ନୂଆଦିଲ୍ଲୀ ୦୧/୦୨: କୁଛ୍ ଖଟ୍ଟା ହୋ ଜାୟେ’ରେ ଲିଡ୍ ଲେଡି ଭାବେ ନଜର ଆସିବେ ଅଭିନେତ୍ରୀ ସାଈ ମଞ୍ଜରେକର । ଏହି ଫିଲ୍ମ ଜରିଆରେ ଅଭିନୟ ଦୁନିଆରେ ପାଦ ଥାପିବାକୁ ଯାଉଛନ୍ତି ଲୋକପ୍ରିୟ ଗାୟକ ଗୁରୁ ରନ୍ଧାୱା । ଫିଲ୍ମରେ ପ୍ରମୁଖ ଭୂମିକାରେ ଅଭିନୟ କରିଛନ୍ତି ଅନୁପମ ଖେର । ନିର୍ମାତା ଗତ ସୋମବାର ଫିଲ୍ମର ନୂଆ ପୋଷ୍ଟର୍ ଜାରି କରି ଏହାର ରିଲିଜ୍ ତାରିଖ ଘୋଷଣା କରିଛନ୍ତି । ଫିଲ୍ମର ନିର୍ଦ୍ଦେଶନା ଦେଇଛନ୍ତି ଜି ଅଶୋକ । ଫିଲ୍ମର ପୋଷ୍ଟର୍ ଓ ଟିଜର୍କୁ ନେଇ ସାଈ ଖୁବ୍ ଉତ୍ସାହିତ ଅଛନ୍ତି । ଏକ ମଜାଦାର ଓ ସୁନ୍ଦର ଯାତ୍ରାରେ ସାମିଲ ହେବାକୁ ସେ ଫ୍ୟାନ୍ଙ୍କୁ ଆମନ୍ତ୍ରଣ କରିଛନ୍ତି ।
ଇନ୍ଷ୍ଟାଗ୍ରାମରେ ଗୁରୁ ରନ୍ଧାୱା ଫିଲ୍ମର ପୋଷ୍ଟର ଶେୟାର କରି ଲେଖିଛନ୍ତି ‘ପ୍ରେମ, ହସ ଓ ସର୍ପ୍ରାଇଜ୍ ଅପେକ୍ଷା କରିଛି! ଫିଲ୍ମ ‘କୁଛ୍ ଖଟ୍ଟା ହୋ ଜାୟେ’ରେ ସିର୍ଫିରା ମଜ୍ନୁ ଓ ସୁନ୍ଦରୀ ଲୈଲାଙ୍କର ଅଭୁଲା ଯାତ୍ରାରେ ଯୋଡ଼ି ହୁଅନ୍ତୁ ।’ ଆଜି ଅର୍ଥାତ୍ ମଙ୍ଗଳବାର ଫିଲ୍ମର ଟିଜର୍ ଜାରି ହେବ ବୋଲି ଗୁରୁ ଉଲ୍ଲେଖ କରିଛନ୍ତି । ଆସନ୍ତା ଫେବ୍ରୁଆରୀ ୧୬ ତାରିଖରେ ଫିଲ୍ମଟି ମୁକ୍ତିଲାଭ କରିବ । ନିକଟରେ ନିର୍ମାତା ଫିଲ୍ମର ମଜାଦାର ଗୀତ ‘ବୋଟ୍ଲି ଖୋଲୋ’ ଜାରି କରିଥିଲେ, ଯାହା ଦର୍ଶକଙ୍କଠାରୁ ଭଲ ପ୍ରତିକ୍ରିୟା ପାଇଥିଲା । ଗୀତକୁ ଗୁରୁ ନିଜେ ଗାଇଛନ୍ତି । ମିତ୍ ବ୍ରଦର୍ସ ଏହାର ନିର୍ଦ୍ଦେଶନା ଦେଇଛନ୍ତି । ଆକ୍ସନ୍ ଡ୍ରାମା ‘ଦବଙ୍ଗ-୩’ରେ ସଲମାନ ଖାନ୍ଙ୍କ ଅପୋଜିଟ୍ରେ ଅଭିନୟ କ୍ୟାରିଅର ଆରମ୍ଭ କରିଥିବା ସାଈ ପାନ୍-ଇଣ୍ଡିଆ ଫିଲ୍ମ ‘ମେଜର୍’ରେ ଆଦିଭି ଶେଷଙ୍କ ଅପୋଜିଟ୍ରେ ନଜର ଆସିଥିଲେ ।
