ରାଉରକେଲା,୦୫/୧୧: ରାଉରକେଲା ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟର ଆସିଷ୍ଟାଣ୍ଟ କଲେକ୍ଟର ସୁସ୍ମିତା ମିଞ୍ଜ (୩୫) ଙ୍କ ସନ୍ଦେହଜନକ ମୃତ୍ୟୁ ଘଟଣା ଅଡୁଆ ସୂତାରେ ଗୁଡାଇ ହୋଇଯାଇଥିବା ବେଳେ ଖୋଲିବାର ନାଁ ଧରୁନି । ପୋଷ୍ଟମର୍ଟମ ରିପୋର୍ଟ କହୁଛି ପାଣିରେ ଶ୍ୱାସରୁଦ୍ଧ ହୋଇ ସୁସ୍ମିତାଙ୍କ ମୃତ୍ୟୁ ଘଟିଛି । ଭେସ୍ରା ଯାଞ୍ଚ ପାଇଁ ଭୁବନେଶ୍ୱର ସ୍ଥିତ ଫରେନ୍ସିକ୍ ଲ୍ୟାବ୍କୁ ପଠା ଯାଇଥିଲା । ସେଥିରୁ ମଧ୍ୟରୁ ହତ୍ୟାକାଣ୍ଡ ନେଇ କୌଣସି ସୁରାକ୍ ମିଳିନଥିଲା ।
ଅପରପକ୍ଷେ ପରିବାର ସଦସ୍ୟ ଯେଉଁମାନଙ୍କ ବିରୋଧରେ ଅଭିଯୋଗ ଉଠାଇଥିଲେ, ସେମାନଙ୍କୁ ଜେରା ସରିଲାଣି । ତଥାପି ଏହି ହାଇପ୍ରୋଫାଇଲ୍ ହତ୍ୟାକାଣ୍ଡ ଘଟଣାର ଖୁଲାସା ଆଜି ଯାଏ ହୋଇପାରୁନି । ଏବେ ମୃତ ସୁସ୍ମିତାଙ୍ ମୋବାଇଲ୍ ଉପରେ ଭରସା କରିଛି ତଦନ୍ତକାରୀ ସେଲ୍ (ଏଚ୍ଆରପିସି) । ହେଲେ ସୁସ୍ମିତାଙ୍କ ମୋବାଇଲ୍ର ଲକ୍ ପାର୍ଟନ୍ ଖୋଲୁନଥିବାରୁ ତାହାକୁ ମଧ୍ୟ ଭୁବନେଶ୍ୱର ଲ୍ୟାବ୍କୁ ପଠାଯାଇଥିବା ବିଶେଷ ସୂତ୍ରରୁ ଜଣାପଡ଼ିଛି । ହେଲେ କେବେ ଏହି ହତ୍ୟାକାଣ୍ଡର ରହସ୍ୟ ଲୋକଲୋଚନକୁ ଆସିବ ଏବେ ତାହାକୁ ସହରବାସୀ ଅପେକ୍ଷା କରି ରହିଛନ୍ତି ।
ଆସିଷ୍ଟାଣ୍ଟ କଲେକ୍ଟର ସୁସ୍ମିତା ମୃତ୍ୟୁ ଘଟଣାର ତଦନ୍ତଭାର ସେପ୍ଟେମ୍ବର ୨୭ରେ ପୁଲିସ୍ ବିଭାଗର ମାନବଧିକାର ସୁରକ୍ଷା ସେଲ୍(ଏଚ୍ଆରପିସି) ନେଇଥିଲା । ମୃତ୍ୟୁ ପୂର୍ବରୁ ସୁସ୍ମିତା ରହିଥିବା ଦୁଇଟି ହୋଟେଲ ରୁମ୍କୁ ଯାଞ୍ଚ କରିବା ସହ ସମ୍ପୃକ୍ତ ହୋଟେଲର ମ୍ୟାନେଜର ଓ କର୍ମଚାରୀ ଏଚ୍ଆରପିସି ଡିଏସ୍ପିଙ୍କ ନିକଟରେ ହାଜର ହୋଇଥିଲେ । ସୁସ୍ମିତାଙ୍କ ମୃତଦେହ ମିଳିଥିବା ସେନ୍ସୋରୀ ପାର୍କରେ ତଦନ୍ତକାରୀ ଟିମ୍ ପହଞ୍ଚି ତନତନ କରି ଯାଞ୍ଚ କରିଥିଲା । ପରିବାର ସଦସ୍ୟଙ୍କ ସମେତ ଅଭିଯୋଗ ହୋଇଥିବା ସମସ୍ତ ବ୍ୟକ୍ତିଙ୍କୁ ଜେରା କରିଥିଲା । ସବୁ ଦିଗରୁ ତଦନ୍ତକାରୀ ଟିମ୍ ତଦନ୍ତ ସାରିଥିଲେ ମଧ୍ୟ ହତ୍ୟାକାଣ୍ଡ ଘଟଣାର ଗୁମର ଖୋଲିନି ।
