ହିନ୍ଦୀ ଫିଲ୍ମ ଇଣ୍ଡଷ୍ଟ୍ରିର ଅପ୍ରତିଦ୍ୱନ୍ଦ୍ୱୀ ନାୟିକା ଥିଲେ ଶ୍ରୀଦେବୀ । ସରଳା ଗ୍ରାମ୍ୟବଧୂ ଚରିତ୍ର ହେଉ ଅବା ବିତ୍ତଶାଳୀଙ୍କ ପତ୍ନୀ, କନ୍ୟା - ସମସ୍ତ ପ୍ରକାର ଚରିତ୍ରକୁ ଶତ ପ୍ରତିଶତ ନ୍ୟାୟ ଦେଇପାରୁଥିଲେ ସେ । ତାଙ୍କ ନୃତ୍ୟ, ସଂଳାପ କହିବାର ଶୈଳୀ ମଧ୍ୟ ଥିଲା ସବୁଠୁ ନିଆରା । ଅଗଷ୍ଟ ୧୩, ୧୯୬୩ରେ ତାମିଲନାଡ଼ୁରେ ଜନ୍ମିତା ଶ୍ରୀଦେବୀଙ୍କର ପରଲୋକ ହୋଇଥିଲା ୨୦୧୮ରେ । କିନ୍ତୁ ଆଜି ମଧ୍ୟ ତାଙ୍କର ସୁପରହିଟ୍ ଫିଲ୍ମ ତାଙ୍କୁ ପ୍ରଶଂସକଙ୍କ ହୃଦୟରେ ଜୀବିତ ରଖିଛି ।
ନିଖୁଣ ଅଭିନୟରେ ଦର୍ଶକଙ୍କୁ ବାନ୍ଧି ରଖିପାରୁଥିବା ଶ୍ରୀଦେବୀ କୋଟି କୋଟି ପ୍ରଶଂସକ ସୃଷ୍ଟି କରିଯାଇଛନ୍ତି । ଅନେକେ ଆଜି ବି ଶ୍ରୀଦେବୀଙ୍କର ଫିଲ୍ମ ଦେଖିବାକୁ ପସନ୍ଦ କରନ୍ତି । ଆପଣ ବି ଶ୍ରୀଦେବୀଙ୍କର ଜଣେ ବଡ଼ ପ୍ରଶଂସକ କି? ଯଦି ହଁ, ତା’ହେଲେ ସେ ଅଭିନୟ କରିଥିବା ଏହି ୮ଟି ଲୋକପ୍ରିୟ ଚଳଚ୍ଚିତ୍ର ଦେଖନ୍ତୁ ଓଟିଟି ପ୍ଲାଟଫର୍ମରୁ ।
ଇଙ୍ଗଲିଶ୍ ବିଙ୍ଗଲିଶ୍
୨୦୧୨ରେ ପ୍ରେକ୍ଷାଳୟକୁ ଆସିଥିଲା ‘ଇଙ୍ଗଲିଶ୍ ବିଙ୍ଗଲିଶ୍’ । ଗୌରୀ ଶିନ୍ଦେ ଏ ଫିଲ୍ମର ନିର୍ଦ୍ଦେଶନା ଦେଇଥିଲେ । ବିବାହ ଏବଂ ପରେ ପରେ ଦୁଇ ଶିଶୁ କନ୍ୟାଙ୍କ ଲାଳନ ପାଳନରେ ବ୍ୟସ୍ତ ରହି କିଛି ବର୍ଷର ବ୍ୟବଧାନ ପରେ ଏହି ଫିଲ୍ମ ଜରିଆରେ ଶ୍ରୀଦେବୀ ବଲିଉଡକୁ ଲେଉଟିଥିଲେ । ଜିଓ ସିନେମା ଓଟିଟି ପ୍ଲାଟଫର୍ମରେ ଆପଣ ଏ ଫିଲ୍ମଟିକୁ ଦେଖିପାରିବେ ।
ଗୁମରାହ
