ବେତନଟୀ, ୦୭/୦୯ : ବେତନଟୀ ରେଳ ଷ୍ଟେସନ୍‌ରେ ଅଘଟଣ। ରୁପ୍ସାରୁ ବାଙ୍ଗିରିପୋଷି ଅଭିମୁଖେ ଯାଉଥିବା ଏକ ମେମୁ ଟ୍ରେନ୍ ବେତନଟୀ ଷ୍ଟେସନ ଅତିକ୍ରମ କରିବାର ମାତ୍ର ୫ ମିନିଟ୍ ପରେ ରେଳ ଧାରଣା ଉପରେ ଭୁଶୁଡ଼ି ପଡିଲା ଶତାୟୁ ବିଶାଳ ଶାଳଗଛ l ବେତନଟୀ ଷ୍ଟେସନଠାରୁ ମାତ୍ର ୨ ଶହ ମିଟର ଦୂରରେ ଏହି ଅଘଟଣ ଘଟିଛି। ଗଛ ତଳେ ଚାପି ହୋଇ ଜଣେ ମହିଳା ଗୁରୁତର ହୋଇଛନ୍ତି। ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।

ଗଛ ଭୁଶୁଡ଼ି ପଡ଼ିବା ଫଳରେ ବିଦ୍ୟୁତ ସରବରାହ ସମ୍ପୂର୍ଣ୍ଣ ବିଚ୍ଛେଦ ହୋଇଯାଇଛି l ବାଙ୍ଗିରିପୋଷି ଅଭିମୁଖେ ଯାଉଥିବା ମେମୁ ଟ୍ରେନ କେସିପୁର ଷ୍ଟେସନରେ ଅଟକି ରହିଛି l ଏପଟେ କେସିପୁର ଷ୍ଟେସନରେ ମେମୁ ଟ୍ରେନ ଅଟକି ରହିଥିବାରୁ ଭଞ୍ଜପୁର ଷ୍ଟେସନରେ ମରାମତି ପାଇଁ ରହିଥିବା ସହାୟକ ଟ୍ରେନ ଘଟଣାସ୍ଥଳରେ ପହଞ୍ଚି ପାରୁନାହିଁ l ଫଳରେ ବାଲେଶ୍ୱରରୁ ଏକ ଅତିରିକ୍ତ ଟ୍ରେନ୍ ମରାମତି ପାଇଁ ଘଟଣାସ୍ଥଳକୁ ଆସୁଥିବା ନେଇ ଉପସ୍ଥିତ ରେଳ ବିଭାଗର କର୍ମଚାରୀ ସୂଚନା ଦେଇଛନ୍ତି l