ଖଲ୍ଲିକୋଟ  : ଯାତ୍ରୀ ଉଠାଇବାକୁ ନେଇ ସରକାରୀ ଓ ଘରୋଇ ବସ ମଧ୍ୟରେ ଝଗଡ଼ା ହୋଇଛି ଏବଂ ସରକାରୀ ବସର ଅଭିଯୋଗ କ୍ରମେ ଦୁଇଟି ଯାକ ବସକୁ ଥାନାରେ ଅଟକ ରଖିଛି ପୋଲିସ। ଦୁଇ ବସର ଝଗଡା ମଧ୍ୟରେ ଯାତ୍ରୀମାନେ ହନ୍ତସନ୍ତ ହୋଇଛନ୍ତି।  ମିଳିଥିବା ସୂଚନା ଅନୁସାରେ , ଆର. ଉଦୟଗିରିରୁ ଭୁବନେଶ୍ୱର ଅଭିମୁଖେ ଯାଉଥିବା ଓ ଏସଆରଟିସିର ଏକ ବସ ନମ୍ବର ଓଡ଼ି ୦୨ ବିଟି ୨୫୪୦ ରାସ୍ତାରେ ଯାତ୍ରୀ ଉଠେଇଥିଲା । 

ତେବେ ପଛରେ ଆସିକାରୁ ଭୁବନେଶ୍ୱର ଅଭିମୁଖେ ଆସୁଥିବା ପୂଜାଫୁଲ ନାମକ ଏକ ଘରୋଇ ବସ ନମ୍ବର ଓଆର ୦୨ ଏଭି ୪୨୭୩ ଏହାର ପ୍ରତିବାଦ କରିବା ପାଇଁ ଦ୍ରୁତଗତିରେ ଆସି ଖଲ୍ଲିକୋଟ ପୂର୍ବରୁ ସରକାରୀ ବସକୁ ଓଭରଟେକ କରି ଆଗକୁ ଆସିବା ପରେ ହଠାତ ବ୍ରେକ୍‌ ମାରି ଥିଲା । ସରକାରୀ ବସ ମଧ୍ୟ ପଛରେ ହଠାତ୍‌ ବ୍ରେକ୍ ମାରିବାରୁ ବସ ଭିତରେ ଜଣେ ମହିଳା ଯାତ୍ରୀ ଭାରସାମ୍ୟ ହରାଇ ପଡି ଯିବାରୁ ତାଙ୍କ ମୁଣ୍ଡରେ ଆଘାତ ଲାଗିଥିଲା।

ଏହାକୁ ନେଇ ଦୁଇ ବସ ମଧ୍ୟରେ ପ୍ରବଳ ଝଗଡା ହୋଇଥିଲା। ଏହାପରେ ସରକାରୀ ବସର କର୍ମଚାରୀ ଖଲ୍ଲିକୋଟ ଥାନାରେ ଅଭିଯୋଗ କରିବା ପରେ ପୋଲିସ ଦୁଇଟି ଯାକ ବସକୁ ଥାନାରେ ଅଟକ ରଖିଥିଲେ। ଦୀର୍ଘ ସମୟ ଧରି ଦୁଇଟି ବସ ଅଟକ ରହିବା ଫଳରେ ଯାତ୍ରୀ ମାନେ ମଧ୍ୟ ନିଜ ନିଜର ଗନ୍ତବ୍ୟ ସ୍ଥଳକୁ ଯାଇ ନପାରି ଅଟକି ରହିଛନ୍ତି । ତେବେ ଖବର ସଂଗ୍ରହ ହେବା ସୁଦ୍ଧା ଦୁଇଟି ଯାକ ବସ ଥାନାରେ ଅଟକି ରହିଥିବା ଜଣାପଡିଛି।