ନୂଆଦିଲ୍ଲୀ, ୧୧।୯: ପ୍ରାଚୀନ କାଳରେ ଲେଖିବା ଲାଗି ତମ୍ୱା ପ୍ଲେଟ୍‌ର ବ୍ୟବହାର ହେଉଥିଲା । କାରଣ ଭବିଷ୍ୟତ ପିଢ଼ିଙ୍କ ପାଇଁ ସମସ୍ତ ଡକ୍ୟୁମେଣ୍ଟ ଏହି ତମ୍ୱା ପ୍ଲେଟ୍‌ରେ ସୁରକ୍ଷିତ ରହୁଥିଲା । ନିକଟରେ ମଧ୍ୟପ୍ରଦେଶ ଇନ୍ଦୋରର ଜଣେ ଓକିଲ ୫୭ କେଜି ଓଜନର ଏକ ବହି ପ୍ରସ୍ତୁତ କରିଛନ୍ତି । ଯାହାକୁ ତମ୍ୱା ପ୍ଲେଟ୍‌ ଅର୍ଥାତ୍, ପ୍ରାଚୀନ କାଳରେ କୁହାଯାଉଥିବା ତମ୍ୱାପାତ୍ରର ବ୍ୟବହାର କରି ପ୍ରସ୍ତୁତ କରିଛନ୍ତି । ଭାରତବର୍ଷର ୨୦୦ ସହରର ୪୨ ହଜାର ଲୋକଙ୍କଠାରୁ କେବଳ ୧ ଟଙ୍କା ଦାନରେ ଏହି ବହି ପ୍ରସ୍ତୁତ କରାଯାଇଛି । ଏହାର ନାଁ ରଖାଯାଇଛି ‘ସମ୍ୱିଧାନ ସେ ଦେଶ’ । 

ଇନ୍ଦୋରର ସ୍ଥାନୀୟ ଆଇନଜୀବୀ ଲୋକେଶ ମଙ୍ଗଲ ଏହି ପୁସ୍ତକ ପ୍ରସ୍ତୁତ କରିଛନ୍ତି । ପୁସ୍ତକରେ ୬ ହଜାରରୁ ଅଧିକ ପ୍ରତୀକ ତଥା ବିଶ୍ୱର ୧୯୩ଟି ଦେଶର ସାମ୍ୱିଧାନିକ ଅଂଶ, ରାଷ୍ଟ୍ରୀୟ ପ୍ରତୀକ ଓ ସମ୍ୱିଧାନ ସାମିଲ । ଏହି ପ୍ରତୀକଗୁଡ଼ିକୁ ୨ ଜଣ କଳାକାର ଲେଜର ଟେକ୍‌ନିକ୍‌ ପ୍ରକ୍ରିୟାରେ ତମ୍ୱା ପ୍ଲେଟ୍‌ରେ ଚିତ୍ରଣ କରିଛନ୍ତି । ଏଥିପାଇଁ ତାଙ୍କୁ ୨୧୭ ଘଣ୍ଟାର ସମୟ ଲାଗିଥିଲା । ୬ ବର୍ଷର କଠିନ ପରିଶ୍ରମ ପରେ ଏହି ପୁସ୍ତକ ସମ୍ପୂର୍ଣ୍ଣ ପ୍ରସ୍ତୁତ ହୋଇଥିବା ଲୋକେଶ ଗଣମାଧ୍ୟମକୁ ଜଣାଇଛନ୍ତି । ତାଙ୍କ କହିବାନୁସାରେ, କର୍ଣ୍ଣାଟକ ରାଜ୍ୟପାଳ ଥାୱାରଚାନ୍ଦ ଗେହଲଟ୍‌ଙ୍କ ପ୍ରେରଣାରେ ଏହି ପୁସ୍ତକ ପ୍ରସ୍ତୁତ । ଏହି ପୁସ୍ତକର ମୂଳଦୁଆରେ ଭାରତର ବସୁଧୈବ କୁଟୁମ୍ୱକମ୍ ଏବଂ ସର୍ବେ ଭବନ୍ତୁ ସୁଖୀନର ଉଦାର ଭାବନା ରହିଛି । ଏହି ପୁସ୍ତକ ପୁସ୍ତକର ମୋଟ୍ ଓଜନ ୫୭ କିଲୋ ଥିବାବେଳେ ଏହାର କଭର ପେଜ୍‌ର ଓଜନ ୧୦ କିଲୋ । ପୁସ୍ତକଟି ୧୪ ଇଞ୍ଚ ଚଉଡ଼ା ୪୮ ଇଞ୍ଚ ଲମ୍ୱା ଏହି ବହିଟିକୁ ଉଠାଇବା ଲାଗି ଦୁଇ ଜଣ ଲୋକଙ୍କ ଆବଶ୍ଯକତା ପଡ଼ିଥାଏ । ଏହି ପୁସ୍ତକରେ ୧୯୩ ଦେଶର ସାମ୍ୱିଧାନିକ ଅଂଶ, ରାଷ୍ଟ୍ରୀୟ ପ୍ରତୀକ ଓ ସମ୍ୱିଧାନ ସାମିଲ ।