ମାଲକାନଗିରି, ୨୫।୮ : ମାଲକାନଗିରି ଜିଲ୍ଲାରେ ଲଷ୍ମୀ ଏସି ବସ ଚଳାଚଳକୁ ବିରୋଧ କରି ଘରୋଇ ବସ ମାଲିକ ସଂଘ ଆସନ୍ତା ୨୭ତାରିଖରୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ଜିଲ୍ଲାରେ ବସ ଚଳାଚଳକୁ ବନ୍ଦ କରିବ ବୋଲି ଚେତାବନୀ ଦେଇଛି। ମାଲକାନଗିରି ଜିଲ୍ଲା ଘରୋଇ ବସ ମାଲିକ ସଂଘ ସଭାପତି ରାଜଶ୍ରୀ ପ୍ରଧାନ ସୂଚନା ଦେଇଛନ୍ତି।  

ସରକାରଙ୍କ ଦ୍ବାରା ଲକ୍ଷ୍ମୀ ବସ୍ ଯୋଜନାର ଶ୍ରେଣୀ-୧ ର ପଞ୍ଚାୟତ ଠାରୁ ବ୍ଲକକୁ ଯାତ୍ରୀଙ୍କ ସୁବିଧା ପାଇଁ ଚଳାଚଳ କରୁଥିବା ବସକୁ ସ୍ବାଗତ କରାଯାଉଛି ।  ଶ୍ରେଣୀ-୨ ବ୍ଲକ ହେର୍ଡ କ୍ଵାଟର ଠାରୁ ମାଲକାନଗିରି ଜିଲ୍ଲା ହେର୍ଡ କ୍ଵାଟରକୁ ଚଳାଚଳ କରୁଥିବା ଲଷ୍ମୀ ଏସି ବସକୁ ବିରୋଧ କରାଯାଉଛି। ଏହାକୁ ନେଇ ଗତ କିଛିମାସ ତଳେ ଜିଲ୍ଲା ତଥା ରାଜ୍ୟର ସମସ୍ତ ସଂଘ ଏବଂ ରାଜ୍ୟ ଫେଡେରେସନ ପ୍ରତିବାଦ ସ୍ଵରୂପ ସାରା ରାଜ୍ୟରେ ବସ ଚଳାଚଳ ବନ୍ଦ କରି ଧର୍ମଘଟ କରାଯାଇଥିଲା । ଇତିମଧ୍ୟରେ ଗତ ଜୁଲାଇ ମାସରେ  ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରି ଆମର ଦାବି ଜଣାଇଥିଲୁ। ଆମର ଦାବିକୁ ଅତିଶୀଘ୍ର ବିଚାର କରାଯିବ ବୋଲି   ମୁଖ୍ୟମନ୍ତ୍ରୀ ପ୍ରତିଶୃତି ଦେଇଥିଲେ। ଗତ. ୧୫ତାରିଖ ଦିନ ମାଲକାନଗିରି ପରିବହନ ଅଧିକାରୀଙ୍କୁ ସାକ୍ଷାତ କରି ପୁଣି ଅଭିଯୋଗ ଜଣାଇଥିଲୁ। ଏସି. ବସ୍ ପରମିଟ୍ ବାତିଲ କରି ତାରିଖ ୧.୮.୨୦୨୪ରେ ବସ୍ ଚଳାଚଳ ବନ୍ଦ କରାଯାଇଥିଲା। କିନ୍ତୁ ହଠାତ୍ ୨୧.୮.୨୦୨୪ ତାରିଖ ଠାରୁ ଏସି ବସ୍ ଚାଲୁଅଛି । ଏଣୁ ସଂଘ ପକ୍ଷରୁ ଏହାକୁ ପ୍ରତିବାଦ କରି ଜିଲ୍ଲାପାଳଙ୍କୁ ସାକ୍ଷାତ କରି ଅଭିଯୋଗ ପତ୍ର ଦିଆଯାଇଛି।

କାରଣ ଯଦି ଏସି ବସ ଚାଲେ  ମାଲିକମାନଙ୍କ ପକ୍ଷେ ଘରୋଇ ବସ୍ ଚଳାଇବା ଅସମ୍ଭବ ହେବ । ଏଣୁ ସଂଘ ପକ୍ଷରୁ ବାଧ୍ୟ ହୋଇ  ଆସନ୍ତା ୨୭ ତାରିଖରୁ  ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ  ଘରୋଇ ବସ୍ ସମଗ୍ର ମାଲକାନଗିରି ଜିଲ୍ଲା ଓ ରାତ୍ର ଦୂର ଗାମୀ ବସ ଗୁଡିକ ଚଳାଚଳ ବନ୍ଦ କରାଯାଇ ଧର୍ମଘଟ କରିବା ପାଇଁ ସଂଘ ପକ୍ଷରୁ ଆହ୍ୱାନ ଦିଆଯାଇଛି। 

ଏହା ଦ୍ୱାରା ମାଲକାନଗିରି ଜିଲ୍ଲାରୁ ଚଳାଚଳ କରୁଥିବା ସମସ୍ତ ପଞ୍ଚାୟତ, ବ୍ଲକ ସହିତ ଜୟପୁର, କୋରାପୁଟ, ନବରଙ୍ଗପୁର,ରାୟଗଡା, ଭବାନୀପାଟଣା, କଳାହାଣ୍ଡି, ବଲାଙ୍ଗୀର, ସମ୍ବଲପୁର, ବରଗଡ଼, ଭୁବନେଶ୍ୱର, କଟକ, ଛତିଶଗଡ଼, ହାଇଦ୍ରାବାଦ, ଆଦି ଦୂରଗାମୀ ବସ ଗୁଡିକ ମଧ୍ୟ ବନ୍ଦ ରହିବ, ଯାତ୍ରୀଙ୍କ ଅସୁବିଧା ପାଇଁ ସରକାର ଦାୟୀ ରହିବେ ବୋଲି ସଂଘ ପକ୍ଷରୁ କୁହାଯାଇଛି। ଏହି ସାମ୍ବାଦିକ ସମ୍ମିଳନୀରେ ଜିଲ୍ଲା ଘରୋଇ ବସ ମାଲିକ ସଂଘର ସମ୍ପାଦକ ଇ.ଭେଙ୍କଟ ରାଓ,ପି.ରାଜେଶ୍ ପାତ୍ର, ସପନ ଦତ୍ତ, ସୁନିଲ ଦତ୍ତ, ରବି ଖରା, ଛବି ଦାସ, ଆଶୋକ ରାଉତଙ୍କ ସମେତ ଅନ୍ୟ ମାଲିକ ଉପସ୍ଥିତ ଥିଲେ ।