ନୂଆଦିଲ୍ଲୀ: ଇଶା ପାଉଣ୍ଡେସନ୍ର ପ୍ରତିଷ୍ଠାତା ଏବଂ ଆଧ୍ୟାତ୍ମିକ ସଦ୍ଗୁରୁ ଜଗି ବାସୁଦେବଙ୍କ ଦିଲ୍ଲୀରେ ଏକ ଘରୋଇ ହସ୍ପିଟାଲରେ ବ୍ରେନ୍ ସର୍ଜରୀ (ମସ୍ତିଷ୍କ ଅସ୍ତ୍ରୋପଚାର) ହୋଇଛି । ସଦଗୁରୁ ଗତ ଚାରି ସପ୍ତାହ ଧରି ଭୀଷଣ ମୁଣ୍ଡବ୍ୟଥା ଅନୁଭବ କରୁଥିଲେ । ଯନ୍ତ୍ରଣା ସତ୍ତ୍ୱେ ସେ ନିଜ ଦୈନନ୍ଦିନ କାର୍ଯ୍ୟକ୍ରମ ଏବଂ ସାମାଜିକ ଗତିବିଧି ଜାରି ରଖିଥିଲେ । ଏପରିକି ମାର୍ଚ୍ଚ ୮ରେ ମହା ଶିବରାତ୍ରି ସମାରୋହ ମଧ୍ୟ ଆୟୋଜନ କରିଥିଲେ ।
ବ୍ରେନ ସର୍ଜରୀ ପରେ ସଦଗୁରୁ ନିଜର ଏକ ଭିଡିଓ ବାର୍ତ୍ତା ଜାରି କରି କହିଛନ୍ତି ଯେ, ସର୍ଜରୀ ପରେ ତାଙ୍କ ସ୍ୱାସ୍ଥ୍ୟାବସ୍ଥା ଭଲ ଅଛି । ମାର୍ଚ୍ଚ ୧୫ରେ ଯନ୍ତ୍ରଣା ବଢିବା ପରେ ସେ ଦିଲ୍ଲୀର ଏକ ଘରୋଇ ହସ୍ପିଟାଲର ବରିଷ୍ଠ ନ୍ୟୁରୋଲଜିଷ୍ଟଙ୍କ ସହ ଆଲୋଚନା କରିଥିଲେ । ଏମଆରଆଇ ପରେ ତାଙ୍କ ମସ୍ତିଷ୍କରେ ରକ୍ତସ୍ରାବ ହୋଇଥିବା ନେଇ ଜଣା ପଡ଼ିଥିଲା । ପରେ ମାର୍ଚ୍ଚ ୧୭ରେ ବରିଷ୍ଠ ଡାକ୍ତରଙ୍କ ତତ୍ୱାବଧାନରେ ସଦଗୁରୁଙ୍କର ଜରୁରିକାଳୀନ ବ୍ରେନ୍ ସର୍ଜରୀ କରାଯାଇଥିଲା
ସଦଗୁରୁଙ୍କୁ ଏବେ ଭେଣ୍ଟିଲେଟରରୁ ବାହାର କରାଯାଇଛି । ତେବେ ଚିକିତ୍ସା ସମୟରେ ଜଣାପଡ଼ିଥିଲା ଯେ, ସଦଗୁରୁଙ୍କ ମସ୍ତିଷ୍କରେ ୩ରୁ ୪ ସପ୍ତାହ ଧରି ରକ୍ତସ୍ରାବ ହୋଇଥିଲା । ସେପଟେ ସର୍ଜରୀ ପରେ ସଦଗୁରୁଙ୍କ ସ୍ବାସ୍ଥ୍ୟବସ୍ଥାରେ ସୁଧାର ଆସୁଥିବା ଜଣାପଡ଼ିଛି । ବରିଷ୍ଠ ଡାକ୍ତରଙ୍କ ଅକ୍ଳାନ୍ତ ପରିଶ୍ରମ ଏବଂ ଖୋଦ ସଦଗୁରୁ ମଧ୍ୟ ଶୀଘ୍ର ସୁସ୍ଥ ହେବାକୁ ଚେଷ୍ଟା କରୁଛନ୍ତି ।