କାଶୀପୁର,୩/୧୧ : କାଶୀପୁର ବ୍ଲକ  ଶିଳାଗାଁ ଗ୍ରାମରେ ଆଜି ଏକ ଅଭାବନୀୟ ଘଟଣା ଘଟିଛି । ପାରିବାରିକ କଳହରୁ ନାତି ଏବଂ ନାତୁଣୀ ବୋହୁ ମିଶି ଜେଜେଙ୍କୁ ହତ୍ୟା କରିଥିବା କାଶୀପୁର ଥାନାରେ ଅଭିଯୋଗ ହୋଇଛି । ଆଜି ସକାଳେ ଶିଳା ଗାଁ ଗ୍ରାମର ଗୋବର୍ଦ୍ଧନ ନାଏକ ଏବଂ ନାତୁଣୀ ବୋହୂ ପୁନି ମଧ୍ୟରେ କୌଣସି କାରଣରୁ ବଚସା ହୋଇଥିଲା । ଏଥିରେ ଉତ୍ତ୍ୟକ୍ତ ହୋଇ ନାତି ଏବଂ ନାତୁଣୀ ବୋହୁ ଗୋବର୍ଦ୍ଧନଙ୍କୁ ଠେଲାପେଲା କରିବାରୁ ତଳେ ପଡ଼ି ଗୁରୁତର ହୋଇ ପଡ଼ିଥିଲେ । 

ପରିବାର ଲୋକେ ତୁରନ୍ତ କାଶୀପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରିଥିଲେ। କିନ୍ତୁ ଚିକିତ୍ସାଧୀନ ଅବସ୍ଥାରେ ଗୋବର୍ଦ୍ଧନଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ଏହି ଘଟଣାରେ ଗୋବର୍ଦ୍ଧନଙ୍କ ପୁଅ ଥାନାରେ ଏତଲା ଦେବା ପରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ସଂପୃକ୍ତ ଦୁଇ ଜଣକୁ ଥାନାକୁ ନେଇ ପଚରାଉଚରା କରୁଥିବା ଜଣାପଡ଼ିଛି । ଏହି ଘଟଣାରେ କେଶ ନଂ ୧୬୦/୨୩ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଚାଲିଥିବା କାଶୀପୁର ଥାନା ସୂର୍ଯ୍ୟ ପ୍ରକାଶ ନାୟକ ସୂଚନା ଦେଇଛନ୍ତି।