ନୂଆଦିଲ୍ଲୀ, ୦୫/୦୨: ପେଟିଏମ୍ ୱାଲେଟ ଏବଂ ବ୍ୟାଙ୍କ୍ ଅପରେସନ ଉପରେ ରିଜର୍ଭ ବ୍ୟାଙ୍କ କଟକଣା ଲଗାଇଛି । ଏଭଳି ସ୍ଥିତିରେ ବ୍ୟବସାୟୀଙ୍କ ବାଣିଜ୍ୟ ସମ୍ପର୍କିତ ନେଣଦେଣରେ ସମସ୍ୟା ଉପୁଜିପାରେ । ଏହାକୁ ନେଇ ସର୍ବଭାରତୀୟ ବ୍ୟବସାୟୀ ମହାସଂଘ (ସିଏଆଇଟି) ବ୍ୟବସାୟୀଙ୍କୁ ସତର୍କ କରାଇଛି । ନେଣଦେଣ ଲାଗି ପେଟିଏମ୍ ପରିବର୍ତ୍ତେ ଅନ୍ୟ ପେମେଣ୍ଟ ଆପ୍ ବ୍ୟବହାର କରିବାକୁ ସଂଘ ପରାମର୍ଶ ଦେଇଛି । ବ୍ୟବସାୟୀଙ୍କ ଅର୍ଥ ସୁରକ୍ଷିତ ରଖିବା ତଥା ନେଣଦେଣରେ ଆଗକୁ ଯେଭଳି କୌଣସି ସମସ୍ୟା ନ ରହିବ ସେ ଦିଗକୁ ଧ୍ୟାନରେ ରଖି ଏଭଳି କହିଛି ସିଏଆଇଟି ।
ବର୍ତ୍ତମାନ କ୍ଷୁଦ୍ର ବ୍ୟବସାୟୀ, ଭେଣ୍ଡର, ହକର, ମହିଳା ବୃହତ୍ତ ମାତ୍ରାରେ ଏହି ପେମେଣ୍ଟ ଆପ୍ ବ୍ୟବହାର କରୁଛନ୍ତି । କଟକଣା ଯୋଗୁ ଯଦି କିଛି ସମସ୍ୟା ଉପୁଜେ ତେବେ ବ୍ୟବସାୟୀ ଏହା ଦ୍ୱାରା କ୍ଷତିଗ୍ରସ୍ତ ହେବେ ବୋଲି ସିଏଆଇଟି ପକ୍ଷରୁ କୁହାଯାଇଛି । ପେଟିଏମ୍ ବିରୋଧରେ ସନ୍ଧିଗ୍ଧ ନେଣଦେଣ ଅଭିଯୋଗରେ ରିଜର୍ଭ ବ୍ୟାଙ୍କ କଟକଣା ଲଗାଇଛି । ଗ୍ରାହକଙ୍କଠାରୁ କୌଣସି ଜମା କିମ୍ବା କ୍ରେଡିଟ ନେଣଦେଣ କରିବାକୁ କମ୍ପାନିକୁ ବାରଣ କରାଯାଇଛି ।
ଏହାକୁ ଦେଖିଲେ ଚଳିତ ମାସ ଶେଷ ଯାଏ ଗ୍ରାହକ ସେମାନଙ୍କ ଆକାଉଣ୍ଟରେ ଥିବା ଅର୍ଥ ବ୍ୟବହାର କରିପାରିବେ । ପେଟିଏମ୍ ଉପରେ ଲାଗିଥିବା କଟକଣା କୋହଳ ନ ହେଲେ ୨୯ ପରେ ନେଣଦେଣ କରିବା କଷ୍ଟକର ହୋଇପଡିବ ବୋଲି ଆଶଙ୍କା କରାଯାଉଛି । ସିଏଆଇଟି ମହାସଚିବ ପ୍ରବୀଣ ଖଣ୍ଡେଲୱାଲ କହିଛନ୍ତି, ରିଜର୍ଭ ବ୍ୟାଙ୍କ କଟକଣା ପରେ ପେଟିଏମ୍ ଆପ୍ରେ ନେଣଦେଣର ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଆର୍ôଥକ ନେଣଦେଣ ଯେଭଳି ବାଧାପ୍ରାପ୍ତ ନ ହୁଏ ତାକୁ ଦେଖି ବ୍ୟବସାୟୀଙ୍କ ପାଇଁ ମାର୍ଗଦର୍ଶିକା ଜାରି କରାଯାଇଛି ।
