ଭୁବନେଶ୍ୱର ୦୬/୦୭: ଏକାଅଶି ବର୍ଷ ବୟସ୍କ ସଂପ୍ରତି ଆସୀନ ଆମେରିକାର ରାଷ୍ଟ୍ରପତି ଜୋ ବାଇଡେନ ଜଣେ ଉଚ୍ଚ ଅଭିଜ୍ଞତାସଂପନ୍ନ ରାଜନେତା। ମାତ୍ର ୩୦ବର୍ଷ ବୟସରେ ପ୍ରତିପକ୍ଷ ରିପବ୍ଲିକାନ ପ୍ରାର୍ଥୀଙ୍କୁ ହରାଇ ସେ ଜିଲ୍ଲାସ୍ତରର ଏକ ପ୍ରମୁଖ ପଦବିରେ ଜୟଯୁକ୍ତ ହୋଇଥିଲେ । ତାଙ୍କ ଦୀର୍ଘ ରାଜନୈତିକ ଜୀବନରେ ସେ ଅନେକ ନିର୍ବାଚନୀ ଯୁଦ୍ଧରେ ଭାଗନେଇ ଯଶସ୍ୱୀ ହୋଇଛନ୍ତି । ବର୍ତ୍ତମାନ ସେ ରାଷ୍ଟ୍ରପତି ଭାବେ ପୁନଃନିର୍ବାଚିତ ହେବାପାଇଁ ଡୋନାଲଡ ଟ୍ରମ୍ପଙ୍କ ସହ କଡ଼ା ମୁକାବିଲାର ସମ୍ମୁଖୀନ ହେଇଛନ୍ତି । ଆମେରିକା ନିର୍ବାଚନରେ ସାମାଜିକ ଗଣମାଧ୍ୟମର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ତେଣୁ ପ୍ରାର୍ଥୀଦ୍ୱୟ ନିଜର ପ୍ରିୟ ସେଲିବ୍ରିଟିମାନଙ୍କୁ ବାଛି ବାଛି ସେମାନଙ୍କୁ ନିଜ ପଟକୁ ଆଣିବା ସକାଶେ ତତ୍ପର ହେଇଥାନ୍ତି ।
ଏହି ପରିପ୍ରେକ୍ଷୀରେ ଗାୟିକା ଟେଲର ସ୍ୱିଫ୍ଟଙ୍କ ଚାହିଦା ବଢ଼ିଯାଇଛି । ତାଙ୍କ ଲୋକପ୍ରିୟତା ସଂପର୍କରେ ପ୍ରମାଣ ମିଳେ ତାଙ୍କ ଅନୁସରଣକାରଙ୍କ ବିପୁଳ ସଂଖ୍ୟାରୁ । ତାଙ୍କ ଇନଷ୍ଟାଗ୍ରାମରେ ୨୮୦ ନିୟୁତ ଅନୁଗାମୀ ଥିବାବେଳେ ୟୁଟ୍ୟୁବରେ ଏହି ସଂଖ୍ୟା ୫୭ ନିୟୁତ। ଟେଲର ସ୍ୱିଫ୍ଟ ରାଜନୀତି ସହ ସଂପୃକ୍ତ ନାହାଁନ୍ତି । ତଥାପି ପ୍ରାର୍ଥୀମାନେ ତାଙ୍କ ଆଡ଼କୁ କେମିତି ଢଳି ସମର୍ଥନ କରିବେ, ସେଥିପାଇଁ ପ୍ରତିଦ୍ୱନ୍ଦ୍ୱୀମାନେ ଉଦ୍ଗ୍ରୀବ । ଏହାର କାରଣ ହେଉଛି, ଗୋଟିଏ ସର୍ଭେରୁ ଜଣାପଡ଼ିଥିବା ଫଳାଫଳ । ପନ୍ଦର ଶହ ବ୍ୟକ୍ତି ଭାଗ ନେଇଥିବା ଏହି ଜନମତରେ ସିଦ୍ଧ ହେଲା ଯେ, ଅର୍ଦ୍ଧାଧିକ ବ୍ୟକ୍ତି (୫୫%) ଜଣାଇଥିଲେ ଯେ ସେମାନେ ଜୋ କିମ୍ବା ଟ୍ରମ୍ପଙ୍କ ବିଷୟରେ ଯେତେ ଆଗ୍ରହୀ ନୁହଁନ୍ତି, ତଦପେକ୍ଷା ଟେଲର ସ୍ୱିଫ୍ଟଙ୍କ ପସନ୍ଦକୁ ଅଧିକ ଜୋର ଦିଅନ୍ତି ଏବଂ ତଦନୁସାରେ ମନ ସ୍ଥିର କରିବେ । ଏହି ବିଷୟଟି ଜୋ ବାଇଡେନ ଭଲଭାବେ ବୁଝିପାରିଥିଲେ । ଗୋଟିଏ ପ୍ରଶ୍ନର ଉତ୍ତର ଦେବାକୁ ଯାଇ ସ୍ପଷ୍ଟ ସଙ୍କେତ ଦେଲେ ଯେ, ସୁନ୍ଦରୀ ଗାୟିକା ଯାହାକୁ ଚାହିଁବେ ଜିତାଇବେ ।
ବାଇଡେନଙ୍କ ଟିପ୍ପଣୀ ଅବାନ୍ତର ନୁହେଁ । କେବଳ ରାଜନୀତି ନୁହେଁ, ଅନ୍ୟ କ୍ଷେତ୍ରରେ ଏହା ବାସ୍ତବରେ ପରୀକ୍ଷିତ ହୋଇଛି । ୧୯୮୧ରେ ଆମେରିକାର ନ୍ୟୁୟର୍କରେ ଭୂମିଷ୍ଠ ହୋଇଥିବା ଅଭିନେତ୍ରୀ ସଂଗୀତକାର ତଥା କଳାକାର ଆଲିସିଆ କୀଜ ସେପ୍ଟେମ୍ବର ୨୦୧୭ରେ ଥରେ ବ୍ରାଜିଲର ରିଓ-ଡି ଜେନିରୋ ଠାରେ ଷ୍ଟେଜ୍ ସୋ’ ପାଇଁ ଯାଇଥିଲେ । ନିୟମାନୁସାରେ ସେ ଯେତେବେଳେ ପୋଲିସର ତଦାରଖ ପାଇଁ ଥାନାରେ ପହଞ୍ଚି ଗାଡ଼ିରୁ ଓହ୍ଲାଇଲେ, ରାସ୍ତାରେ ଯାଉଥିବା ଲୋକେ ଶହ ଶହ ସଂଖ୍ୟାରେ ତାଙ୍କୁ ଦେଖି ଅଭିନନ୍ଦନ ଜଣାଇବାକୁ ଠେଲାପେଲା ଆରମ୍ଭ କଲେ । ତାଙ୍କର ଫଟୋ ଉତ୍ତୋଳନ ପାଇଁ ପ୍ରବଳ ପ୍ରତିଯୋଗିତା ଲାଗିଲା । ଆଲିସିଆ ସାଧାରଣତଃ ମେକ୍ଅପ୍ ନକରି ନିଜ ପ୍ରକୃତ ମୁଖମଣ୍ଡଳକୁ ସର୍ବସାଧାରଣରେ ପ୍ରଦର୍ଶନ କରିବାକୁ ପସନ୍ଦ କରିଥାନ୍ତି । ଏମିତି ନିରାଡମ୍ବରତା ସତ୍ତେ୍ୱ ସେ ଆକର୍ଷଣର ବିନ୍ଦୁ ପାଲଟି ଯାଇଥାନ୍ତି ତାଙ୍କ ଅସଂଖ୍ୟ ଫ୍ୟାନ ମହଲରେ । ଅବସ୍ଥା ଏମିତି ଅଣାୟତ୍ତ ହେଲା ଯେ, ସେ ଯନ୍ତାରେ ପଡ଼ିଯାଇଥିବା ପରି ଅସ୍ୱସ୍ତି ବୋଧ କଲେ । ଏହି ଭିଡ଼ରୁ ନିସ୍ତାର ପାଇବାକୁ ପୋଲିସକୁ ହସ୍ତକ୍ଷେପ କରିବାକୁ ପଡ଼ିଲା ।