ବକ୍ସ ଅଫିସ୍ରେ ଏହି ଫିଲ୍ମଟି ଆଭରେଜ୍ ବ୍ୟବସାୟ କରିଥିଲା । କିନ୍ତୁ ଏ ଫିଲ୍ମରେ ଶ୍ରୀଦେବୀଙ୍କ ଅଭିନୟକୁ ମିଳିଥିଲା ଦର୍ଶକୀୟ ଆଦୃତି । ଏଥିରେ ଶ୍ରୀଦେବୀ ଉଭୟ ଡରିଯାଇଥିବା ଓ ଆକ୍ସନ କରୁଥିବା ଚରିତ୍ରରେ ଅଭିନୟ କରିଛନ୍ତି, ଯାହାକୁ ଦେଖିଲେ ଦର୍ଶକ ପ୍ରଶଂସା ନ କରି ରହିପାରିବେ ନାହିଁ । ୧୯୯୩ରେ ମୁକ୍ତିଲାଭ କରିଥିଲା ଏ ଫିଲ୍ମ ।
ଲାଡ୍ଲା
ଅନୀଲ କପୁର, ରବିନା ଟଣ୍ଡନ ଓ ଶ୍ରୀଦେବୀ ଅଭିନୀତ ‘ଲାଡ୍ଲା’ ରିଲିଜ୍ ହୋଇଥିଲା ୧୯୯୪ରେ । ଏଥିରେ ଶ୍ରୀଦେବୀ ଜଣେ ବିତ୍ତଶାଳୀ ବାପାଙ୍କ ଅହଙ୍କାରୀ କନ୍ୟା ଚରିତ୍ରରେ ଅଭିନୟ କରି ଦର୍ଶକଙ୍କ ହୃଦୟ ଜିତିଥିଲେ । ରାଜ କନୱର ‘ଲାଡ୍ଲା’ର ନିର୍ଦ୍ଦେଶନା ଦେଇଥିଲେ । ଆପଣ ଏ ଫିଲ୍ମକୁ ଜୀ୫ ଓ ୟୁଟ୍ୟୁବ ଉଭୟ ପ୍ଲାଟଫର୍ମରେ ମାଗଣାରେ ଦେଖିପାରିବେ ।
ମିଷ୍ଟର ଇଣ୍ଡିଆ
ଏହି ସିନେମାରେ ଶ୍ରୀଦେବୀଙ୍କ ବିପକ୍ଷରେ ନାୟକ ଭାବେ ନଜର ଆସିଥିଲେ ଅନୀଲ କପୁର । ଫିଲ୍ମରେ ଦୁହିଁଙ୍କର କଲର୍ଫୁଲ କେମିଷ୍ଟ୍ରି, ନୂତନ ସ୍ୱାଦର କଥାବସ୍ତୁକୁ ଖୁବ୍ ପସନ୍ଦ କରିଥିଲେ ସିନେପ୍ରେମୀ । ଏହି ବ୍ଳକବଷ୍ଟର ଚଳଚ୍ଚିତ୍ରର ନିର୍ଦ୍ଦେଶକ ଥିଲେ ଶେଖର କପୁର । ‘ମିଷ୍ଟର ଇଣ୍ଡିଆ’ ଚଳଚ୍ଚିତ୍ରଟି ଦର୍ଶକ ଜୀ୫ରେ ଦେଖିପାରିବେ ।
ଜୁଦାଇ
୧୯୯୭ରେ ରାଜ କନୱର ନିର୍ଦ୍ଦେଶିତ ‘ଜୁଦାଇ’ ସିନେମାଘରକୁ ଆସିଥିଲା । ଏଥିରେ ଜଣେ ଧନ ସମ୍ପତ୍ତି ଲୋଭୀ ମହିଳା ଚରିତ୍ରରେ ଅବତୀର୍ଣ୍ଣ ହୋଇଥିଲେ ଶ୍ରୀଦେବୀ । ସେ ଅନୀଲ କପୁରଙ୍କ ପତ୍ନୀ ଚରିତ୍ରରେ ଅଭିନୟ କରିଥିବାବେଳେ ପ୍ରେମିକା ଚରିତ୍ର ନିର୍ବାହ କରିଥିଲେ ଉର୍ମିଳା । ବର୍ତ୍ତମାନ ଏହି ଚଳଚ୍ଚିତ୍ରଟି ଜୀ୫ ଓ ୟୁଟ୍ୟୁବରେ ଉପଲବ୍ଧ ହେଉଛି ।
