କଟକ, ୧୧/୦୨: କଟକ ଫ୍ରେଣ୍ଡ୍ସ୍ କଲୋନୀରେ ବେଆଇନ ଲିଙ୍ଗ ନିରୂପଣ ଚାଲିଥିବା ବେଳେ ଏକ ଅଲ୍ଟ୍ରାସାଉଣ୍ଡ୍ କ୍ଲିନିକ୍ ଠାବ ହେବା ଏବଂ ସେଠାରୁ ଅଭିଯୁକ୍ତ ଡାକ୍ତର ସପତ୍ନୀକ ଗିରଫ ହେବା ଘଟଣାରେ ନାଟକୀୟ ମୋଡ଼ ଆସିଛି । ଘଟଣାରେ ଜଣେ ବ୍ୟକ୍ତି ନିଜକୁ ମଧ୍ୟସ୍ଥ କରି ଏସବୁ ମାମଲାକୁ ଥାନାରୁ ହିଁ ରଫାଦଫା କରି ତୁଟାଇଦେବାକୁ କହି ଡାକ୍ତରଙ୍କ ପରିବାରଠାରୁ ପ୍ରାୟ ୧୭ ଲକ୍ଷ ଟଙ୍କା ଠକି ନେଇଥିବା ମଙ୍ଗଳାବାଗ ଥାନାରେ ଅଭିଯୋଗ ହୋଇଛି । ଜେଲ୍ ଯାଇଥିବା ଡାକ୍ତର ପୁଣ୍ୟଶ୍ଲୋକ ଦାସଙ୍କ ମା’ ଏନେଇ ଏତଲା ଦେଇଛନ୍ତି । ପୁଲିସ ଅଭିଯୋଗ ପାଇ ଏକ ଠକେଇ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ମାତ୍ର ଘଟଣା ପରଠୁ ଅଭିଯୁକ୍ତ ମଧ୍ୟସ୍ଥ ଜଣକ ନିଜ ଫୋନ୍ ସୁଇଚ୍ଅଫ୍ କରି କଟକ ବାହାରକୁ ଚାଲିଯାଇଥିବା ଥାନା ପକ୍ଷରୁ ସୂଚନା ଦିଆଯାଇଛି ।
ଶୁକ୍ରବାର ଡାକ୍ତର ଦାସଙ୍କ ଘରେ ଅଚାନକ ଚଢ଼ଉ କରାଯିବା ପରେ ଡାକ୍ତର, ତାଙ୍କ ପତ୍ନୀ ଓ ଅନ୍ୟ ତିନି ଜଣ ପୁଲିସ ହାତରେ ଧରାପଡ଼ିଥିଲେ । ଏହାପରେ ସମସ୍ତ ଅଭିଯୁକ୍ତଙ୍କୁ ପୁଲିସ ଧରିନେଇ ଥାନାରେ ଅଟକ ରଖିଥିଲା । ଏପରିକି ଡାକ୍ତରଙ୍କ ପତ୍ନୀ ବିସ୍ମିତା ଦାସ ଥାନାରେ ଅଟକ ରହିବା ପରେ ସ୍ୱାସ୍ଥ୍ୟଗତ ସମସ୍ୟା ଦେଖାଇ ସେଠାରେ କନ୍ଦାକଟା କରିଥିଲେ । ଆଉ ଏହି ସମୟରେ ଧଳା ରଙ୍ଗର ପୋଷାକ ପିନ୍ଧିଥିବା ଜଣେ ବ୍ୟକ୍ତି ହଠାତ୍ ଥାନାରେ ପହଞ୍ଚି ଡାକ୍ତରଙ୍କ ପକ୍ଷରୁ ବୁଝାଶୁଝା, ମାମଲତି କରିବା ଆରମ୍ଭ କରିଥିଲେ । କେତେବେଳେ ସେ ଡାକ୍ତରଙ୍କୁ ଆଣି ପାଣି ପିଇବାକୁ ଦେଉଥିଲେ ତ କେତେବେଳେ ଡାକ୍ତରଙ୍କ ପତ୍ନୀଙ୍କର ଗ୍ୟାସ୍ ହୋଇଯାଇଛି ବୋଲି କହି ଔଷଧ ଆଣି ଦେଉଥିଲେ । ଏପରିକି ସେ ହିଁ ସେଠାରେ ଡାକ୍ତରଙ୍କ ପକ୍ଷରୁ ଯୁକ୍ତି ରଖିବାକୁ ଲାଗିଥିଲେ ।