ଏହି ମର୍ମରେ ତାଙ୍କର ଏକ ଉଦ୍ଧୃତିରେ ରହିଛି ନାରୀମାନଙ୍କ ସଂପର୍କରେ ଭାବନା । ‘ସମଗ୍ର ପୃଥିବୀରେ ଯେତେ ପ୍ରକାର ଜୀବ ଅଛନ୍ତି, ସେମାନଙ୍କ ମଧ୍ୟରେ ନାରୀମାନେ ହେଉଛନ୍ତି ସବୁଠାରୁ ଅଧିକ ଆନନ୍ଦଦାୟିନୀ, ଚମତ୍କାର (ଗର୍ଜିଅସ) । ଅନେକ ପ୍ରଶ୍ନ ଉଠାଇପାରନ୍ତି ଯେ, ବାଇଡେନଙ୍କ ଅନୁଭବ ହେଉ କିମ୍ବା ଆଲିସିଆଙ୍କ ଘଟଣା³ ଏଥିରେ କଣ ଅଛି ଯେ ଏହା ଏଠାରେ ଉପସ୍ଥାପନା କରିବାକୁ ପଡ଼ିଛି? ସୁନ୍ଦରୀମାନଙ୍କ ସଂପର୍କରେ କେଉଁ ଆବହମାନ କାଳରୁ ଏମିତି ଧାରଣା ରହିଆସିଛି ।
ଏଥିପାଇଁ ନୀତି ଶ୍ଳୋକରେ ଦେଖିବାକୁ ମିଳେ: ଋଣକର୍ତ୍ତା ପିତା ଶତ୍ରୁଃ, ମାତା ଚ ବ୍ୟଭିଚାରିଣୀ/ ଭାର୍ଯ୍ୟା ରୂପବତୀ ଶତ୍ରୁଃ, ପୁତ୍ରଃ ଶତ୍ରୁର ପଣ୍ଡିତଃ । (ଚାଣକ୍ୟ) । ଏଥିରେ ଶତ୍ରୁମାନଙ୍କୁ ଚିହ୍ନଟ କରାଯାଇଛି ଯେ, ଋଣ କରିଥିବା ପିତା, ବ୍ୟଭିଚାରିଣୀ ମାତା ଓ ମୂର୍ଖ ପୁତ୍ର ଶତ୍ରୁ ରୂପେ ପରିଗଣିତ ହୋଇଛନ୍ତି । କିନ୍ତୁ ଏହି ତାଲିକାରେ ରୂପବତୀ ଭାର୍ଯ୍ୟା ମଧ୍ୟ ସ୍ଥାନିତ ହୋଇଛି । ଏହାର କାରଣ ସୁସ୍ପଷ୍ଟ । ଶୋଭାମୟୀମାନଙ୍କ ପ୍ରତି ଅନେକ ବ୍ୟକ୍ତି (ମୁଖ୍ୟତଃ ପୁରୁଷ)ଙ୍କ ଲୋଲୁପ ଦୃଷ୍ଟି ପଡ଼ିଥାଏ ।
କଥା ହେଉଛି, ପୁରୁଷଙ୍କ ଚରିତ୍ର ପ୍ରାଚୀନ କାଳରେ ଯାହା ଥିଲା, ଏଇ ଯୁଗରେ ସେମିତି ଅପରିବର୍ତ୍ତିତ ହୋଇ ରହିଛି । ତାହେଲେ ଆମେ କାହିଁକି ଆସ୍ଫାଳନ କରିବା ଯେ ଆମେ ଉନ୍ନତି ପଥରେ ବେଗଗାମୀ । ପୁରୁଣାକାଳିଆ ମଣିଷମାନେ କାହିଁ କେତେ ପଛରେ ରହିଥିଲେ ତାହା ଅକଳ୍ପନୀୟ । ତଥାପି ବାସ୍ତବରେ ବୈଜ୍ଞାନିକ ଓ ପ୍ରଯୁକ୍ତିବିଦ୍ୟାର ଉତ୍କର୍ଷ ଯୋଗୁଁ ଆମେ ଚମତ୍କାର ସୃଷ୍ଟି କରିପାରିଛେ, ଯାହା ଆମ ଦାବିକୁ ଯାଥାର୍ଥ୍ୟ ପ୍ରଦାନ କରିବ ।