ଚାନ୍ଦ୍ନୀ
୧୯୮୯ରେ ପ୍ରେକ୍ଷାଳୟକୁ ଆସିଥିଲା ସୁପରହିଟ୍ ଫିଲ୍ମ ‘ଚାନ୍ଦ୍ନୀ’ । ୟଶ୍ ଚୋପ୍ରାଙ୍କ ନିର୍ଦ୍ଦେଶିତ ଏ ଫିଲ୍ମରେ ଶ୍ରୀଦେବୀଙ୍କ ଗ୍ଲାମର୍କୁ ନେଇ ବେଶ୍ ଚର୍ଚ୍ଚା ହୋଇଥିଲା । ଫିଲ୍ମର କାହାଣୀ ତଥା ଗୀତସବୁ ମଧ୍ୟ ଦର୍ଶକଙ୍କ ହୃଦୟକୁ ଛୁଇଁଥିଲା । ‘ଚାନ୍ଦ୍ନୀ’ ଆଜି ମଧ୍ୟ ଅନେକ ଦର୍ଶକଙ୍କ ମନପସନ୍ଦ ଫିଲ୍ମ ତାଲିକାରେ ରହିଛି । ଫିଲ୍ମର ମେଲ୍ ଲିଡ୍ କରିଥିଲେ ଦୁଇ ସୁପରଷ୍ଟାର ରିଷି କପୁର ଓ ବିନୋଦ ଖାନ୍ନା । ଏହି ଫିଲ୍ମଟି ପ୍ରାଇମ୍ ଭିଡିଓରେ ଉପଲବ୍ଧ ଅଛି ।
ଚାଲ୍ବାଜ
ପଙ୍କଜ ପରାଶର ‘ଚାଲ୍ବାଜ’ର ନିର୍ଦ୍ଦେଶନା ଦେଇଥିଲେ । ଏହି ସୁପରହିଟ୍ କଥାଚିତ୍ରରେ ଶ୍ରୀଦେବୀ ଦେଖିବାକୁ ମିଳିଥିଲେ ଦ୍ୱୈତ ଭୂମିକାରେ, ଯାହା ମଧ୍ୟରୁ ଗୋଟିଏ ଥିଲା ସରଳ, ନିଷ୍କପଟ ଓ ଦ୍ୱିତୀୟଟି ବେଶ୍ ଚାଲାକ୍ ଯୁବତୀ । ଏ ଫିଲ୍ମର ମୁଖ୍ୟ ନାୟକ ଚରିତ୍ର ନିର୍ବାହ କରିଥିଲେ ରଜନୀକାନ୍ତ ଓ ସନ୍ନି ଦେଓଲ । ଜୀ୫ ଓଟିଟି ପ୍ଲାଟଫର୍ମରେ ଏହି ଫିଲ୍ମଟି ଆପଣ ଦେଖିପାରିବେ ।
ସଦ୍ମା
‘ସଦ୍ମା’ ମୁକ୍ତିଲାଭ କରିଥିଲା ୧୯୮୩ରେ । ବାଲୁ ମହେନ୍ଦ୍ର ଥିଲେ ଏ ଫିଲ୍ମର ନିର୍ଦ୍ଦେଶକ । ଏଥିରେ ଶ୍ରୀଦେବୀ ଓ କମଲ ହାସନ ମୁଖ୍ୟ ଚରିତ୍ରରେ ଦେଖିବାକୁ ମିଳିଥିଲେ । ଏହା ଏକ ଖୁବ୍ ବଢ଼ିଆ ଚଳଚ୍ଚିତ୍ର । ଶ୍ରୀଦେବୀ ଏଥିରେ ଉଲ୍ଲେଖନୀୟ ଅଭିନୟ କରିଥିଲେ । ୟୁଟ୍ୟୁବରେ ଆପଣ ଏ ଫିଲ୍ମଟିକୁ ଦେଖିପାରିବେ ।
