ପାତ୍ରପୁର,୨୦/୦୨: ମା’ ବେକରେ କ୍ଷତଚିହ୍ନ । କୁନିପୁଅର ମୁହଁ ଓ ନାକରେ ରହିଛି ଦାଗଚିହ୍ନ । ରାତିରେ ଖାଇପିଇ ଏକାଠି ଶୋଇଥିଲେ । ରାତିଅଧରେ ମା’, ଓ ତା’ର କୋଳରେ ଥିବା ପୁଅକୁ କେହି ହତ୍ୟା କରିଛି । ସକାଳୁ ମା’-ପୁଅଙ୍କ ଶବ ଉଦ୍ଧାର ହୋଇଛି । ଗଞ୍ଜାମ ଜିଲ୍ଲା ଜରଡ଼ା ଥାନା ଅନ୍ତର୍ଗତ ଚୁଡ଼ିଆଲାଞ୍ଜି ଗାଁରେ ଏହି ହତ୍ୟାକାଣ୍ଡ ଘଟଣା ଚାଞ୍ଚଲ୍ୟ ସୃଷ୍ଟି କରିଛି । ମୃତକ ହେଲେ ଚୁଡ଼ିଆଲାଞ୍ଜି ଆଡୁଆ ସାହିର ଡି ମୋହନ ରାଓଙ୍କ ପତ୍ନୀ ଡି ନିଲାବେଣୀ (୨୬) ଏବଂ ତାଙ୍କ ସାନ ପୁଅ ଡି ରିତିକ(୭) । ନିଲାବେଣୀ ଓ ୭ ବର୍ଷର ଶିଶୁପୁତ୍ରକୁ ହତ୍ୟା ଅଭିଯୋଗ ହୋଇଛି । କିଏ ଓ କାହିଁକି ମାରିଲା ସେନେଇ ପୁଲିସ ଅନୁସନ୍ଧାନୀ ଆଖି ଘୂରି ବୁଲୁଛି ।
ଚିକିଟି ଏସ୍ଡିପିଓ ସୁଜିତ କୁମାର ନାୟକ, ଜରଡ଼ା ଥାନା ଅଧିକାରୀ ଟୁନା ସାସମଲ ସାଇଣ୍ଟିଫିକ୍ ଟିମ୍ ସହ ଘଟଣାସ୍ଥଳରେ ତନାଘନା କରିଛନ୍ତି । ମହିଳାଙ୍କ ସହ ଦୁଷ୍କର୍ମ ହୋଇଛି କି ନାହିଁ ସେନେଇ ପୁଲିସ କିଛି ସ୍ପଷ୍ଟ କରିନି । ଏହା ଏକ ହତ୍ୟାକାଣ୍ଡ, ଶବ ବ୍ୟବଚ୍ଛେଦ ପରେ ପ୍ରକୃତ ସତ ଜଣାପଡ଼ିବ ବୋଲି ସୂଚନା ଦେଇଛନ୍ତି ଚିକିଟି ଏସ୍ଡିପିଓ ଶ୍ରୀ ନାୟକ । ପୁଲିସ ମୃତ ନିଲାବେଣୀଙ୍କ ଶାଶୂ, ଶ୍ୱଶୁର ଓ ଦିଅରକୁ ପଚରାଉଚରା କରିଛି । ସୋମବାର ଅପରାହ୍ଣରେ ବ୍ରହ୍ମପୁର ଏସ୍ପି ଡା. ସର୍ବଣା ବିବେକ ଏମ୍ ଘଟଣାସ୍ଥଳ ପରିଦର୍ଶନ କରି ତଦନ୍ତର ଅଗ୍ରଗତି ଅନୁଧ୍ୟାନ କରିଛନ୍ତି ।
ଚିକିଟି ଏସ୍ଡିପିଓଙ୍କ ସୂଚନା ମୁତାବକ, ମୃତ ମହିଳାଙ୍କ ସ୍ୱାମୀ ଡି ମୋହନ ରାଓ ଦୁବାଇରେ କାମ କରନ୍ତି । ବଡ଼ ପୁଅ ଡି ବିନୋଦ (୯) ଆନ୍ଧ୍ରପ୍ରଦେଶ ରାଜ୍ୟ ସୋମପେଟାଠାରେ ଏକ ଆବାସିକ ସ୍କୁଲ୍ ହଷ୍ଟେଲରେ ରହି ୪ର୍ଥ ଶ୍ରେଣୀରେ ପଢ଼ୁଛି । ରବିବାର ରାତିରେ ନିଲାବେଣୀ ପୁଅ ରିତିକ ସହ ଶୋଇବାକୁ ଯାଇଥିଲେ । ପାଖକୁ ଲାଗିଥିବା ଅନ୍ୟ ଏକ ଘରେ ଶାଶୂ ଶ୍ୱଶୁର ରହୁଥିଲେ । ସୋମବାର ସକାଳୁ ଅନେକ ସମୟ ପର୍ଯ୍ୟନ୍ତ ଉଠି ନ ଥିଲେ ନିଲାବେଣୀ । ଘରର କବାଟ ଖୋଲି ନ ଥିଲେ । ପ୍ରଥମେ ଶାଶୂ ଡି ପଦ୍ମାବତୀ କବାଟ ଖୋଲି ଦେଖିଥିଲେ । ଦୁହେଁ ଉଠୁ ନ ଥିବାରୁ ଗାଁ ଲୋକଙ୍କୁ ଜଣାଇଥିଲେ । ଗାଁ ଲୋକଙ୍କଠାରୁ ଖବରପାଇ ଜରଡ଼ା ଥାନା ପୁଲିସ ଘଟଣାସ୍ଥଳରେ ଛାନ୍ଭିନ୍ କରିଥିଲା। ସନ୍ଧାନୀ କୁକୁର ଅଣାଯାଇଥିଲା, ହେଲେ ତାହାକୁ ବ୍ୟବହାର କରାଯାଇ ନାହିଁ । ଛାତ ରାସ୍ତା ଦେଇ କେହି ଘର ଭିତରକୁ ଆସି ଏଭଳି ଘଟଣା ଭିଆଇଥିବ ସନ୍ଦେହରେ ପୁଲିସ ଓ ସାଇଣ୍ଟିଫିକ୍ ଟିମ୍ ଛାତ ଉପରେ ତନାଘନା କରିଥିଲା । ଶବ ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ଼ ଡାକ୍ତରଖାନା ନିଆଯାଇଛି ।
