ଭୁବନେଶ୍ୱର,୦୯/୦୮: ବିଳମ୍ବରେ ହେଉ ପଛେ ପରାଜୟର କାରଣ ଖୋଜିବ କଂଗ୍ରେସ । ଏଥିପାଇଁ ଏକ ଘରୋଇ ଏଜେନ୍ସିକୁ ଦାୟିତ୍ୱ ଦେଇଛନ୍ତି ହାଇକମାଣ୍ଡ । ସେମାନେ ସର୍ଭେ କରୁଛନ୍ତି । ନେତା ଓ ଜନତାଙ୍କୁ ପଚାରି ବୁଝୁଛନ୍ତି, କାହିଁକି ଦଳ ହାରିଲା? ଅସୁବିଧା ରହିଲା କେଉଁଠି? ଖାଲି ସେତିକି ନୁହେଁ, ଆଗକୁ ରାଜ୍ୟରେ କିଏ କଂଗ୍ରେସର ମଙ୍ଗ ସମ୍ଭାଳିଲେ ଭଲ ହେବ ମତାମତ ଲୋଡୁଛନ୍ତି ।
ଜୁନ୍ରେ ନିର୍ବାଚନ ଫଳ ପ୍ରକାଶ ପାଇଥିଲା । ରାଜ୍ୟରେ କଂଗ୍ରେସ ସରକାର ଗଢ଼ିବ ବୋଲି ଆଶାବାଦୀ ଥିଲା । ହେଲେ ମାତ୍ର ୧୪ ବିଧାନସଭା ସିଟ୍ରେ ସୀମିତ ରହିଲା । ୨୧ ସାଂସଦ ମଧ୍ୟରୁ କେବଳ କୋରାପୁଟ ସିଟକୁ ବାଦ୍ ଦେଲେ ଅନ୍ୟ ସବୁଠି ବିଜେପି ବାଜି ମାରି ନେଇଥିଲା । ସେବେଠୁ କଂଗ୍ରେସର ବହୁ ବରିଷ୍ଠ ନେତା ନିର୍ବାଚନରେ ପରାଜୟ ବାବଦରେ ସମୀକ୍ଷା କରିବାକୁ ଦାବି କରିଥିଲେ । ଏଆଇସିସିକୁ ଅନୁରୋଧ ମଧ୍ୟ କରିଥିଲେ । ହେଲେ ଏ ପର୍ଯ୍ୟନ୍ତ କୌଣସି ସମୀକ୍ଷା କରିବା ପରିବର୍ତ୍ତେ ଜୁଲାଇ ୨୧ରେ ପିସିସି ସମେତ ରାଜ୍ୟର ସମସ୍ତ କମିଟିକୁ ଭାଙ୍ଗି ଦେଲେ । ହେଲେ ଏବେ ନିର୍ବାଚନର ଦୁଇ ମାସ ପରେ ଏକ ଘରୋଇ ଏଜେନ୍ସି ଦ୍ୱାରା କଂଗ୍ରେସ ନିର୍ବାଚନ ହାରିବାର କାରଣ ଖୋଜୁଥିବା ସୂଚନା ମିଳିଛି । ଏହି ଏଜେନ୍ସିର ଲୋକମାନେ ବିଭିନ୍ନ ନିର୍ବାଚନମଣ୍ଡଳୀର କଂଗ୍ରେସ ନେତା ଓ ସାଧାରଣ ଭୋଟରଙ୍କୁ ଭେଟି କଂଗ୍ରେସ କାହିଁକି ଭଲ କରିପାରିଲା ନାହିଁ ବୋଲି ପଚାରି ବୁଝୁଛନ୍ତି । ଦଳ ଜିଲ୍ଲାରେ କିମ୍ବା କେଉଁ ନିର୍ବାଚନମଣ୍ଡଳୀରେ ଆଉ କାହାକୁ ଦେଇଥିଲେ ଅଧିକ ଭଲ କରିଥାନ୍ତା ବୋଲି ମଧ୍ୟ ପ୍ରଶ୍ନ କରୁଛନ୍ତି ।