ନଭେମ୍ବର ୨୦୨୨ରେ ଚାଟଜିପିଟି ନାମକ ଏକ କଥା କହିପାରୁଥିବା କୃତ୍ରିମ ବୁଦ୍ଧିମତା (ଏଆଇ) ପ୍ରଥମେ ଓପେନ ଏଆଇ’ର ସିଇଓ ସାମ ଆଲଟମାନଙ୍କ ଦ୍ୱାରା ମୁକ୍ତିଲାଭ କଲା । ଏଇ ମଡେଲଟିର ବ୍ୟବହାରୀଙ୍କ ସଂଖ୍ୟା ପ୍ରଥମେ ଶହେ ମିଲିଅନ (ଦଶକୋଟି) ଥିଲା, ଯାହା ମାସିକ ୬୨୭ ମିଲିଅନକୁ ଜୁନ ୨୦୨୪ରେ ଛୁଇଁଥିବା ପ୍ରକାଶ । ଏଥିରୁ ଏହି ମଡେଲର କ୍ରମବର୍ଦ୍ଧିଷ୍ଣୁ ଲୋକପ୍ରିୟତା କଳନା କରାଯାଇପାରେ । ତେଣୁ ଅଧୁନା ବିଭିନ୍ନ କମ୍ପାନୀ ଓ ବ୍ୟବସାୟୀମାନେ ଏଇ ସୁଯୋଗ ହାତଛଡ଼ା କରିବାକୁ ଚାହୁଁନାହାଁନ୍ତି ।
ଚାଟଜିପିଟିର ସଫଳତା ପରେ ଅନେକ ଉଦ୍ଯୋଗୀ ନିଜ ଆନୁକୂଲ୍ୟରେ ଅନେକ ଚାଟବୋଟ୍ ନିର୍ମାଣ କରିଛନ୍ତି ଯଥା-ମାଇକ୍ରୋସଫ୍ଟ କୋପାଇଲଟ । ଏହି ସାଧନରେ ଚାହିଦା ବଢ଼ିବା ପଛରେ କାରଣ କ’ଣ ଜାଣିବା ପାଇଁ ବଜାର ଅନୁଧ୍ୟାନକାରୀମାନେ ଧ୍ୟାନ ଦେଇଛନ୍ତି । ଦର୍ଶକମାନେ ଚାଟବୋଟରେ ମୁଖ୍ୟତଃ ଯାହା ଦେଖନ୍ତି ତାହା ହେଉଛି ଜଣେ ମଣିଷର ମୁଖମଣ୍ଡଳ । ତେବେ ଏହି ମୁଖଟି ପୁରୁଷ ହେଇପାରେ କିମ୍ବା ନାରୀର । ଚାଳିଶ ହଜାର ପ୍ରୋଫାଇଲ ଯାଞ୍ଚ କରିବା ପରେ ଜଣାପଡ଼ିଲା, ଯଦି ଏହି ମୁହଁଟି ପୁରୁଷର ନହୋଇ ନାରୀର ହେବ ତାହେଲେ ଦର୍ଶନ ସଂଖ୍ୟା ତିନିଗୁଣ ବଢ଼ିଯିବ । ଏହାର କାରଣ ହେଉଛି ଲିଙ୍ଗଗତ ବିଚାରରେ ଯୁଗ ଯୁଗ ଧରି ଚଳିଆସିଥିବା ପରମ୍ପରାଗତ ଚରିତ୍ର ସ୍ତ୍ରୀଙ୍କ ପ୍ରତି ପୁରୁଷଙ୍କ ଯୌନ ଆକର୍ଷଣ, ଯାହା ଅର୍ଥାନ୍ତରେ ଯୁକ୍ତାତ୍ମକ ଚାର୍ଜର ଋଣାତ୍ମକ ସଦୃଶ । ଏହା ଅଧିକ ଶକ୍ତ ହୋଇଥାଏ, ଯଦି ନାରୀଟି ରୂପସୀ । ଏହା ଏକ ଚିରାଚରିତ ଚରିତ୍ର ।
