକ ଓ ନିଜ ଦେଶକୁ ଧନ୍ୟବାଦ ଦେଲେ । ତେବେ ଅଲିମ୍ପିକ୍ କ୍ରୀଡ଼ା ଗ୍ରାମ ଖାଲି କରିବା ବିଷୟରେ ଅଲୋନ୍ସୋ କୌଣସି ପ୍ରତିକ୍ରିୟା ଦେଇନାହାନ୍ତି ।
