ଭୁବନେଶ୍ୱର,୧୨/୦୨: ରବିବାରଠାରୁ ରାତି ତାପମାତ୍ରା  ପୁଣି ବଢ଼ିବ । ଅନେକ ସ୍ଥାନରେ ରାତି ତାପମାତ୍ରା ୨ରୁ ୩  ଡିଗ୍ରୀ ଯାଏ ବଢ଼ିଯିବ । ତେବେ ମଙ୍ଗଳବାର ଯାଏ ରାଜ୍ୟର  କିଛି ସ୍ଥାନରେ କାଁ ଭାଁ ବର୍ଷା ହୋଇପାରେ ବୋଲି ପାଣିପାଗ ବିଶେଷଜ୍ଞ ପୂର୍ବାନୁମାନ କରିଛନ୍ତି । 

ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ବୈଜ୍ଞାନିକ ଉମାଶଙ୍କର ଦାସ କହିଛନ୍ତି, ଗତ ଦୁଇ ଦିନ ରାଜ୍ୟର ରାତି ତାପମାତ୍ରା ସାମାନ୍ୟ କମିଥିଲା । ରବିବାର ପଶ୍ଚିମ ଓଡ଼ିଶାର ବିଭିନ୍ନ ସ୍ଥାନରେ ବର୍ଷା ହୋଇଛି । ସୋମବାର ବି କାଁ ଭାଁ  କିଛି ସ୍ଥାନରେ ବର୍ଷା ସମ୍ଭାବନା ଅଛି । ତେବେ ରାତି ତାପମାତ୍ରା  ପୁଣି ବଢ଼ିଲାଣି । ଆଗକୁ ଆହୁରି ବଢ଼ିବ । 

ରବିବାର କେନ୍ଦୁଝରର ରାତି  ତାପମାତ୍ରା ସବୁଠୁ କମ୍‌ ୧୨.୪ଡିଗ୍ରୀ ଥିଲା । କୋରାପୁଟର ୧୩.୮,  ରାଉରକେଲାରେ ୧୨.୯, ଅନୁଗୁଳରେ ୧୩, ଫୁଲବାଣୀରେ  ୧୩.୫, ଦାରିଙ୍ଗିବାଡ଼ିରେ ୧୪.୫ଡିଗ୍ରୀ ତାପମାତ୍ରା ରେକର୍ଡ  ହୋଇଛି । ସେହିଭଳି ଦିନ ସମୟରେ ମାଲକାନଗିରିର ତାପମାତ୍ରା  ସର୍ବାଧିକ ୩୪.୫ଡିଗ୍ରୀ ଥିଲା । ଅଧିକାଂଶ ସହରର ତାପମାତ୍ରା  ୩୦ଡିଗ୍ରୀ ପାଖାପାଖି ଥିଲା ।

ସୋଆ ଜଳବାୟୁ ଓ ପରିବେଶ  କେନ୍ଦ୍ର ନିର୍ଦ୍ଦେଶକ ଡ. ଶରତ ସାହୁ କହିଛନ୍ତି, ୧୬ ତାରିଖ ଯାଏ ରାତି ତାପମାତ୍ରା ସାମାନ୍ୟ କମିବ । କିନ୍ତୁ ୧୬ ପରେ ତାପମାତ୍ରା ବଢ଼ିଯିବ । ଶୀତ ଅନୁଭବ କମିବ । ସୋମବାର କେନ୍ଦୁଝର,  ମୟୂରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର, ଢେଙ୍କାନାଳ ଓ  ଅନୁଗୁଳରେ ହାଲୁକା ବର୍ଷା ସମ୍ଭାବନା ଅଛି ।