ବଡ଼ବିଲ, ୬।୫: ଭାରସାମ୍ୟ ହରାଇ ଦୋକାନ ଘର ଭିତରକୁ ପଶିଗଲା ୧୬ ଚକିଆ ହାଇୱା । ଗତ ବିଳମ୍ବିତ ରାତି ପ୍ରାୟ ସାଢ଼େ ୧୨ଟା ସମୟରେ ବଡ଼ବିଲ୍ ପିଏଚଡି ରୋଡ୍ ଭଞ୍ଜ କଲୋନୀ ଛକ ନିକଟରେ ଏହି ଦୁର୍ଘଟଣା ଘଟିଥିବା ସୂଚନା । ୧୬ ଚକିଆ ହାଇୱାଟି ଦ୍ରୁତ ଗତିରେ ପିଏଚଡି ପଟୁ ଟାଉନ୍ ପଟକୁ ଆସୁଥିବା ସମୟରେ ଭଞ୍ଜ କଲୋନୀ ଛକ ନିକଟ ଟର୍ଣ୍ଣିଂରେ ଭାରସାମ୍ୟ ହରାଇ ବସିଥିଲା । ଯାହା ଫଳରେ ରାସ୍ତାର ଡାହାଣ ପାର୍ଶ୍ୱକୁ ମାଡ଼ିଯାଇ ସେଠାରେ ଥିବା ୩ଟି ଦୋକାନ ଘରକୁ ଭାଙ୍ଗି ଭିତରକୁ ପଶି ଯାଇଥିଲା । 

କ୍ଷତିଗ୍ରସ୍ତ ହୋଇଥିବା ଦୋକାନ ଘରଗୁଡ଼ିକ ଭଗତ ରଜ୍ଜକ ନାମକ ବ୍ୟକ୍ତିଙ୍କର ହୋଇଥିବାବେଳେ, ଏଗୁଡ଼ିକୁ ସେ ଭଡ଼ା ଆକାରରେ ଦେଇଥିଲେ । ତେବେ ହାଇୱାକୁ ଗାଡ଼ିର ହେଲପର୍ ଚଲାଉଥିବା ଯୋଗୁଁ ଏଭଳି ଦୁର୍ଘଟଣା ଘଟିଲା ବୋଲି କୁହାଯାଉଛି । ଏନେଇ ଖବର ପାଇବା ପରେ ବଡ଼ବିଲ ପୋଲିସ୍ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି ।