ନୂଆଦିଲ୍ଲୀ: ଆଇପିଏଲ ୨୦୨୪କୁ ନେଇ ଚର୍ଚ୍ଚା ଲାଗିରହିଛି । ଏହାରି ମଧ୍ୟରେ ସନରାଇଜର୍ସ ହାଇଦ୍ରାବାଦ (ଏସଆରଏଚ୍) ବଡ଼ ପରିବର୍ତ୍ତନ କରିବା ସହ ପ୍ୟାଟ୍ କମିନ୍ସଙ୍କୁ ନୂତନ ଅଧିନାୟକ ଭାବେ ନିଯୁକ୍ତ କରିଛି । ସେ ୨୦୨୩ ସିଜନର ଅଧିନାୟକ ଆଡନ ମାର୍କରମଙ୍କ ସ୍ଥାନ ନେଇଛନ୍ତି । ହାଇଦ୍ରାବାଦ ଆଇପିଏଲ ୨୦୨୪ ଲାଗି ହୋଇଥିବା ମିନି ଅକ୍ସନରେ କମିନ୍ସଙ୍କୁ ୨୦ କୋଟି ୫୦ ଲକ୍ଷ ଟଙ୍କାରେ କିଣିଥିଲା । ଏହା ସହ କମିନ୍ସ ଦ୍ବିତୀୟ ବଡ଼ ମହଙ୍ଗା ଖେଳାଳିର ମାନ୍ୟତା ପାଇଛନ୍ତି ।
ମାର୍ଚ୍ଚ ୨୨ରୁ ଆରମ୍ଭ ହେବାକୁ ଥିବା ଆଇପିଏଲ ପୂର୍ବରୁ ସନରାଇଜର୍ସ ହାଇଦ୍ରାବାଦ କମିନ୍ସଙ୍କୁ ବଡ଼ ଦାୟିତ୍ବ ଦେଇଛି । ସୋସିଆଲ ମିଡିଆରେ ହାଇଦ୍ରାବାଦ ଟିମ୍ ପକ୍ଷରୁ ଏନେଇ ଘୋଷଣା କରାଯାଇଛି । ଦଳ ପକ୍ଷରୁ ସୋସିଆଲ ମିଡିଆରେ ଲେଖାଯାଇଛି ଯେ, ଆମର ନୂଆ ଅଧିନାୟକ ପ୍ୟାଟ୍ କମିନ୍ସ । ତେବେ ଆଇପିଏଲ ୨୦୨୩ରେ ହାଇଦ୍ରବାଦ ଟିମ ସବୁଠାରୁ ଖରାପ ପ୍ରଦର୍ଶନ କରିଥିଲା । ଆଡନ ମାର୍କରମଙ୍କ ନେତୃତ୍ବରେ ଦଳ ଭଲ ପ୍ରଦର୍ଶନ କରିପାରି ନଥିଲା ।
୧୪ଟି ମ୍ୟାଚ୍ରୁ କେବଳ ୪ଟି ଲିଗ୍ ମ୍ୟାଚ୍ରେ ବିଜୟ ଲାଭ କରିଥିଲା ଏସଆରଏଚ୍ । ଏହା ସହ ଦଳ ପଏଣ୍ଟ ଟେବୁଲର ସବୁଠାରୁ ତଳେ ଅର୍ଥାତ ଦଶମ ସ୍ଥାନରେ ରହିଥିଲା । ସେପଟେ ପ୍ୟାଟ କମିନ୍ସ ଦିନିକିଆ ବିଶ୍ବକପ୍ ୨୦୨୩ରେ ଅଷ୍ଟ୍ରେଲିଆକୁ ବିଜୟୀ କରିଥିଲେ । ଏଭଳି ସ୍ଥିତିରେ କମିନ୍ସ ହାଇଦ୍ରାବାଦକୁ କପ୍ ଜିତାଇପାରନ୍ତି ବୋଲି ଖେଳପ୍ରେମୀ ଆଶା ରଖିଛନ୍ତି ।
