ଫୁଲବାଣୀ, ୧୧/୯ :  ଏକ ନାବାଳିକା ବଳାତ୍କାର ମାମଲାର ଶୁଣାଣି କରି ଫୁଲବାଣୀ ପୋକ୍ସୋ କୋର୍ଟ ବିଚାରପତି ଅଭିଯୁକ୍ତକୁ ୨୦ ବର୍ଷ ଜେଲଦଣ୍ଡ ଆଦେଶ ଦେଇଛନ୍ତି । ଏଥିସହ ଅଭିଯୁକ୍ତକୁ ୫୫ହଜାର ଟଙ୍କା ଜରିମାନା କରାଯାଇଛି। ଜରିମାନା ଅନାଦେୟ ଦୋଷୀକୁ ଅଧିକ ୮ ମାସ ଜେଲ ଭୋଗିବାକୁ ପଡିବ ବୋଲି ଅଦାଲତ ତାଙ୍କ ରାୟରେ ଉଲ୍ଲେଖ କରିଛନ୍ତି । ଅଭିଯୁକ୍ତ ଜଣକ ହେଲେ କୋଟଗଡ ଥାନା ଅଞ୍ଚଳର କିଶାନ୍ତ ସାନସେଠ୍ (୩୨) । 

ସୂଚନା ଅନୁସାରେ, ଗତ ୨୦୨୩ ମସିହା ମେ ମାସ ୧୬ ତାରିଖ ଅପରାହ୍ନରେ ୧୦ ବର୍ଷିୟା ନାବାଳିକା ଏବଂ ତାଙ୍କର ଜଣେ ସାଙ୍ଗ ଘର ଆଗରେ ଖେଳୁଥିଲେ । ଏହି ସମୟରେ କୌଣସି କାରଣ ବଶତଃ ଉଭୟଙ୍କ ମଧ୍ୟରେ ଝଗଡା ହୋଇଥିଲା। ଫଳରେ ସାଙ୍ଗ ଜଣକ ରାଗି ଯାଇ କିଶାନ୍ତ ବଳାତ୍କାର କରିଥିବା କଥା କହିଥିଲା ।  ଏହି କଥା ପାଖରେ ଥିବା ପୀଡିତାଙ୍କ ମା’ ଶୁଣି ପାରି ସାଙ୍ଗକୁ ଡାକି ପଚାରିବା ପରେ ଜଣାପଡିଥିଲା ଯେ, ୭ ମାସ ପୂର୍ବରୁ ଅଭିଯୁକ୍ତ ଘରକୁ ଉଭୟ ପୀଡିତା ଓ ତାର ସାଙ୍ଗ ଟିଭି ଦେଖିବାକୁ ଯାଇଥିଲେ। ଏହି ସମୟରେ ଅଭିଯୁକ୍ତର ସ୍ତ୍ରୀ ନଦୀକୁ ଗାଧୋଇବାକୁ ଯାଇଥିଲେ। ଏହାର ସୁଯୋଗ ନେଇ ଅଭିଯୁକ୍ତ ପୀଡିତା ସାଙ୍ଗକୁ ତା ମା ଡାକୁଥିବା କହି ବାହାରକୁ ପଠେଇ ଦେଇ ପୀଡିତା ସହିତ ଦୁଷ୍କର୍ମ କରିଥିଲା । ଏ ବିଷୟରେ କାହାକୁ କହିଲେ ଜୀବନରେ ମାରିଦେବାକୁ ଧମକ ମଧ୍ୟ ଦେଇଥିଲା। ଫଳରେ ସେ ଭୟରେ କାହାକୁ କିଛି ଜଣାଇ ନ ଥିଲା । ଘଟଣା ବାବଦରେ ଜଣା ପଡିବା ପରେ ପୀଡିତାର ପରିବାର ଲୋକେ ମେ ମାସ ୨୦ ତାରିଖରେ  କୋଟଗଡ ଥାନାରେ ଏକ ଅଭିଯୋଗ କରିଥିଲେ। 

ଅଭିଯୋଗ ଅନୁସାରେ କୋଟଗଡ ପୁଲିସ କେଶ ନଂ ୫୪/୨୩ରେ ଏକ ମାମଲା ରୁଜ୍ଜୁ କରି ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଥିଲା । ଆଜି ଏହି ମାମଲାର ଶୁଣାଣି କରି ପୋକ୍ସୋ କୋର୍ଟ ବିଚାରପତି ରାଜେଶ ଦାସ ୧୨ ଜଣଙ୍କ ସାକ୍ଷୀଙ୍କ ବୟାନ, ଡାକ୍ତରୀ ରିପୋର୍ଟ ଏବଂ ପୀଡିତାଙ୍କ ବୟାନ ଆଧାରରେ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିବା ସହ ଉପରୋକ୍ତ ରାୟ ଶୁଣାଇଛନ୍ତି । ପୀଡିତାଙ୍କୁ ୬ ଲକ୍ଷ ଟଙ୍କାର କ୍ଷତିପୂରଣ ଦେବା ପାଇଁ  ଜିଲ୍ଲା ଆଇନ ସେବା ପ୍ରାଧିକରଣକୁ ନିର୍ଦ୍ଦେଶ ଦେଇଛନ୍ତି ଅଦାଲତ । ମାମଲାକୁ ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ଅସୀମ ପ୍ରହରାଜ ପରିଚାଳନା କରୁଥିଲେ।