ନୂଆଦିଲ୍ଲୀ,୨୯।୯: ନିଜକୁ ନିଜେ ବିବାହ କରି ଖୁବ୍ ଚର୍ଚ୍ଚାରେ ଆସିଥିଲେ ତୁର୍କୀ ଟିକଟକ୍ ଷ୍ଟାର କୁବରା ଅୟକୁତ୍। ହେଲେ ୨୬ ବର୍ଷୀୟ କୁବରାଙ୍କ ମୃତଦେହ ସେ ରହୁଥିବା ସୁଲତାନବେଲିର ଲଗଜରୀ ଆପାର୍ଟମେଣ୍ଟ ଭିତରୁ ଉଦ୍ଧାର କରାଯାଇଛି। ଏହି ଆପାର୍ଟମେଣ୍ଟର ପଞ୍ଚମ ମହଲାରୁ ଡେଇଁ ସେ କରିଛନ୍ତି ଆତ୍ମହତ୍ୟା। ସ୍ଥାନୀୟ ଅଧିକାରୀ ମୃତ ଶରୀର ନିକଟରୁ ଏକ ସୁସାଇଡ୍ ନୋଟ୍ ଜବତ କରିଛନ୍ତି।ଏହାକୁ ଆତ୍ମହତ୍ୟା ବୋଲି କୁହାଯାଉଛି। ତେବେ ତାଙ୍କ ମୃତ୍ୟୁ କିଭଳି ପରିସ୍ଥିତିରେ ହୋଇଛି ସେ ନେଇ ତଦନ୍ତ ଚାଲିଛି।
ନିଜ ଭାଇରାଲ ‘ଓ୍ବେଡି ଓ୍ବିଦଆଉଟ ଏ ଗ୍ରୁମ୍’ ଭିଡିଓ ପାଇଁ ପ୍ରସିଦ୍ଧ ଅୟକୁତଙ୍କ ପ୍ରଶଂସକ ସୋସିଆଲ ମିଡିଆ ପୋଷ୍ଟରେ ନିଜର ଚିନ୍ତାକୁ ସେୟାର କରି କହିଛନ୍ତି, ନିଜ ମୃତ୍ୟୁ ପୂର୍ବରୁ ଅୟକୁତ ଲଗାତାର ଚିନ୍ତାରେ ଥିବା ଭଳି ପୋଷ୍ଟ ସେୟାର କରୁଥିଲେ। ନିକଟରେ ସେ ନିଜ ଶରୀରର ଓଜନକୁ ନେଇ ଏକ ପୋଷ୍ଟ କରିଥିଲେ। ନିଜର ଶେଷ ପୋଷ୍ଟରେ ଅୟକୁତ ଲେଖିଥିଲେ ମୁଁ ନିଜର ପୁରା ଶକ୍ତି ଲଗାଇ ଦେଇଛି, କିନ୍ତୁ ତଥାପି ଓଜନ ବଢୁନି। ପ୍ରତିଦିନ ମୋ ଗୋଟିଏ କେଜି ଓଜନ କମୁଛି। ମୋତେ ଜଣାପଡୁଛି ମୋତେ କ’ଣ କରିବା ଦରକାର ?
ନିଜର ଭାଇରାଲ ଭିଡିଓରେ ଅୟକୁତ୍ ପରମ୍ପରାଠାରୁ ଅଲଗା ଟିକଟକ୍ରେ ଏକ ଅଲଗା ପରିଚୟ ସୃଷ୍ଟି କରିଥିଲେ। ଏହି ଭିଡିଓରେ ସେ ଘୋଷଣା କରିଥିଲେ, ମୁଁ ନିଜ ପାଇଁ ଏକ ଯୋଗ୍ୟ ବର ଖୋଜି ପାରିନି। ଏହାପରେ ଅୟକୁତ ନିଜକୁ ନିଜେ ବିବାହ କରିଥିଲେ।ତାଙ୍କର ମୃତ୍ୟୁର ଖବର ଏବେ ସୋସିଆଲ ମିଡିଆରେ ଶୋକର ଛାୟା ଖେଳାଇ ଦେଇଛି।
