ଭୁବନେଶ୍ୱର, ୨୦/୦୨ : ଧନଜୀବନ ଉଦ୍ଧାର ପାଇଁ ଜୀବନକୁ ବାଜି ଲଗାଉଛୁ। ବାତ୍ୟା, ଝଡ଼, ନିଆଁ ଭଳି ବିପତ୍ତିକୁ ପ୍ରତିଦିନ ସାମ୍ନା କରୁଛୁ । ହେଲେ, ସରକାର ଆମ ଦରମାରେ ପାତରଅନ୍ତର କରୁଛନ୍ତି । ସଂଘକୁ ଏଯାଏ ସ୍ୱୀକୃତି ମିଳିଲାନି । ଏଭଳି କ୍ଷୋଭ ପ୍ରକାଶ କରିଛନ୍ତି ଆଗ୍ନିକ, ଡ୍ରାଇଭର ଓ ହାବିଲଦାର । ଆସନ୍ତା ୨୧ ତାରିଖରୁ ୫ ହଜାର ଆଗ୍ନିକ କାର୍ଯ୍ୟବନ୍ଦ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି । 

ଓଡି଼ଶା ଅଗ୍ନିଶମ ସେବା ସଂସ୍ଥା କର୍ମଚାରୀମାନେ ସୋମବାର ଏକ ସାମ୍ବାଦିକ ସମ୍ମିଳନୀର ଆୟୋଜନ କରିଥିଲେ । ମୁଖ୍ୟ ଆଗ୍ନିକ ଅକ୍ଷୟ ପ୍ରଧାନ କହିଥିଲେ, ମୋଟ ୧୩ଟି ପଦବି ସ୍ତରରୁ ୧୧ଟି ପଦବୀରେ ଅବସ୍ଥାପିତ ଓଡି଼ଶା ଅଗ୍ନିଶମ ସେବା କର୍ମଚାରୀମାନେ ଓଡି଼ଶା ପୁଲିସ ସିପାହୀ ସ୍ତରରେ ଦରମା ପାଉଛନ୍ତି । କିନ୍ତୁ ବାକି ୨ଟି ସ୍ତର ପଦବିରେ ଥିବା ଆଗ୍ନିକ, ଡ୍ରାଇଭର, ହାବିଲଦାରମାନଙ୍କ ଦରମାରେ ପାତରଅନ୍ତର କରାଯାଉଛି । ଏହା ବିରୋଧରେ ଗତବର୍ଷ ଡିସେମ୍ବର ୧୧ରୁ ଜାନୁଆରୀ ୨୨ ତାରିଖ ଯାଏ କର୍ମଚାରୀମାନେ କଳାବ୍ୟାଜ୍‌ ପିନ୍ଧି ପ୍ରତିବାଦ କଲେ । କର୍ମଚାରୀଙ୍କ ପରିବାର ଲୋକ ମଧ୍ୟ ଗୋଟିଏ ବେଳା ଖାଦ୍ୟ ଗ୍ରହଣ କରି ଅଭିନବ ଉପାୟରେ ବିକ୍ଷୋଭ କଲେ । ସରକାର ନୀରବ ରହିବାରୁ ଆମେ ବାଧ୍ୟ ହୋଇ କାର୍ଯ୍ୟବନ୍ଦ ଆନ୍ଦୋଳନକୁ ଓହ୍ଲାଇବୁ । ପ୍ରାକୃତିକ ବିପର୍ଯ୍ୟୟ ଓ ବିପତ୍ତିରେ ଯାହା କ୍ଷତି ହେବ, ଏଥିପାଇଁ ସରକାର ଦାୟୀ ରହିବେ । ସାମ୍ବାଦିକ ସମ୍ମିଳନୀରେ ଜୟପ୍ରକାଶ ସେଠୀ, ନୀଳମାଧବ ସୁବୁଦ୍ଧି ପ୍ରମୁଖ ଉପସ୍ଥିତ ଥିଲେ ।