ନୂଆଦିଲ୍ଲୀ,୨୧/୦୩: ପ୍ରଧାନମନ୍ତ୍ରୀ  ନରେନ୍ଦ୍ର ମୋଦି ବୁଧବାର ରୁଷ୍‌ ରାଷ୍ଟ୍ରପତି ଭ୍ଲାଦିମିର ପୁଟିନ୍‌ଙ୍କୁ ଫୋନ୍‌ କରି ନିର୍ବାଚନରେ ବିଜୟ ପାଇଁ ଶୁଭେଚ୍ଛା ଜଣାଇଛନ୍ତି । ଏହି ଅବସରରେ ଉଭୟ ନେତା ରୁଷ୍‌-ୟୁକ୍ରେନ୍‌ ଯୁଦ୍ଧ ଉପରେ ଆଲୋଚନା କରିଥିଲେ । ଯୁଦ୍ଧ ପ୍ରସଙ୍ଗରେ ଭାରତର ଆଭିମୁଖ୍ୟକୁ  ଦୋହରାଇ ପ୍ରଧାନମନ୍ତ୍ରୀ ମୋଦି କୂଟନୈତିକ  ଉପାୟରେ ଏବଂ ଆଲୋଚନା ମାଧ୍ୟମରେ ସଂଘର୍ଷ  ରୋକିବା ଲାଗି ବାଟ ବାହାର କରାଯିବା ଉଚିତ ବୋଲି  କହିଥିଲେ । ଏହାର କିଛି ଘଣ୍ଟା ପରେ ମୋଦି ୟୁକ୍ରେନ୍‌ ରାଷ୍ଟ୍ରପତି ଭୋଲୋଡିମିର ଜେଲେନ୍‌ସ୍କିଙ୍କୁ ମଧ୍ୟ ଫୋନ କରିଥିଲେ । ଆଲୋଚନା ମାଧ୍ୟମରେ ଯୁଦ୍ଧ ବନ୍ଦ କରିବାର  ରାସ୍ତା ବାହାର କରିବା ଲାଗି ଜେଲେନ୍‌ସ୍କିଙ୍କୁ ମଧ୍ୟ ମୋଦି  କହିଥିଲେ । ଏ ନେଇ ମୋଦି ଏକ୍ସରେ ପୋଷ୍ଟ କରି  ସୂଚନା ଦେଇଛନ୍ତି । 

ସେ କହିଛନ୍ତି, ଭାରତ-ୟୁକ୍ରେନ୍‌  ମଧ୍ୟରେ ସହଭାଗିତା ମଜଭୁତ କରିବା ଦିଗରେ  ଜେଲେନ୍‌ସ୍କିଙ୍କ ସହ ଆଲୋଚନା ହୋଇଛି । ଭାରତ ସର୍ବଦା ଯୁଦ୍ଧକୁ ତୁରନ୍ତ ଶେଷ କରାଯିବା ଏବଂ ଶାନ୍ତିକୁ  ପ୍ରୋତ୍ସାହିତ କରିବା ଲାଗି ସମର୍ଥନ ଦେଇଆସିଛି ।  ଭାରତ ମାନବୀୟ ସହାୟତା ପ୍ରଦାନ ଜାରି ରଖିବ  ବୋଲି ମୋଦି କହିଛନ୍ତି । ସେହିପରି ଭାରତ ଏବଂ  ରୁଷ୍‌ ମଧ୍ୟରେ ବନ୍ଧୁତା ଓ ରଣନୈତିକ ସହଭାଗିତା  ରହିଥିବା ଏବଂ ରୁଷ୍‌ ସହ ଆଗାମୀ ଦିନରେ ଭାଗିଦାରୀ  ଆହୁରି ଦୃଢ଼ କରିବା ଉପରେ ଉଭୟ ନେତା ଗୁରୁତ୍ୱ  ଦେଇଥିଲେ ବୋଲି ମୋଦି କହିଥିଲେ । ସେହିପରି ପୁଟିନ୍‌ ମଧ୍ୟ ମୋଦିଙ୍କୁ ଆଗାମୀ ଲୋକସଭା ନିର୍ବାଚନ  ପାଇଁ ଶୁଭକାମନା ଜଣାଇଛନ୍ତି ।