ଭୁବନେଶ୍ୱର, ୩।୧୧: ଯୁବ ଓ ଛାତ୍ର କଂଗ୍ରେସ ଭଳି ନିଆରା ଢଙ୍ଗରେ ପିଆଜ ବିକ୍ରିର ପ୍ରତିବାଦ କରିଛି ଭୁବନେଶ୍ୱର ଜିଲ୍ଲା ମହିଳା କଂଗ୍ରେସ । କଂଗ୍ରେସ କାର୍ଯ୍ୟାଳୟରୁ ଏକ ଶୋଭାଯାତ୍ରାରେ ବାହାରି ମାଷ୍ଟରକ୍ୟାଣ୍ଟିନ୍‌ ଛକରେ ପିଆଜି କେଜି ପ୍ରତି ୩୦ ଟଙ୍କାରେ ବ୍ରିକି କରିଛି । ଏହି ଅବସରରେ ଭୁବନେଶ୍ୱର ଜିଲ୍ଲା ମହିଳା କଂଗ୍ରେସ ସଭାନେତ୍ରୀ ଗୀତାଞ୍ଜଳି ମହାନ୍ତି କହିଥିଲେ, ରାଜ୍ୟରେ ପିଆଜ ବଜାରରେ ନିଆଁ ଲାଗିଛି । ୨୩ ବର୍ଷର ଏ ଅପରାଗ ସରକାର ପ୍ରତିବର୍ଷ ରାଜ୍ୟର ଖାଉଟିମାନଙ୍କୁ ପିଆଜ ଓ ଆଳୁକୁ ଚଢ଼ା ଦାମରେ ବିକ୍ରି କରାଇ ହନ୍ତସନ୍ତ କରୁଛନ୍ତି । 

ରାଜ୍ୟରେ ୩.୯୫ ଲକ୍ଷ ମେଟ୍ରିକ ଟନ୍‌ ପିଆଜ ଉତ୍ପାଦନ ହେଉଛି ବୋଲି ରାଜ୍ୟ ଉଦ୍ୟାନ ବିଭାଗର ଅଧିକାରୀମାନେ କହୁଥିଲାବେଳେ ରାଜ୍ୟର ଖାଦ୍ୟ ଓ ଯୋଗାଣ ବିଭାଗ ଭିନ୍ନ ତଥ୍ୟ ଦେଉଛନ୍ତି । ରାଜ୍ୟର କୃଷିମନ୍ତ୍ରୀ ବିଧାନସଭାରେ ରାଜ୍ୟର ୩.୭୫ ଲକ୍ଷ ମେଟ୍ରିକ ଟନ ପିଆଜ ଉତ୍ପାଦନ ହେଉଛି ବୋଲି କହୁଛନ୍ତି । ସରକାର ଓଡ଼ିଶା ପିଆଜ ଉତ୍ପାଦନରେ ସ୍ୱାବଲମ୍ୱୀ ବୋଲି କହୁଥିଲାବେଳେ କାହିଁକି ରାଜ୍ୟବାସୀ ପିଆଜ କିଲୋ ପ୍ରତି ୮୦ ଟଙ୍କା ଦେଇ କିଣୁଛନ୍ତି ବୋଲି ଶ୍ରୀମତୀ ମହାନ୍ତି ପ୍ରଶ୍ନ କରିଛନ୍ତି । ଏହି ପ୍ରତିବାଦ କାର୍ଯ୍ୟକ୍ରମରେ ଭୁବନେଶ୍ୱର ଜିଲ୍ଲାକଂଗ୍ରେସ ସଭାପତି ବିଶ୍ୱଜିତ୍‌ ଦାସ, ଶୁଭଦ୍ରା ମିଶ୍ର, ରଶ୍ମି ମହାପାତ୍ର, ଚୈତାଳୀ ପଟ୍ଟନାୟକ, ଶ୍ରୀୟାସ୍ମିତା ପଣ୍ଡା, ମାମିନା ବେହେରା, ଜୟଶ୍ରୀ ପାତ୍ର ପ୍ରମୁଖ ନେତୃତ୍ୱ ନେଇଥିଲେ ।