ବିଭିନ୍ନ ସମୟରେ ସେ ଡାକ୍ତର ଓ ତାଙ୍କ ପତ୍ନୀଙ୍କୁ ସବୁକିଛି ଠିକ୍ ହୋଇଯିବ ବୋଲି ବୁଝାଉଥିଲେ । ହେଲେ ସନ୍ଧ୍ୟା ବେଳକୁ ସମସ୍ତ ଅଭିଯୁକ୍ତ କୋର୍ଟ ଚାଲାଣ ହୋଇଗଲେ । ଏପରିକି ପୂର୍ବରୁ ଯାହା ଶୁଣିବାକୁ ମିଳୁଥିଲା ଯେ, ପତ୍ନୀଙ୍କୁ ସେହିଠାରୁ ନୋଟିସ୍ ଦେଇ ପୁଲିସ ଛାଡ଼ିଦେବ ବୋଲି ତାହା ବି ହେଲାନି । ସମସ୍ତ ଅଭିଯୁକ୍ତ ଜେଲ୍ ଯିବାର ୧୨ ଘଣ୍ଟା ପରେ ଆସିଲା ଏକ ବଡ଼ ଅଭିଯୋଗ । ଡାକ୍ତରଙ୍କ ମା’ ଯଶୋଦା ଦାସ ଆସି ମଙ୍ଗଳାବାଗ ଥାନାରେ ଅଭିଯୋଗ କରିଥିଲେ କି, ଶନିବାର ସେହି ବ୍ୟକ୍ତି ଜଣକ ଆମ ପରିବାରରୁ ପ୍ରାୟ ୧୭ ଲକ୍ଷ ଟଙ୍କା ନେଇଥିଲା । ଥାନାରେ ମାମଲା ପହଞ୍ଚିବା ପରେ ପୁଲିସ ଓ ଅନ୍ୟ ଅଫିସରମାନଙ୍କୁ ଲାଞ୍ଚ ଦେଇ ମାମଲା ରଫାଦଫା କରି ଥାନାରୁ ସମସ୍ତଙ୍କୁ ଖସାଇଦେବ ବୋଲି କହି ସେ ଉକ୍ତ ଟଙ୍କା ନେଇଥିଲା । ମାତ୍ର କିଛି କରିପାରିଲା ନାହିଁ । ଠକେଇର ଶିକାର ହୋଇଥିବା ଜାଣି ପରିବାର ଲୋକେ ଏବେ ଫୋନ୍ କରିବାରୁ ସେ ଲୋକ ବିଭିନ୍ନ କଥା କହି ଗାଳିଗୁଲଜ କରୁଛି, ଧମକଚମକ ଦେଉଛି । ଯଶୋଦାଙ୍କ ଏତଲା ପାଇବା ପରେ ପୁଲିସ ଆଇପିସିର ଧାରା ୪୨୦ ଓ ୫୦୬ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି । ମାତ୍ର ଅଭିଯୁକ୍ତକୁ ଥାନା ପକ୍ଷରୁ ଫୋନ୍ କରାଯିବାରୁ ସେ ଫୋନ୍ ବନ୍ଦ କରି କଟକରୁ କେଉଁଆଡ଼େ ପଳାଇଥିବା ପୁଲିସ ଆଶଙ୍କା କରୁଛି ବୋଲି ଥାନା ଅଧିକାରୀ ଉମାକାନ୍ତ ସାହୁ କହିଛନ୍ତି ।
