ମୁମ୍ବାଇ, ୦୮/୦୨: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ରେପୋ ରେଟ୍ ଅପରିବର୍ତ୍ତିତ ରଖିଛି । ଗୁରୁବାର ମୁଦ୍ରା ନୀତି କମିଟି ପୂର୍ବ ଭଳି ରେପୋ ରେଟକୁ ୬.୫ ପ୍ରତିଶତ ରଖିଛନ୍ତି । ଯଦିଓ ଏହାଦ୍ୱାରା ଲୋକଙ୍କ ଇଏମ୍ଆଇ କମି ନାହିଁ ତଥାପି ନୂଆ ଋଣ ନେଲେ ଦେବାକୁ ପଡ଼ୁଥିବା ଡକ୍ୟୁମେଣ୍ଟେସନ୍, ପ୍ରୋସେସିଂ ଫି ଏବଂ ଅନ୍ୟ ଦେୟ ଅଲଗା ଦେବାକୁ ପଡ଼ିବ ନାହିଁ । ଏ ସମସ୍ତ ଦେୟ ସୁଧ ସହ ମିଶିଯିବ ।

ଦୀର୍ଘ ସମୟରୁ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ଗ୍ରାହକ ନେଉଥିବା ଋଣ ଓ ତା ସହ ଜଡ଼ିତ ବ୍ୟବସ୍ଥାକୁ ସ୍ୱଚ୍ଛ କରିବାକୁ ପ୍ରଚେଷ୍ଟା କରୁଛି । ଋଣ ଆଦାୟ ନିୟମ ତିଆରି ଅଥବା ଋଣ ଉପରେ ଲଗା ଯାଉଥିବା ସୁଧକୁ ରେପୋ ରେଟ୍ ସହ ଲିଙ୍କ୍ କରିବା । ଏବେ ଆରବିଆଇ ଋଣ ପ୍ରୋସେସିଂ ଫି ଓ ଡକ୍ୟୁମେଣ୍ଟେସନ୍ ଚାର୍ଜେସକୁ ନେଇ ନିଷ୍ପତ୍ତି ନେଇଛି ।

ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ଗୁରୁବାର ମୁଦ୍ରା ନୀତି ଆଗତ କରି କହିଛନ୍ତି, ଏବେ ଗ୍ରାହକ ଋଣ ନେବା ବେଳେ ସୁଧ ସହ ଋଣ ନେବା ଆରମ୍ଭରେ ଡକ୍ୟୁମେଣ୍ଟ, ପ୍ରୋସେସିଂ ଓ ଅନ୍ୟ ଶୁଳ୍କ ଦେବାକୁ ପଡ଼ିଥାଏ । ଏଭଳି ଭାବେ ଗ୍ରାହକଙ୍କୁ ଋଣ ଉପରେ ଅଧିକ ଖର୍ଚ୍ଚ କରିବାକୁ ପଡ଼େ । ତେଣୁ ଏବେ ବ୍ୟାଙ୍କଗୁଡ଼ିକୁ କୁହା ଯାଇଛି, ଋଣ ଉପରେ ଲଗା ଯାଉଥିବା ଅନ୍ୟ ଶୁଳ୍କକୁ ସୁଧ ହାର ସହ ଯୋଡ଼ି ଦିଆଯାଉ । ଏହାଦ୍ୱାରା ଗ୍ରାହକ ମଧ୍ୟ ଜାଣି ପାରିବେ ପ୍ରକୃତରେ କେତେ ସୁଧ ଦେବାକୁ ପଡ଼ୁଛି ।

ଆରବିଆଇ ଆହୁରି କହିଛି, ଋଣ ସହ ଦିଆ ଯାଉଥିବା କି ଫ୍ୟାକ୍ଟ୍ସ ଷ୍ଟେଟମେଣ୍ଟ୍ସ (KFS)ରେ ଗ୍ରାହକଙ୍କୁ ସମସ୍ତ ତଥ୍ୟ ଦିଆ ଯାଇଥାଏ । ଏଥିରେ ପ୍ରୋସେସିଂ ଫିରୁ ନେଇ ଡକ୍ୟୁମେଣ୍ଟ ଚାର୍ଜେସ୍ ଆଦି ସାମିଲ୍ ରହିଛି । ଏବେ ଆରବିଆଇ ସମସ୍ତ ପ୍ରକାର ଋଣରେ ଏହାକୁ ଅନିବାର୍ଯ୍ୟ କରି ଦେଇଛନ୍ତି ।