ତେଣୁ ଏମିତି ଏକ ଚେହେରା ପରଦାରେ ଦେଖାଇବା ପାଇଁ ଗବେଷକମାନେ ପ୍ରଯତ୍ନଶୀଳ । ଓଠ ହେବ ପରିପୁଷ୍ଟ ଓ ରସାଳ । ଚର୍ମରେ ଦାଗ ନଥିବ । ଚଉଡ଼ା ଆଖି ଦ୍ୱାରା ଏମିତି ଠାଣି ସାମନାକୁ ଆସିବ ଯାହା ଅନେକ କିଛି କଥା କହେ । କେବଳ ଚେହେରା ନୁହେଁ³ ସ୍ୱର ମଧ୍ୟ ଯେମିତି ଦର୍ଶକଙ୍କୁ ବାନ୍ଧି ରଖିପାରିବ । (ଗ୍ଲୋବାଲ, ଟାଇମ୍ସ ଅଫ୍ ଇଣ୍ଡିଆ, ୧୪ ଜୁନ ୨୦୨୪) ।
ସିଇଓ ସାମ୍ ଆଲଟମାନ ଉଚ୍ଚ ଆଶା ନେଇ ଲୋଭନୀୟ ସ୍ୱର ଆହରଣ କରିବା ସକାଶେ ପ୍ରସିଦ୍ଧ ଗାୟିକା ସ୍କାର୍ଲେଟ ଜନସନ (ଜନ୍ମ: ୧୯୪୮ ମସିହା, ଜନ୍ମସ୍ଥାନ: ମ୍ୟାନହଟନ, ନ୍ୟୁୟର୍କ)ଙ୍କୁ ସ୍ୱର-ଉଧାର ପାଇଁ ଭେଟିଲେ । କିନ୍ତୁ ସେ ରୋକଠୋକ ମନା କରି କୃଦ୍ଧ ହୋଇ ଉତ୍ତର ଦେଲେ- ତାଙ୍କ ନିଜସ୍ୱ ସ୍ୱରକୁ ଏକ ଯନ୍ତ୍ରରେ ପୂରାଇ ତାହା ବିଚିତ୍ର ଓ ଭୟଙ୍କର କରିବାକୁ ଦେବେନାହିଁ । ବାସ୍ତବରେ ତାହା ହେଉଛି ନୈସର୍ଗିକ ।
ଚାଟବୋଟରେ ଆମେ ଯେଉଁ ମହିଳାଟିକୁ ଦେଖୁ ତାହା ଅପ୍ରାକୃତିକ । ଯେତେ ଯାହା ଚେଷ୍ଟା କଲେ ତାହା କ’ଣ ଜୀବନ୍ତ ହୋଇପାରିବ? ସେଥିରେ କ’ଣ ଶିରା, ପ୍ରଶିରା, ମେଦ, ମାଂସ ରହିଛି? କିଛି ଯନ୍ତ୍ରପାତି ଓ ଟେକ୍ନୋଲୋଜି ପ୍ରସୂତ ଉପାଦାନ କ’ଣ ଜୀବନ ଦାନ କରିବାରେ ସମର୍ଥ? ଏହା ହେଉଛି ନିଜେ ଓ ନିଜ ପରି ମଧ୍ୟରେ ପାର୍ଥକ୍ୟ । କହିବା ବାହୁଲ୍ୟ ଯେ, ସଂଜୀବନୀ ମନ୍ତ୍ର ସର୍ବନିୟନ୍ତା ଈଶ୍ୱରଙ୍କ ପାଖରେ କେବଳ ଅଛି । ଏହି ପ୍ରସଙ୍ଗରେ ବିଜ୍ଞାନୀମାନେ ନିଜ ସୀମା ଅତିକ୍ରମ କରିବା ଚେଷ୍ଟାରୁ କ୍ଷାନ୍ତ ରହନ୍ତୁ ବିନୀତ ଭାବେ ।
