ଛତ୍ରପୁର,୦୫/୧୨: ସ୍ଥାନୀୟ ସରକାରୀ ଆଇଟିଆଇ ଛାତ୍ରଛାତ୍ରୀ ଅଦରକାରୀ ଲୁହା ଓ ଅନ୍ୟ ସ୍କ୍ରାପ୍ ସାମଗ୍ରୀକୁ ବ୍ୟବହାର କରି ଭାରତୀୟ ନୌସେନାର ସ୍ୱଦେଶୀ ଯୁଦ୍ଧ ଜାହାଜ ଆଇଏନ୍ଏସ୍ ବିକ୍ରାନ୍ତର ମଡେଲ୍ ପ୍ରସ୍ତୁତ କରିଛନ୍ତି । ସୋମବାର ଭାରତୀୟ ନୌସେନା ଦିବସ ଅବସରରେ ଏହାକୁ ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା ଉଦ୍ଘାଟନ କରିଛନ୍ତି । ଏହାକୁ ନିର୍ମାଣ ଲାଗି ବର୍ଷେ ସମୟ ଲାଗିଛି ।
ଏହି ମଡେଲ୍ର ଉଚ୍ଚତା ୩୦ ଫୁଟ, ଓସାର ୧୦ ଫୁଟ ଓ ଲମ୍ବ ୭୦ ଫୁଟ । ପ୍ରଥମେ ଏହାର ନିର୍ମାଣ ପାଇଁ ଡିଜାଇନ୍ କରାଯାଇଥିଲା । ପରେ ସ୍କ୍ରାପ୍, ଆଇରନ୍ ଓ ପ୍ଲାଷ୍ଟିକ୍ ଫ୍ରେମ୍ କରାଯାଇଥିଲା । ତାହାକୁ ଗଛର ଅଂଶବିଶେଷ ଦ୍ୱାରା ସଜାଯାଇଥିଲା । ଆଲୋକୀକରଣ ସହ ସୁସଜ୍ଜିତ କରାଯାଇଥିଲା । ଛତ୍ରପୁର ସରକାରୀ ଆଇଟିଆଇ ଅଧ୍ୟକ୍ଷ ପ୍ରିୟବ୍ରତ ପଣ୍ଡାଙ୍କ ତତ୍ତ୍ୱାବଧାନରେ ତଥା ପ୍ରଶିକ୍ଷକ ଲାବଣ୍ୟବତୀ ବେହେରା, ନିରୁପମା ବାରିକଙ୍କ ପରିଚାଳନାରେ ଛାତ୍ରଛାତ୍ରୀମାନେ ଏହି ମଡେଲ୍ ପ୍ରସ୍ତୁତ କରିଛନ୍ତି । ପୂର୍ବରୁ ଏହି ଆଇଟିଆଇ ଛାତ୍ରଛାତ୍ରୀମାନେ ବିଜୁ ବାବୁଙ୍କ ଡାକୋଟା ବିମାନ ସ୍କ୍ରାପ୍ରେ ପ୍ରସ୍ତୁତ କରିଥିଲେ ।