ସେହିପରି ପାଖାପାଖି ୨୦ ଦିନ ହେବ ମୁରବୀ ବିହୀନ ହୋଇପଡ଼ିଥିବା ରାଜ୍ୟ କଂଗ୍ରେସର କିଏ ମଙ୍ଗ ଧରିଲେ ଭଲ ହେବ, ସେ ବାବଦରେ ବି ମତ ନିଆଯାଉଛି । ପୂର୍ବରୁ ଦଳର ବରିଷ୍ଠ ନେତାମାନେ ବିଧାୟକମାନଙ୍କ ମତ ନେଇଥିଲେ । ଏବେ ତୃଣମୂଳସ୍ତରରେ ଥିବା କର୍ମୀ ଓ କଂଗ୍ରେସକୁ ଭଲ ପାଉଥିବା ଶୁଭେଚ୍ଛୁଙ୍କୁ ମଧ୍ୟ ପିସିସି ସଭାପତି କିଏ ହେବ ବୋଲି ମତ ଲୋଡାଯାଉଛି । ତେବେ ନୂଆ ପିସିସି ସଭାପତି ନିଯୁକ୍ତ ହେବା ପର୍ଯ୍ୟନ୍ତ କାମଚଳା ରାଜ୍ୟ ମୁଖିଆ ବା ଓଡ଼ିଶା କଂଗ୍ରେସର ଦାୟିତ୍ୱ ସମ୍ଭାଳିବାକୁ ଭାରପ୍ରାପ୍ତ ନେତା ଦେବାକୁ ପୂର୍ବତନ ପିସିସି ସଭାପତି ଜୟଦେବ ଜେନା ଏଆଇସିସିକୁ ଚିଠି ଲେଖିଥିଲେ । ହେଲେ ସପ୍ତାହେ ପରେ ବି କୌଣସି ଫଳ ମିଳିଲା ନାହିଁ । ରାଜ୍ୟ କଂଗ୍ରେସ ଅନାଥ । ବୁଝିବା ପାଇଁ କେହି ନାହାନ୍ତି । କଂଗ୍ରେସ ଭବନ ଖାଁ ଖାଁ ଲାଗୁଛି । କେବଳ କିଛି ନେତା ବାହାରେ ଚେୟାର୍ ପକାଇ ବସୁଛନ୍ତି । ନହେଲେ ଅନ୍ୟ ସମସ୍ତ ସେଲ୍ ପାଇଁ ଦିଆଯାଇଥିବା କକ୍ଷଗୁଡ଼ିକ ତାଲା ପଡ଼ି ରହୁଛି । ଏହି ଅଚଳାବସ୍ଥା ଦୂର କରିବାକୁ କେବଳ ଜୟଦେବ ନୁହଁ, ଅନ୍ୟ ବହୁ କଂଗ୍ରେସ ନେତା ଚିନ୍ତା ପ୍ରକଟ କରିବା ଆରମ୍ଭ କରିଛନ୍ତି ।
ଅପରପକ୍ଷେ ରାଜ୍ୟ କଂଗ୍ରେସର ସଭାପତି ଦୌଡ଼ରେ ଭକ୍ତଚରଣ ଦାସ, ପୂର୍ବତନ ବିଧାୟକ ମହମ୍ମଦ ମୋକିମ, ପୂର୍ବତନ କେନ୍ଦ୍ର ମନ୍ତ୍ରୀ ଶ୍ରୀକାନ୍ତ ଜେନା ଓ ପୂର୍ବତନ ପିସିସି ସଭାପତି ପ୍ରସାଦ ହରିଚନ୍ଦନଙ୍କ ନାମ ଶୁଣାଯାଉଛି । ସାଂସଦ ସପ୍ତଗିରି ଉଲାକା ପିସିସି ସଭାପତି ପାଇଁ ଇଚ୍ଛୁକ ନଥିବା ସୂଚନା ମିଳିଛି । ଏମିତି ବି କୋରାପୁଟ ଜିଲ୍ଲାରୁ କଂଗ୍ରେସର ବିଧାୟକ ଦଳ ନେତା ଭାବେ ରାମଚନ୍ଦ୍ର କାଡ଼ାମଙ୍କୁ ଦାୟିତ୍ୱ ଦିଆଯାଇଥିବାରୁ ପିସିସି ସଭାପତି ଉପକୂଳ ଓଡ଼ିଶା କିମ୍ବା ପଶ୍ଚିମ ଓଡ଼ିଶାରୁ ଦିଆଯାଇପାରେ ବୋଲି କଂଗ୍ରେସ ନେତା ଚର୍ଚ୍ଚା କରୁଛନ୍ତି।
